أخبار عاجلة
الرئيسية / Blog / ازاي بيقيسواالمسافه بينا وبين النجوم ؟؟

ازاي بيقيسواالمسافه بينا وبين النجوم ؟؟

هما بيقيسوا المسافة بينا و بين النجوم اللي في السما دي إزاي ؟؟! 

بيطلعوا رائد فضاء و معاه متر مثلاً و إحنا نمسك المتر من هنا و يقيس ؟ 

سؤال إتكرر كتير و لطيف فتعالوا نلقي نظرة عليه 

طيب هو قياس المسافة بينا و بين النجوم له 3 طرق على حسب بُعد النجوم دي عننا ..؟؟

في البوست ده أنا هقول طريقة منهم و دي الطريقة اللي بنقيس بيها المسافة بينا و بين نجم بعيد عننا بكام ألف سنة ضوئية بس 

لا بص إعدل نفسك كده عشان الكلام اللي جاي بسيط بس محتاج تركيز 

إنت هتجيب صاحبك يقف قدامك و تكون وراه حيطة متعلق عليها ساعة .. و إنت هتوقفه قدام الساعه بالظبط . 

لو إنت إتحركت يمين شويه و بصيت على صاحبك مش هتلاقي الساعة وراه بالظبط صح ؟ هتلاقي مكانها إتغير و بقت على يمينه !! .. لا هو مكانها متغيرش ده بسبب إختلاف منظورك لصاحبك 

أديك مثال تاني مادام تنحت ، هات قلم و وإمسكه قدامك دلوقتي و بص عليه 

غمض عينك اليمين و بص عليه و بعدين فتحها و غمض عينك الشمال وبص عليه و أعد غمض واحده و فتح واحده و إنت باصص عليه ، هتحس بإيه ؟؟ .. هتحس إن القلم بيتحرك صح و مكانه بيتغير 

متقلقش إنت محولتش إنت كويس الفكرة في إختلاف المنظور بتاعك للقلم .. 

عشان كده الطريقة دي إسمها ( إختلاف المنظور النجمي – Trigonometric parallax ) 

زي ما إحنا شايفين في الصورة .. كوكب الأرض المفروض بيلف حول الشمس لفه كاملة في السنة  

في أول السنة – في الصيف يعني – بنكون لسه في أول اللفة و بالتالي بنكون على أحد جانبي المدار اللي بنلف فيه حول الشمس .. و بعدين نبدأ اللفة .. 

بعد 6 شهور – يكن الشتا دخل – هتكون الأرض لفت نص لفة فـالمفروض نكون على الجانب الآخر فوق .. تمام كده ؟ 

إحنا بقى في أول السنة هنبص على النجم اللي عايزين نقيسه بزاوية معينة ولنفترض إنها ($ ) و هنفترض البُعد النسبي أو المسافة بيننا و بينه ( X ) مثلا ً

و بعد 6 شهور لما نكون وصلنا للنص التاني من المدار حول الشمس هنبص على النجم تاني بزاوية ( & ) و البُعد بيننا و بينه بردو ( X ) متغيرش .. صح كده 

* إنت كده كأنك بصيت بعنيك اليمين مره و بعنيك الشمال مره ، أو بصيت على صاحبك من قدامه مره و تحركت يمين و بصيت عليه تاني ،، 

ببساطة شديدة و بإختصار ، إنت كده كونت مثلث متساوي الساقين يا برنس بتاع 4 إبتدائي 

معاك زاويتين إنت عارفهم ($) و (&) اللي هما قد بعض أصلاً ( من تساوي الساقين ) و في أجهزة و تليسكوبات بتحسب زاوي ميل ضوء النجم ده يعني .. و معاك المسافة إنت عارفها ، اللي مشيتها اللي هي قطر المدار اللي إحنا بنلف فيه اللي فرضناه في الصوره ، الضلع (L) .. خلصت يا برنس 

أي واحد في إعدادي و درس حساب المثلثات و إديته مثلث فيه زاويتين و ضلع واصل بينهم هيقدر يجيب أطوال المثلث و زاواياه كلهم .. يعني هيقدر يحسب طول (X) 

و بكده هنقدر نحسب المسافة بيننا و بين النجم 

بس يا سيدي

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: