أخبار عاجلة
الرئيسية / Blog / إكسر الشماعة!!! إتحدى نفسك 💪🏻

إكسر الشماعة!!! إتحدى نفسك 💪🏻

الشماعة، دومًا ما كانت الإختيار الأمثل لحياة بائسة وبال مرتاح 

وهنا دليلك السريع لـ أشهر 8 شماعات شائعة في الوطن العربي :

1- نظام تعليم فاشل .. أتعب نفسي فيه ليه ؟ 

كلامك صحيح لو عرفت تسافر تتعلم برا متفكرش كتير، ولكن لو معرفتش؟ فاسمحلي ألفت نظرك لنقطة مهمة وهي أن (مناهجنا) ليست بذلك العقم والفشل الذي تتخيله، والدليل أن إختبار عالمي مثل الـ (GRE) – الذي يؤهلك للدراسة في أكبر الجامعات – يكفيك دراسة مناهجنا كي تجتازه بتفوق، ودليل آخر تجده على لسان دكاترة جامعاتنا اللي سافرت تكمل دراستها في الخارج واللي درّسوا في جامعات برا فلم يجدوا ذلك الفرق الهائل في محتوي المناهج اللي مترسخ في مخيلة الطلبة في العالم العربي، ودليل آخر تجده في محتوي المناهج المعلن عنه في المواقع الرسمية لأكبر جامعات العالم اللي ممكن تطلع عليه بسهولة واللي مش هتجد فيه الفرق الشاسع اللي متخيله، لكنّ الفروق الهائلة في جوانب أخرى من منظومة التعليم بعيدًا عن محتوي المنهج.

فبلاش جلد الذات وعقدة الخواجة المتفشية فينا، ونهتم بدراستنا قدر الإمكان (على عِلاّتها المتعددة) لأنها – للأسف – من أهم الفرص لسفرنا خارج تلك البقعة الداكنة من العالم وإيجاد ما نحلم بيه من تعليم راقي ومعاملة آدمية وحياة كريمة. 

2- التنسيق دخلني كلية مش عايزها أو حتي لو المناهج كويسة بس مش بفهم من المدرسين أو الدكاترة.

كلاهما هراء فارغ في عصر الإنترنت.

العلم اللي شغوف بيه تقدر تدرسه في أكبر جامعات العالم وعلي يد أعظم الأساتذة والدكاترة الجامعيين ببلاش .. و كل الكتب والمراجع والمحاضرات اللي عايزها تقدر تحملها ببلاش بضغة زر .. أومال إيه لازمة Coursera و edX و Udacity و Khan Academy و MIT OpenCourseWare و Rwaq رواق و منصة إدراك وغيرهم ؟ 

3- معييش لغة تخليني أدرس كويس في المواقع دي ولا إقرأ كتب .

ودي شماعة من قديم الأزل، وتلاقي اللي بيقولها مسيف خمسين ألف بوست عن الإنجلش مليانة كورسات ومواقع وكتب وروايات وأفلام وطرق مبتكرة تقوي اللغة عنده في ست شهور .. ولو كنت نزلت زيهم في البوست ده كانوا هيبقوا خمسين ألف وواحد، لكن هو بيضحك على نفسه وناوي يروح إيفنت جديد بعد يومين للمرة العشرين عشان واحد يقوله الحل السحري لإتقان اللغة في أسبوع ونص.. كفاك هراءًا ! ألم يأنِ لك أن تبدأ ؟؟ لو فعلاً عندك أولوية كنت بدأت بكل السبل اللي قدامك (وإلتزمـت) عشان تلاقي مردود اللي إتعلمته.. غير كده كلام فاضي.

4- مفيش شغل غير بواسطة.

شماعة مشهورة ومريحة جدًا هتخليك قاعد ع القهوة بضمير مرتاح خصوصاً لما تلاقي أمثلة كتير في حياتك إشتغلت بالواسطة تثبت كلامك (وهتلاقي كتير) .. بس أحب أصدمك أنها أيضًا هراء فارغ في عصر الإنترنت

مسمعتش عن الـ Freelancing ؟؟ مسمعتش عن الناس اللي بتكسب آلاف الدولارات في الساعة وهي قاعدة في غرفتها على جهازها؟؟ كل اللي عملوه إنهم قاموا من ع القهوة ودخلوا المواقع اللي فوق دي وغيرها وإتعلموا ونموا مهاراتهم وكوّنوا CV محترم وبعدين دخلوا مواقع الفريلانسر وربنا وسع عليهم ورزقهم لما سعوا .

أومال إيه لازمة PeoplePerHour و Freelancer و Upwork و Guru.com و Fiverr.com وKhamsat.com و Nabbesh.com و Mostaql.com و غيرهم ؟ 

5- المؤامرة الكونية ، ودي أفضل شماعة بتلجأ ليها الحكومات الفاشلة والأنظمة المستبدة .. فـإنعدام الأمن وإختفاء العدل وتضليل الإعلام وتدهور الصحة وإنتشار الأمراض وتلوث المياة والهواء والغذاء وفشل المنظومة التعليمية وإنهيار الإقتصاد ماهي إلا نتاج المؤامرات التي تحاك ضدنا .. أما إحنا؟.. إحنا فُـلة ، وبنأدي واجبنا على أكمل وجه، وما أحلاها من تلك الشماعة التي تمنحنا نوماً عميقاً وراحة بال.

6- الحسد، وهي إحدي أهم الشماعات المشهورة في العالم العربي لتبرير أي فشل بكل سهولة ولو فكرت أن تلقي اللوم على تقصيرهم تجد الرد الساذج بكل بلاهة وجهل (يابني الحسد مذكور في القرآن !!) لأن الفئة دي لا تختلف كثيرًا عن الفئة التي لا تدرك من القرآن إلا أن (الشرع محلل أربعة) مثلهم كمثل الذي قرأ في القرآن (ولا تقربوا الصلاة) ثم أغلقه، فكلهم في الضلال سواء .. يقتبسون من الدين ما يتماشي مع أهوائهم وأيدلوجياتهم فقط .. أولئك الذين إتخذوا إلههم هواهم. 

7- معنديش وقت لما أفضي .. ودي شماعة ساذجة جدًا .. والأفضل إستبدالها بجملة ( معنديش أولوية ) فإن وُجدت الأولوية كان الوقت. 

8- مش لاقي شغفي ، مش عارف أنا عايز إيه ؟! 

ودي أشهرهم ، بيلجألها الشخص البائس اللي مقتنع أن الناجحين اتولدوا وشغفهم منقوش علي جباههم !.. أو أن الشغف ده بيلاقوه بالفطرة دون أي جهد وبحث ومحاولة وفشل ثم محاولة وفشل إلي أن ينجحوا ، كل اللي عليه إنه يقعد في غرفته يندب ، ويروح إيفنت للمرة العشرومية عشان واحد يقوله ( إزاي يلاقي شغفه في خمس دقايق ) شوف إزاي ؟؟!!  

الفشل في ذاته ليس عيبـًا يا صديقي ولكن العيب كل العيب في عدم التعلم منه وخلق الشماعات والحُجج والمبررات، فما أسهلها من طريقة لإخماد تأنيب الضمير ومنحك حياة بائسة جميلة. 

وأخيرًا أُذكر نفسي قبلك أن الإنترنت سلاح ذو حدين ؛ قادر على أن يمهد لك الطريق لنجاحات مبهرة ، وقادر أيضًا على أن يجعل منك بائسًا جديدًا منزوٍ في غرفته يهدر عمره فيما لا يسمن ولا يغني من جوع .. فاحذر منه

فكلٌ منّـا سيُسأل عن عمره أمام الله ؛ فجِد لنفسك إجابة الآن فأنت لا تدري متي تلقاه.

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: