أخبار عاجلة
الرئيسية / Blog / إيه قصة القنبلة اللي وقعت على اليابان سنة ١٩٤٥؟؟؟ وإيه أصل القنبلة الذرية معلومات شيقة جداااً👇🏻

إيه قصة القنبلة اللي وقعت على اليابان سنة ١٩٤٥؟؟؟ وإيه أصل القنبلة الذرية معلومات شيقة جداااً👇🏻

أكيد سمعت عن القنبلة اللي وقعت على هيروشيما و نجازاكي في اليابان .. و أكيد ليل نهار بتسمع عن صراعات الدول العظمى حول السلاح النووي و أسلحة الدمار الشامل 

طيب تعرف فكرة القنبلة دي إيه؟ و إيه اللي بيخليها تطلع كم الطاقة المدمرة الهائلة دي ؟ يعني يبقي العالم كله بيتخانق عشانها و إحنا منعرفش عنها حاجة!!

إسمحلي آخد من وقتك دقيقتين عشان تعرف إيه هي ( القنبلة النووية ) و فكرتها و بتتصنع إزاي ؟ و أنواعها إيه ؟ و إيه الفرق بين القنبلة الذرية و النووية و الهيدروجينية 

تعالى نبدأ بآخر سؤال ، هي في الأصل إسمها قنبلة نووية و دي نوعين ( الذرية و الهيدروجينية ) .

طيب أنا عايز أطلع طاقة نووية دلوقتي من ذرة معينة أعمل إيه ؟؟؟؟ 

قدامك طريقتين : 

1- الإنشطار النوووي.

2- الإندماج النووي .

1.الإنشطار النووي ، عايزك تتخيل الذرة اللي قدامك دي ست حامل وبعدين خلفت توأم ما شاء الله زي القمر .. بظبط ده اللي حصل ، نواة الذرة دي بتنقسم لنواتين أصغر منها زي بعض بظبط و مع الإنقسام ده بيطلع نيوترونات ..الذرة اللي إنقسمت دي بتكون مادة إسمها ( يورانيوم 235 ) هي إسمها كده

2. الإندماج النووي ، بيحصل إندماج بين ذرتين متشابهتين ، يعني عريس و عروسة هيتجوزوا و يخلفوا حاجة جديدة بيبقي فيه مثلاً هيدروجين و نظير الهيدروجين و يندمجوا سوا و يكونوا ذرة أكبر و هي الهيليوم أو نظيره ( يعني إيه نظير؟ حاجة شبهه بس في إختلافات بسيطة)  و بالمناسبة ده مصدر الطاقة الحرارية اللي بتجيلنا من الشمس  

المهم إن القنبلة الذرية دي بتعتمد على رقم 1 ( الإنشطار النووي ) 

و القنبلة الهيدروجينية بتعتمد علي رقم 2 ( الإندماج النووي ) .. عرفت الفرق بينهم ؟ 

ملحوظه هامة : عشان يحصل إندماج نوووي لازم يحصل الأول إنشطار نووي .. 

يعني الإنشطار بيطلعلنا الطاقة اللي محتاجينها عشان يحصل الإندماج النووي.

>>> إيه فكرة عمل القنبلة الذرية أو الإنشطارية ؟؟

وكأنن قدامك تربيزة بلياردو، هتجيب كورة من مادة ( يورانيوم 235 ) و هتجيب كورة تانية ( نيوترون ) .. و بيبقى في مولد كده بيطلع الكور بتاعه النيوترون ده 🙂 

فبيحصل الآتي : 

المولد يطلع نيوترون >>> النيوترون يخبط في اليورانيوم 235 >>> نتيجة التصادم نوات اليورانيوم تنشطر لنواتين أصغر منها و زي بعض و يطلع نيوترونات ، الإنشطار ده يطلع طاقة نووية هائلة و مش بس كده >> النيوترونات اللي طلعت ترجع تخبط في اليورانيوم تاني فالتصادم يزيد ف الطاقة اللي طالعة بتزيد لأن العملية عمالة تتكرر يعني 

طيب الطاقة دي بتطلع ليه ؟؟

الطاقة بتطلع نتيجة إن فرق الكتل بين الأنوية ( جمع نواة ) المنشطرة و بين اليورانيوم إتحول لطاقة . 

 يعني لو جبت ميزان و حطيت اليورانيوم 235 قبل الإنشطار في كفه و النواتين و النيوترونات اللي طلعوا من الانشطار حطتهم في كفة تانية المفروووض نلاقيهم قد بعض .. بس ده مش بيحصل بنلاقي فرق في الكتل بين الكفتين . طيب الفرق ده راح فين ؟؟ بيتحول لطاقة طبقاً لمعادلة اينشتاين اللي بتقول ( E= mc^2 ) يعني فرق الكتله البسيط ده بيتضرب في (مربع سرعة الضوء) و ده رقم مش عايز أكتبهولك عشان متتخضش وبيتحول لطاقة كبيرة جداااااً 

دي الفكرة العامة للقنبلة دي 🙂 … اللي حابك تعرفه إن القنبلة الذرية دي ليها نوعين : 

‏1- Gun-triggered

 و دي اللي أطلقت على هيروشيما في اليابان و خسفت بيها الأرض سنة 1945 

‏2- Implosion-triggered  

و دي اللي أطلقت على نجازاكي في اليابان في نفس السنة 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: