أخبار عاجلة
الرئيسية / Blog / أشعة X-RAYS..~

أشعة X-RAYS..~

سمعت عن جايزه نوبل ؟؟ 

– اكيد سمعت شايفني جاهل 

طيب عارف مين اول عالم خد جايزه نوبل في الفيزياء ؟ 

– ها ؟! 

اقفل بوقك ، اول واحد كان المهندس والفيزيائي الألماني Wilhelm Röntgen 

مش مشكلة . طب عارف هو خدها ليه ؟؟ 

– ها ؟؟؟ 

اممم متقلقش انت كويس .. خَدها عشان اكتشف أشعة كده معرفش طبيعتها ايه .. وفي الرياضة لما بنلاقي حاجة مش عارفينا بنفرضها بـ X .. عشان كده هو سماها ( X-rays ) واحنا عشان متمسكين باللغة العربية وبنفرض المجهول بـ س .. فسمناها ( الاشعة السينية ) 😀 

يوم 8 نوفمبر سنة 1895 قدر يولد الاشعة دي لأول مرة وخد نوبل عليها سنة 1901 

طبعا مش لازم اقولك ان دي الاشعة اللي بتخترق جسمك كل ما تروح تعمل أشعة في المستشفي وكل ما تعدي من بوابة المترو ودي اللي بتعدي علي الشنطة بتاعتك اما بتدخل في الجهاز اللي ف المترو او المطار عشان يعرف اذا كان فيها اسلحة او متفجرات ولا .. غير اننا بنستخدمها كتيير في الصناعة عشان نعرف بيها العيوب الداخلية في المعادن ، يعني حاجة مهمة جداا من الاخر والمفروض يكون عندك معلومات كافية عنها .. فتعرف ايه بقي عنها ؟؟ 

– امممم اعرف انها كويسة !! 😀 

والله انت اللي كويس 😀 … بص يا سيدي 

دي نوع من انواع الأشعة الكهرومغناطيسية ، طولها الموجي بين (0,01 و 10 ) نانومتر.

يعني حاجة صغيرة جدااا وبالتالي احنا مش بنقدر نشوفها .. ليييه بقي ؟؟ 

لان عين حضرتك بتشوف بس الاطوال الموجية بين ( 380 و 750 ) نانومتر. 

طيب ازاي بقي نقدر نولد الاشعة اللي متتسماش دي ؟ 

بص يا سيدي احنا هنجيب أي مادة تكون معدن هنفرض انها بتنجانة تمام 😀 .. البتنجانة دي عبارة عن ذرات اكيد وجوا الذرات في الكترونات بتدور صح ؟؟ .. احنا بقي هنحاول ندي البتنجانة دي طاقة كبيرة عشان نجبر الالكترونات اللي جواها دي انها تخرج .. قشطه 

تماام عرفنا نحرر الالكترونات من البتنجانة ( كده البتنجانة هنسميها كاثود ) وبعدين ؟ 

.

هنجيب بقي تفاحة – بردو لازم تكون معدن وبيتحمل حرارة عالية جدا كمان زي التنجستن – نحطها قدام البتنجانة عشان احنا عايزين الالكترونات تتجه ناحية التفاحة 

– طيب واحنا هنجبر الالكترونات تتجه ناحية التفاحة ازاي ؟؟ 

انا سعيد انك سالت السؤال ده والله .. بسيطة جدا مش انت عارف ان الشحنات المختلفة بتتجاذب ؟؟ 

والالكترونات دي شحنتها سالبة ؟؟ صح 

اذا كل اللي هنعمله اننا هنخلي التفاحة عليها شحنات موجبة ( وكده التفاحة تبقي أنود ) .. كده هنعمل فرق جهد ، فالاكترونات اول ما تخرج وتشوف شحنة موجبة قدامها تدلدل لسانها وتجري عليها فورا وبالتالي هتكتسب طاقة حركية عالية .. هتجرري لحــــــد ما توصل للتفاحة و ساعتها اللي هيحصل حاجة من اتنين : 

.

إما ان الالكترون اللي طلع من البتنجانة هيبقي عنده طاقة كبيرة اوي فـ هيروح يخبط في الكترون موجود جوا ذرات التفاحة يعني يديله كتف قانوني يخرجه برا التفاحة خالص و هو كمان يخرج .. وبالتالي الالكترون اللي خد الكتف وطار ده هيسيب وراه مكان فاضي !! شئ جمبل 

كده عندك الكترون ساكن في الدور الرابع وتعب من السلم ولقي الكترون في الدور الارضي عزل .. يعمل ايه ؟؟؟ هوووب يروح واخد ديله في سنانه وينزل علي الدور الارضي فورا .. جميل اوي 

يعني في الكترون كان في ليفيل اعلي اما شاف مكان فاضي تحتيه نزل لليفيل أقل .

وفي قانون في ميكانيكا الكم بيقول ان الالكترون اما ينزل لليفل أقل بيفقد جزء من طاقته ويشعها علي هيئة فوتون .. اهو الفوتون اللي هيطلع ده هو أشعة اكس بنت التيت 😀 

بس استني طيب اما الالكترون اللي ف الدور الرابع ينزل تحت ، كده هيسيب مكانه فاضي بردو 😀  

وبالتالي الالكترون اللي ف الدور الخامس هيعمل نفس الكلام وينزل وهتفضل العملية تتكر كذا مرة و كل مرة يخرج فوتون جديد يعني تتولد اشعة اكس جديدة لحـــد اما الشقة اللي ف الدور الاخير تبقي فاضية ومش لاقية حد يسكنها فالمادة تدور علي زبون جديد يجي يسكن عشان تستقر .   

والعملية دي سموها ( K-shell emission ) 

.

وإما الالكترون ميبقاش عنده الطاقة الكافية انه يدي الكترون التفاحة كتف قانوني .. طيب ايه اللي بيحصل ؟ 

اما الكترون البتنجانة يقرب من الكترون التفاحة يحصل بينهم قوة تنافر ( بما انهم نفس الشحنة ) قوة التنافر فرق الكتلة الكبييير بين الالكترون والذرة ده بتخلي الكترون البتنجانة اللي جاي ده ينحرف عن مساره ، واما ينحرف عن مساره بيفقد جزء من طاقته .. ويشعها علي هيئة فوتون بردو فيصدر اشعة اكس 

والعملية دي سموها ( Bremsstrahlung ) 

.

اهو في المستشفي بقي بيوجهوا الفوتونات اللي طالعة دي ناحية دراعك المكسور فتخترقه ونحط ورقة سودا معينة ورا دراعك نستقبل عليها الفوتونات .. ومن هنا بنعرف مكان الكسر بالظبط 

او بنوجهها ناحية الشنطة في المترو فنعرف مكوناتها او نوجهها ناحية المعدن اللي هنستخدمه فنعرف العيوب الداخلية اللي فيه وهكذا يعني 

.

وطبعا ده كله مش بيحصل في الهوا كده .. بيكون داخل انبوبة اسمها انبوبة كولدج

بس يا سيدي .. مقولتلكش بقي عن اول واحد خد نوبل في الكيميا 

خد ياااض رايح فين ؟؟!! ياض خلاص تعالي طيب قولي فيلم هيبتا كان حلو ؟؟

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: