أخبار عاجلة
الرئيسية / Blog / (( إيه هو أول شيء عايز تنجزه في الأجازة، وهتكون راضي عن نفسك لو أنجزته ؟ )) 

(( إيه هو أول شيء عايز تنجزه في الأجازة، وهتكون راضي عن نفسك لو أنجزته ؟ )) 

من الجُـمل الـرائعة اللي قالها الكاتب Tyler May : 

‏( when you’re hitting a wall , focus on one brick ) ! 

لو كنت بتضرب في حيطة وعايز تهدها ركز في طوبة واحدة !  

.

يمكن ده أكبر خطأ بنـقع فيه كل ما ناخد أجازة .. الواحد بيبقي خارج من كبت امتحانات وعايز يكسر الدنيا زي كل سنة ^^ .. طيب ليه مش بيكسر الدنيا ؟ 

من وجهة نظري لانه ببساطة مشتت .. عايز يعمل حاجات كتير مع بعض .. زي اللي ماشي علي طريق طويل ووقف عند مُفـترق طُرق وقدامه طرق كتير أوي .. والمشكلة إن في نهاية كل طريق في حاجة كويسة هتفيده .. فيفضل محتار وواقف عند مفترق الطرق ده مبيتحركش وعمال يفكر ! 

وهو واقف يجي واحد من وراه محدد طريق معين مشي فيه ووصل وخد الحاجة الكويسة اللي في النهاية ورجع تاني ودخل في طريق جديد .. وصاحبنا لسه واقف محتار ومشتت وعمال يفكر !

ووقت ما قرر يختار طريق مشي نُصه وبعدين زهق وقال لا أنا اخترت غلط ، الطريق التاني علي فكرة كان أفضل وكان هيفيدني أكتر. فيرجع تاني ويدخل طريق تاني يزهق في نصه .. يكون الراجل اللي عدا من وراه خلص أغلب الطرق. 

.

علي فكرة ده إحنا .. بنطلع من كبت الامتحانات عايزين نخس ونلعب رياضة ونتعلم رسم وعزف وبرمجة ونحسن الانجلش وناخد كورسات وووو .. نشوف بوست مليان لينكات نعمل منشنز كتيير ونسيفه ونكتب البوست الفظيع .. نقلب شويه نلاقي بوست أفظع منه نسيفه .. وينتهي الحال بقعدتنا قدام اللاب لحد ما اليوم يضيع ويوم يجُر يوم نلاقي الأجازة خلصت ! 

.

أغلبنا – إلا من رحم ربي – عامل زي المريض اللي يروح يكشف وياخد الروشتة ويجيب العلاج يحطه في البيت وينزل تاني يوم يكشف تاني .. يجيب علاج ويحطه جنب الباقي وهكذا !

ويستغرب في الآخر هو ليه مبيخفش !! 

.

ممكن بقي الأجـازة دي كفاية ؟ .. كفاية تسييف في بوستات وخلاص! ركز في حاجة واااااحدة بس هتعملها في الأجازة دي .. لو ركزت في حاجة واحدة صدقني هتعمل بوست أفظع من الفظيع 

.

الـ 3 شهور بتوع الأجازة دول كافيين انك توصل لمستوي كويس في أي حاجة هتبدأها بس المهم تستمر عليها وتركز عليهااا فقط. 

.

قول مثلا الأجازة دي أنا هركز علي الإنجلش بتاعي بس ، بس .. كل يوم هحاول أحسن منه علي قد ما اقدر بشتى الطرق .. هروح اخد كورس ، هتفرج علي افلام ، هسمع فيديوهات ، هروح السفارة الأمريكية اتكلم مع أي حد، هقرأ روايات انجلش .. إلخ .. اتشقلب من الآخر 😀 

.

قول هبدأ اتعلم مثلا أساسيات علم معين، والـ 3 شهور كافيين جدًا جدًا .. هتعلم لغة برمجة واحدة وأتقنها .. هتعلم أساسيات الفيزياء، الكيمياء، علم النفس، الفلسفة، الفلك .. أي علم. 

.

بعد ما تقرر، تاني خطوة علي طول – قبل ما تبدأ – إنك تدور في المحيط حواليك علي حد يشجعك علي الهدف ده .. حد عنده نفس الرغبة إنه يعمل نفس الحاجة، عشان أما تزهق في نص الطريق تلاقي اللي يزقك ويشجعك، تلاقي اللي يرجعلك الحماس اللي كان عندك في أول الطريق عشان تتغلب علي تاني أصعب مشكلة بتقابلك وهي الكسل . 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: