إنت مش قليل … مستني إيه؟؟؟

0
647
views

18 مليار دولار .. مبيعات شركتك .. في يوم واحد .. يا فاشل !! 

موقع (علي بابا ) باع أشياء بـ 18 مليار دولار في يوم واحد فقط ! 

وإنت بتقرأ الخبر ده لازم يتبادر إلى ذهنك المعلومات الآتية:

• «چاك ما» مؤسس موقع «علي بابا» فشل في إختبار الإلتحاق بالجامعة 3 مرات .. إتقدم عشرات المرات للإلتحاق بجامعات أمريكية وإترفض منهم جامعة هارفارد قدم طلب التسجيل فيها 10 مرات وإترفض .. إتقدم بطلب لـ 30 وظيفة وإترفض .. إتقدم للعمل كعامل نظافة في محلات كنتاكي وكان عدد المتقدمين للوظيفة 30 إتقبل منهم 29 فرد والوحيد اللي إترفض كان چاك .. إتقدم للتطوع في الشرطة الصينية وكان من بين 14 رجل تم قبول 12 فرد وإترفض فردين كان چاك واحد منهم.

• چاك كان كل يوم يركب عجلته لمدة 40 دقيقة وعلى مدار 8 سنوات عشان يوصل لفندق قريب من بحيرة هانغتشو، عشان يحتك بالسياح ويقدم لهم خدماته كدليل سياحي مجاني عشان يحسن اللغة الإنجليزية بتاعته .. وإتقبل في جامعة وصفها إنها أسوأ جامعة في مدينته .. واتخرج واشتغل مدرس إنجلش بـ 12 دولار في الشهر! 

• چاك ثروته دلوقتي تصل إلى 21.9 مليار دولار .. وتم تصنيفه كأغنى شخص في الصين .. ويحتل المرتبة 34 بين أغنى أغنياء العالم ، وفقاً لمجلة Bloomberg.

• شركة علي بابا دلوقتي هي أكبر شركة تجارة إلكترونية في العالم ، بيشتغل فيها أكثر من 22 ألف موظف، في أكثر من 70 مدينة حول العالم .. تتجاوز مبيعاتها السنوية 170 مليار دولار، يعني أكبر من الإحتياطي النقدي لـ ( مصر والمغرب ولبنان والأردن وتونس ) مجتمعين وفقاً لإحصائيات 2015 .. يعني أعلى من مبيعات موقع «أمازون» مرتين… أنشأها چاك بعد قعدة مع صحابه في شقته بيفرجهم على الإختراع الجديد وقتها (الإنترنت) ولما بحث عن كلمات باللغة الصينية إكتشف إن مفيش أي نتائج ظهرتله بالصيني ! فـقرر إنه يستغله وينشئ موقع تجارة صيني يعمل كوسيط بين التجار في جميع أنحاء العالم وكمتجر تقدر تشتري منه أي شيء، ينافس المواقع العالمية زي أمازون .. طبعا كان الأول من نوعه في الصين فعمل طفرة هائلة في سوق التجارة الصينية وجعل من إسمه امبراطورية. 

• إجمالي صادرات مصر هو 15 مليار و361 مليون دولار خلال سنة كااااملة (2015) .. يعني اللي بتصدره دولة بكل مؤسساتها ومصانعها ومزارعها وبابا غنوجها خلال سنة كاملة .. جاك موقعه باع بأكتر منها في يوم واحد يا مؤمن !!. 

• أم الدنيا بانية كل آمالها وأحلامها على قرض من صندوق النقد الدولي مقداره 12 مليار دولار .. فلتتأمل. 

• نجاح چاك مش إنه أصبح من أغنياء العالم .. لأن عمر جمع المال ما كان مقياس للنجاح … ولكن لأنه ألهم ملايين الشباب وأثر فيهم وغير تفكيرهم تماماً تجاه العمل .. نجاحه يكمن في إصراره إنه ميكونش من الشكائين البكائين الندابين ذوي الشماعات المتعددة .. في إصراره على النجاح رغم فشله المتكرر .. نجاحه يتمثل في الرسالة اللي وصلها للعالم كله إني مش فاشل ، وإني برغم صغر جسمي إلا إني مش قليل !  

• المعلومة الاخيرة: إنت مش قليل !

تعليقات الفيس بوك

تعليقًا