أخبار عاجلة
الرئيسية / Blog / إيه الفرق بين الكمبيوتر العادي والكمبيوتر الكمي ؟؟؟؟

إيه الفرق بين الكمبيوتر العادي والكمبيوتر الكمي ؟؟؟؟

إمبارح رئيس الوزراء الكندي كان في زيارة لمعهد الفيزياء النظرية .. واحد من الصحفيين حب يهزر ويحرجه بما إنه خريج آداب إنجلش ، فبيقوله في الحقيقة أنا كنت عايز أسألك عن الكمبيوتر الكمي بس ما علينا وبدأ في سؤال تاني عادي فالناس ضحكت .. بعد ما خلص سؤاله ، رئيس الوزراء بدل ما يرد على سؤاله .. رد على السؤال الهزلي الأولاني و شرح الفكرة الأساسية لعمل الكمبيوتر الكمي والفرق بينه وبين الكمبيوتر العادي في دقيقة والناس سقفت وإنبرهت والجرايد كتبته عنه .

طيب ما تيجي نعرف بقى إيه حكاية الكمبيوتر الكمي ده وإيه الفرق بينه وبين الكمبيوتر العادي بتاعنا عشان محدش يعرف يحرجنا ؟

الكمبيوتر بتاعنا ده يا سيدي عبارة عن شرائح إلكترونية دقيقة من السليكون ودوائر كهربية صغيرة جداً ماشية بنظام ثنائي

 ( binary system ) .. يعني الكمبيوتر مبيفهمش غير حاجتين ( صفر و واحد ) يعني أي بيانات بتدخلها للكمبيوتر أفلام صور أصوات أي حاجة .. لازم يحولها لمجموعة من البيتس (bits ) عبارة عن سطور مكونة من صفر وواحد .

* الـ ( bit ) هي أصغر وحدة بقيس بيها كمية البيانات في الكمبيوتر ( زي الكيلو بقيس بيه الخضار في السوق مثلاً)

يعني اللي بيفهمه الكمبيوتر بتاعنا هو إختيار واحد من الإتنين .. يعني الزرار ده يا on يا off مينفعش الإتنين مع بعض وعشان كده العمليات الحسابية اللي يقدر يعملها بتبقى محددة بين الإختيارين دول فقط

نيجي بقى للكمبيوتر الكمي .. قالوا إحنا عايزين نوصل لأصغر وحدة نقدر نخزن عليها بيانات .. وصلوا إن أصغر وحدة هي الإلكترون .. عشان نستفيد من خواص الإلكترون الكمية .. إيه خواصه الكمية دي بقى ؟

وقولنا إن الإلكترون له طبيعة موجية يعني ممكن يبقى في كل الأماكن في نفس الوقت كإحتمالات إلى أن يتم رصده وده اللي سميناه الـ ( Superposition – التراكب الكمي ) !! .. وممكن كمان يلف في إتجاهين في نفس الوقت !! يعني لو سألتك الكورة دي بتلف حول نفسها في أنهي إتجاه مقدمكش غير إختيار من إتنين ( مع عقارب الساعة أو عكس عقارب الساعة ) يعني بلغة الكمبيوتر يا صفر يا واحد .. لكن لو سألتك الإلكترون بيلف حول نفسه في أنهي إتجاه .. هنا لازم تحتار، لأن طبقاً لقوانين ميكانيكا الكم .. الإلكترون بيلف حول نفسه في الإتجاهين في نفس الوقت ومتقوليش إزااي .. يعني ممكن يبقى صفر وواحد مع بعض !

يعني الإختيارات اللي قدام الإلكترون بقت كتيررر جداً بين الصفر والواحد مبقتش صفر أو واحد .. وبالتالي يقدر يعمل كذا عملية في نفس ذات الوقت طبعاً الموضوع أعقد من كده بكتير لكن دي الفكرة ببساطة .. وساعتها الـ ( bit ) هتبقى إسمها ( Qubit ) إختصاراً لـ ( Quantum bit ) وده اللي العلماء عايزين يستغلوه .. لو قدرنا نصنع كمبيوتر يكون وحدة التخزين الأساسية فيه هو الإلكترون وقدرنا نستغل طبيعته الموجية العجيبة دي ، الكمبيوتر ده هيقدر يعمل عمليات حسابية معقدة جدااً منحلمش بيها أصلاً .. حسابات ممكن تاخد مننا مئات السنين عقبال ما نعملها .. هو ممكن يعملها في دقائق .

طيب ليه صعب جدااً إننا نقدر نعمل الكمبيوتر الكمي ده حالياً ؟؟ .. لأن المشكلة في الظروف المحيطة .. الأشعة الكونية أو الإشعاعات اللي في الجو اللي إنت مش حاسس بيها أو الإهتزازات البسيطة اللي بتحصل في الأرض ممكن تدمر الحركة الدورانية للألكترونات أو الدالة الموجية بتاعته اللي إحنا عايزينها ومشكلة تانية وهي عدم قدرتهم على التحقق من صحة نتائج عمل الكمبيوتر الكمي ده … ولكن التصور المبدئي للكمبيوتر موجود .. وفي شركات بدأت تعمل نموذج أولي منه قدرته لا تتجاوز عدة كيوبات – حسب ما قرأت – ولكن لسه محتاجين تعديلات كبيرة عليه . و يوم ما يوصلوا للجهاز ده بالشكل الأمثل ساعتها هيحصل إنجاز لم تشهد البشرية مثله قبلكده . 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: