أشهر 15 أكذوبة علمية يصدقها كثير منا حتى الآن! 

0
157
views

دول أشهر 15 أكذوبة علمية يصدقها كثير منا حتى الآن! 

1- الانسان بيستخدم 10% من الدماغ!  

طبعا دي مجرد خرافة لا أصل لها علميا موجودة في الافلام بس زي لوسي، باستخدام التصوير بالرنين المغناطيسي الوظيفي والتصوير المقطعي بالاصدار البوزيتروني تشير إلى أن الانسان يتسخدم 100% من دماغه على مدار ال 24 ساعة حتى وهو نائم وحتى الآن العلماء لم يجدوا أي جزء في الدماغ غير غير نشط بل إن كل شيء له وظيفة. 

الإشاعة دي ممكن تكون انتشرت بسبب فهم خاطئ لبحث في علم الاعصاب انتشر في بداية القرن العشرين كان بيشير إلى أن الدماغ تحتوي على عدد كبير من الخلايا العصبية ولكنها صغيرة جدا وأن 10% من الدماغ عبارة عن خلايا عصبية والباقي خلايا دبقية تغطي وتدعم الخلايا العصبية بطرق مختلفة. 

.

2- بلوتو طلع برا المجموعة الشمسية!. 

مطلعش وربنا، الفكرة إن مع تطور التليسكوبات اكتشفنا ان حجمه صغير جدا، أصغر من إنه ياخد رتبة كوكب .. ووجدنا كمان كثير من الكواكب الأخرى في مجموعتنا تشبه نفس حجمه فهل نعتبرها بردو كواكب؟! لذلك العلماء نزلوه لرتبة كوكب قزم بجانب كواكب قزمة أخرى زي إيريس (Eris) وسيريس (ceres) وماكيماكي (makemake).

.

3- قلبك بيقف عند العطس. 

العطس (sternutaion) هو عبارة عن منعكس يقع مركزه في جزء من جذع الدماغ بيسمى (النخاع المستطيل – medulla oblongata)

لما تيجي مادة ما تداعب الجزء العلوي من بطانة الأنف ترسل النهايات العصبية في نهاية الأنف إشارة إلى النخاع المستطيل الذي يرسل بدوره الأوامر إلى العين لتُـغلِق وإلى الصدر ليتقلص والرئتين لتطلق كمية من الهواء للخارج بسرعة 160 كيلو في الثانية الواحدة.

الحاجة الوحيدة اللي الدماغ مش بيعملها إنه لا يرسل إشارة للقلب ليتوقف أبدا، فهو يستمر بالنبض مهما كانت شدة العطسة.. وقرب أقولك حاجة، شيل من دماغك اننا بنقول الحمدالله بعد العطس عشان كده “)) .  

.

4- ذاكرة السمك الذهبي 3 ثواني.

طبعا دي خرافة اكتشفتها قريب، أبحاث وتجارب كتير أثبتت أن السمك يقدر يتذكر أشياء لمدة 5 شهور.. يعني متخدوش العلم من كرتون نيمو!.

.

5- الاستمناء أو العادة السرية هي السبب في ظهور حب الشباب. 

طبعا العملية الجنسية ملهاش أي علاقة من قريب أو بعيد بحب الشباب، الفكرة إن الاتنين بيبدأوا مع بداية سن البلوغ فالناس ربطت بينهم بشكل ما كعادة البشر اللي لازم أي حاجتين تحصل مع بعض يكون بينهم علاقة سببية ! ..

سبب ظهور حب الشباب في بداية فترة البلوغ هو البكتريا التي تتغذى على الزيوت والتي يتم إنتاجها في مسام الجلد خلال فترة البلوغ ثم ينخفض هذا الإنتاج لاحقا فالحبوب بتبدأ تختفي.

ولو كان في أي علاقة بين العملية الجنسية وحب الشباب فكان المفروض كل اللقاءات الجنسية تسسبب في ظهور حب الشباب! وطبعا في أسباب تانية ممكن تسبب الحبوب دي منها نوع البشرة والاضطرابات في الهرمونات وبعض الآثار الجانبية لبعض الادوية اللي احنا مش بنقرأها طبعا.

.

6-عطارد أسخن كوكب في مجموعتنا لأنه الأقرب إلى الشمس!

صدق أو لا تصدق إن كوكب الزُهرة هو أسخن كوكب في مجموعتنا وليس عطارد، لأن جوه الغني بثاني أكسيد الكربون إضافة إلى السحب الكثيفة السميكة من الغازات السامة – زي ثنائي أكسيد الكبريت- تخفي سطحه عن الرؤية وتحتفظ بكميات هائلة من حرارة الشمس تجحل منه جحيما لا يطاق.

.

7- جالك برد أو انفلونزا ؟ خدلك مضاد حيوي على طول. 

يا فندم نزلات البرد الموسمية والأنفلونزا دي إصابات فيروسية والمضادات الحيوية لا تقتل الفيروسات بل ان المضادات الحيوية تقتل البكتريا أها والله “D 

لو استخدمت المضادات غلط بدون استشارة الطبيب ممكن تتسبب في خلق جراثيم أو بكتيريا مضادة لتلك المضادات الحيوية في جسمك والجراثيم دي ممكن تتسبب في أمراض خطيرة. 

الأطباء بينصحوا بيها أحيانا عشان يمنعوا حدوث عدوى بكتيرية.. احنا بنسيب فيروس الأنفلونزا ده يدخل ويكمل دورة حياته ويتفسح وياخد واجب ضيافته ويمشي بسلام.

.

8- الشمس لونها أصفر.

الشمس لونها أبيض يا فندم، احنا بس بنشوفها أصفر بسبب الغلاف الجوي اللي بيعكسلنا اللون ده وبنشوف السما زرقا لنفس السبب ومن غير ما نطلع برا الكوكب عشان نشوف لونها، العلماء يقدروا يعرفوا لون اي جسم مشع من درجة الحرارة اللي بتشع منه، يعني النجوم الساخنة اللي درجة حرارتها أعلي من 10 آلاف درجة كلفن بيكون سطحها أزرق، وبالنسبة للشمس اللي درجة حرارتها 6 الاف كلفن فيكون لونها أبيض بوضوح 

.

9- الجلوس بالقرب من شاشة التلفزيون بيضر بالعينين. 

مش بتضر أقسم بالله، ممكن الجلوس لفترة طويلة يُرهق العينين مؤقتا فقط وبعدين بيروح، الإشاعة دي ظهرت سنة 1967 لما شركة جينيرال إلكتريك أعلمت الجمهور إن كتير من شاشاتها الملونة تشع مقدار زائد من أشعة إكس بسبب خطأ من المصنع ونصحوا الناس اللي بتمتلك الشاشات دي إنها تبعد بضع أقدام من الشاشة لتكون في أمان وطبعا استردوا الشاشات دي وصلحوا الخطأ ده وأضافوا زجاج مغطى بالرصاص وحاجات كده يعني . لكن طبعا الأمهات تسكت ؟ فضلوا ينقلوا في الكلمتين لكل الاجيال القادمة والاشاعة انتشرت حول العالم،

.

10 – ضهرك بيوجعك؟ .. متشلش حاجة تقيلة وأقعد بشكل مستقيم.  

لا يا فندم ممكن تشيل حاجة تقيلة عادي المهم تشيلها بطريقة صحيحة متضغطش بيها على العمود الفقري والنخاع الشوكي، لاعبية رفع الأثقال مش معوقين متقلقش! 

الجلوس والنوم بشكل مستقيم .. مع إن الوضعية ممكن تريح الألم فعلا لكن الأطباء ديما بينصحوا المرضى بالبقاء بالوضعية اللي بيحسوا فيها بالراحة.

 .

11- شعر الجسم ينمو أكثر عند حلقه. 

دكتورة الأطفال والباحثة رايتشل فريمن وأستاذ طب الأطفال المساعد هارون كارول قالوا إنها مجرد إشاعة والحلاقة لا تؤثر على كثافة أو نمو الشعر لانها بتزيل الجزء الميت الخارجي فقط من ااشعر وليس الجزء الداخلي الحي المتواجد تحت الجلد .. ولكن لكون الشعر المحلوق أكثر خشوة يوحي بأنه أكثر كثافة .

.

12- لو واحد لدغه تعبان مص اللدغة عشان تخرج السم وتتفه ! 

في الحقيقة دي فكرة سيئة جدًا .. دكتور بيلي جولدبرج ودكتور مارك لينر وضحوا إن الحركة دي ممكن تحدث تفاقم للأوضاع بإحداث عدوى في منطقة الجرح ولكن لازم نتبع النصائح الطبية السليمة وهي إننا نغسل مكان اللدغة بالماء والصابون، ومنحاولش نحرك منطقة اللدغة عشان نخلي السم بعيد عن القلب أكتر وقت ممكن، ونحصل علي المساعدة الطبية في أقرب وقت ممكن، وبعض الحالات ينصح بضماضة او قماشة توقف النزيف.  

.

13- 8 ساعات فترة مناسبة للنوم لجميع البشر.

ممكن فعلا تكون مناسبة لناس كتير لكن ليس بالضرورة تكون مناسبة لجميع البشر، دراسات أوروبية أشارت إلى أن الأشخاص اللي بيمتلكوا جين معين اسمه (ABCC9) يقدروا يناموا ساعات أقل من الاشخاص العاديين. 

.

14- مفيش أي علاقة من قريب أو بعيد بين حياتك اليومية بما تحويها من أحداث ومشاعر وتغيرات أو صفاتك الشخصية وبين ما يحدث في السماء أو خارج كوكب الأرض، الكلام ده تم دحضه بخمسين طريقة عيب تصدقه حتى الآن !! الكلام ده لا يمت للعلم أو للدين بأي صلة. 

.

15- رايح أخد كورس برمجة لغوية عصبية هيغيرلي حياتي ! 

مفيش علم اسمه برمجة لغوية عصبية والجامعات العالمية المحترمة تصنفه كعلم زائف ومفيش أي أبحاث بتنشر في مجلات علمية مرموقة معامل التأثير بتاعها محترم نشرت بحث واحد عن الخرافات دي.. صدقني بتاع الكورس اللي حياته هتتغير بفلوسك “D

.

إصحوا ليغفلونا 😀 

#فتبينوا

تعليقات الفيس بوك

تعليقًا