أخبار عاجلة
الرئيسية / Blog / ازاي تنظم وقتك؟؟؟ كلام مهم جدااً عن كيفية تحقيق الأهداف 👇🏻

ازاي تنظم وقتك؟؟؟ كلام مهم جدااً عن كيفية تحقيق الأهداف 👇🏻

بزهق بسرعة .. كل ما أبدأ في حاجة مبكملهاش .. إقرأ بوست عن كورس معين أو كتاب معين وأتحمس أوي وأبدأ فيه وبعدين مكملهوش .. بعمل جدول عشان أذاكر وإحترم نفسي ومش بستمر وبيترمي ف الزبالة .. عندي كمية بوستات مسيفها تخلي أي حد يبقي زويل بس مبفتحهاش .. كل رمضان بيبقي عندي طاقة وحماس إني أكسر الدنيا وأعمل حاجات كتير أوي .. بس يومين والحماس بيقل لحد ما يختفي وبرجع لحالة الخمول والأيام اللي شبه بعضها.

كان عندي إمتحان تاني يوم، أقسم بالله ما كنت أعرف كلمة ف المادة والوقت جري والساعه بقت 7 بالليل وأنا لسه مبدأتش وبدأت أتوتر وإحتست ومش عارف أعمل إيه وقولت خلاص في الغالب هشيل المادة دي، طب أعمل إيه ؟؟ لبست وإتصلت بصاحبي وقولتله أنا جايلك دلوقتي ! قالي تعالى وبات عندي . روحتله وجهزنا المكان والورق وبدأت معاه المادة الساعة 8 ونص تقريباً وقولنا إحنا هنذاكر نص ساعة بالظبط ونفتح الفيس ربع ساعة تمام إقفل بقى الموبايل ده خالص .. وعملنا كده فعلاً …. ومن غير ما نحس خلصنا المنهج كله الساعه 2 ونص تقريباً وإتفرجنا على فيلم أجنبي كمان. ونجحنا في المادة الحمد لله 

التجربة دي إستفدت منها كذا حاجة وطلعت بكذا حل للمشكلة اللي أغلبنا بيعاني منها :

1. قسم الهدف بتاعك لمهمات صغيرة .. صغيرة أوي لدرجة إنك متحسش بمشقتها .. عايز تبدأ كورس، خصص كل يوم 10 دقايق بسس للكورس ده وباقي اليوم إعمل اللي عايزه 

عايز تحفظ قرآن خصص 5 آيات بس كل يوم .. عايز تخلص كتاب .. خصص 10 دقايق بس قبل النوم للقراءة فقط .. أو هلعب رياضة لمدة 3 دقايق بس أول ما أصحى .. هتعلم لغة ، كل يوم هتفرج على فيلم أجنبي بس والترجمة تكون إنجلش .. أو كل يوم هكلم صحبي لمدة خمس دقايق بالإنجلش بس ونكمل الهري اللي بنقوله براحتنا…. وهكذا 

2. إخلق لنفسك مصدر للدوبامين .. 

الدوبامين هو هرمون السعادة وتجار المخدرات بيدخلوا منه نسبة كبيرة في المخدرات وهو اللي بيخليك تدمن الفيس ومش قادر تبعد عنه لأنك لما بتكتب بوست بتلاقي لايكات على طول وده بيفرحك أو تقرا بوست أو كوميك يفرحك وده يديك جرعة دوبامين ..  

وهو اللي بيخليك بتحب الكورة وبتشجع فرقتك لأنها لما بتكسب إنت بتفرح وده بيديك جرعة دوبامين محترمة . 

إخلق لنفسك هدية بتفرحك بعد ما تنجز شئ معين.. لو خلصت شابتر من الكورس ده أو ذاكرت نص ساعة أو قريت جزء من كتاب .. هفتح الفيس مثلاً أقعد عليه نصايه .. هنزل أتمشى .. هنزل أشرب عصير قصب أو آكل شاورما أو بيتزا .. هتفرج على فيلم ، أي حاجة .. ده هيحفز عقلك إنه ينجز الشئ ده عشان ياخد الجرعة بتاعته.  

3. دور على حد يشجعك .. حد تتنافس معاه وعنده نفس رغبتك وأكيد هتلاقي .. حط نفسك وسط الناس اللي عندها أهداف مشتركة وهتطلعك قدام .. مش وسط الناس المحبطة اللي تكرهك في عيشتك اللي مش فالحة غير في الإنتقاد و الندب وبس ، أكيد هتلاقي صاحبك اللي عايز يقوي لغته .. اللي عايز بردو ياخد نفس الكورس .. أو يقرا الكتاب ده أو يشوف الفيلم الوثائقي ده .. إعملوا الخطة سوا وإمشوا عليها .. لو كنتوا كتير إعملوا جروب هدفه شئ معين تشجعوا بعض عليه ، جروب مثلاً تتكلملوا فيه كلكوا بالإنجلش . أو جروب تتناقشوا فيه عن كورس معين هتبدأوه سوا، دايماً الإنسان بيحب اللمة بيحب الناس تبقى حواليه تشجعه وتقوله كلام إيجابي يحفزه إنه يكمل .  

4. إبعد عن المشتتات .. إعرف كده ( ملتفت لا يصل ) .. الوقت اللي إنت خصصته إنك تعمل حاجة معينة خلاص يبقي الوقت ده مقدس .. ممنوع تعمل أي شئ تاني معاها .. أو تسرح في حاجة تانية تشتت بيها نفسك . 

5. متسوفش .. متقولش بعدين ..لما أفضي .. لما آخد الأجازة .. لما أتخرج .. لما أتجوز .. لما أسافر .. طول ما أنت بتقول ( لما ) إعرف إنك مش هتعمل حاجة .. هل أما بتجوع بتقول هاكل لما أفضى ؟ هل لما بتبقى هتموت وتنام بتقول هنام بعدين؟ .. لو إنت جعان و محتاج تعمل الشئ ده فعلاً زي مانت محتاج للأكل والشرب والنوم هتخلقله وقت متضحكش على نفسك.

أنا عارف منظر البوستات اللي إنت مسيفها مش لازم توصفلي .. مليانة مواقع تحفة وكورسات ومنح وكتب وروايات وأبحاث وحاجات لووز.. وإنت فضيت كتير، هل فتحتها ؟ 

بالله عليك خد قرار إنك مش هتسيف حاجة وتركنها من النهاردة .. مش هتسوف .. لو في حاجة نفسك تعملها، إعملها دلوقتي حالاً .. لأنك مش ضامن بكرة في إيه. إعملها عشان لما تحط راسك ع المخدة تبقى مرتاح نفسياً وعلي وشك إبتسامة رضا إنك عملت حاجة مفيدة وإن النهاردة مش زي إمبارح وبكرة مش هيبقى زي النهاردة.

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: