أخبار عاجلة
الرئيسية / Blog / إزاي نستخدم العلم في تنفيذ حيل ممتعة ؟؟؟كل شيء حوالينا ليه تفسير علمي 👇🏻

إزاي نستخدم العلم في تنفيذ حيل ممتعة ؟؟؟كل شيء حوالينا ليه تفسير علمي 👇🏻

بما إن في ناس كتير عايزة تجنن إخواتها و بما إننا عايزين نشوف متعة العلم قدام عنينا فتعالوا نعمل التجربة دي ..

هتجيب طبق مسطح و فيه شوية مياه و كوباية و كبريت و ورقة وجنيه…

هتحط الجنيه في الطبق و تقولهم عايزين نفصل الجنيه عن المياه من غير ما نلمس الجنيه … نعمل إيه ؟؟

هتولع حتة من الورقة بالكبريت و تحط الورقة المولعة في الكوباية و بسرررعة تقلب الكوباية و تحطها في طبق المياه على وشها و تضغط جااامد .. بعد شوية هتلاقي المياه اللي في الطبق كلها إتجمعت جوا الكوباية زي الصورة كده و الجنيه بقي لوحده ……. طب ليه ؟؟؟؟

ببساطة لأن النار اللي جوا الكوباية عايزة أكسچين فهتشفط كل الأكسچين اللي في الكوباية، فحجم الغاز جوا الكوباية هيقل و هيبقى في أماكن فاضية و درجة الحرارة جوا الكوباية هتزيد صح ؟

اعرف بقى إن المكان اللي درجة الحرارة فيه عالية جزئيات الهواء بتحاول تبعد عن بعضها . عايزة ترحرح الجو بقى حر زينا كده مبنحبش الزحمة في الجو الحر و بالتالي لما تيجي تبعد عن بعضها هتلاقى أماكن فاضية كتير ترحرح فيها براحتها فالضغط في المكان ده بيقل على طول، نتيجة إن الجزيئات بعدت عن بعض .

يعني بإختصار الحرارة لما زادت جوا الكوباية، الضغط جواها هيقل عن الضغط برا الكوباية .. تمام ؟

و خدها قاعدة فيزيائية : أي مانع ( يعني سائل أو غاز ) دايماً بينتقل من المكان اللي فيه ضغط عالي إلى المكان اللي فيه ضغط أقل زي ماقولنا بيحاول يبعد عن الزحمة .. و بالتالي المياه كلها هتتسحب للكباية اللي ضغطها أقل .. بس كده

زي بالظبط السبب اللي بيخليك تعرف تشرب العصير بالشاليموه .. إيه اللي بيخلي العصير يمشي في الشاليموه و يوصل لبوقك ؟

الفكرة إنك لما بتشفط الهوا ببوقك بتقلل الضغط اللي في بوقك عن الضغط اللي في الكوباية فبالتالي السائل أوتوماتيك أول ما يلاقي مكان في ضغط أقل يجري عليه ، فيمشي في الشاليمووه ،وممكن بردو تجيب إزازة زجاج بوقها واسع و تحط فوقيها بالونة منفوخة تكون أكبر من فتحة الإزازة شوية و تقولهم عايزين ندخل البالونة جوا الإزازة من غير ما نضغط عليها ، نعمل إيه ؟؟؟

 ولع الورقة وحطها جوا الإزازة و رجع البلونة فوق الإزازة زي ما كانت ، هتلاقيها إتشفطت لجوا الإزازة لنفس السبب.

عشان كده ساعات السواقين بيفضوا تنك البنزين بتاع العربية بالفكرة البسيطة دي، بيجيبوا خرطوم و يحطوا طرف منه في التنك و الطرف التاني يشفطوا منه الهواء لحد ما يحسوا إن السائل دخل في الخرطوم و بعدين يحطوا الطرف التاني في إزازة بقى أو چركن فالبنزين ينزل كله في الإزازة ..

بالمناسبة القاعدة دي هي فكرة عمل الطائرة .. إحنا بنخلي الضغط الجوي فوق جناح الطيارة أقل من الضغط تحت الجناح و بالتالي الهوا بيبقى عايز يطلع لفوق يطلع للمنطقة اللي فيها ضغط أقل فيروح رافع الطيارة معاه 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: