أخبار عاجلة
الرئيسية / Blog / التئام الأوزون ..

التئام الأوزون ..

فكرة عبقرية من الطبيعة الربّانية .. ! 

من كام يوم كده انتشر خبر مُفرح في كل الجرائد والمجلات العلمية العالمية في جميع أنحاء العالم بعنوان 

(ثقب الأوزون بدأ يلتئــم) !! 

الخبر بيقول أن باحثين في معهد ماساتشوستس للتكنولوجيا (MIT) – متحاولش تنطق اسمه هتتعب 😂 – نشروا ورقة بحثية في مجلة Science الأمريكية الشهيرة 

أن في سبتمبر اللي فات تقلصت مساحة ثقب الأوزون بمقدار 4 مليون كيلومتر مربع !!! وان في دلائل علي ان طبقة الاوزون استقرت والحمد لله وفي طريقها إلي الإلتئـام ، وعملوا محاكاة معلوماتية كده والتقديرات وضحت أن ثقب الأوزون هيلتئم تماما بحلول 2050 

.

في الحقيقة طبقة الاوزون دي هي فكرة عبقرية فعلا ، ولأن معلوماتنا عن الطبقة دي هي الجملة بتاعة 5 ابتدائي إنها ( بتحمي الأرض من أشعة الشمس الضارة ) 

فاسمحلي اخد من وقتك دقيقتين نعرف فيهم فكرة طبقة الأوزون دي عبارة عن إيه ؟ وإيه أشعة الشمس الضارة دي؟ وبتحمينا منها ازاي؟ وازاي ثقب الأوزون ده اتكون أصلا ؟ تمام 😀

باختصار طبقة الاوزون دي جزء من الغلاف الجوي للأرض، تحديداً في الجزء السفلي من طبقة الستراتوسفير، سُمكها حوالي من 3:5 ميللي متر .. ليه اسمها كده بقي ؟ .. عشان بتحتوي علي نسبية كبيرة من غاز الأوزون مش محتاجة فكاكة 😀 

كلنا عارفين أننا بنتنفس أكسجين .. وكلنا عارفين ان غاز الأكسجين عبارة عن ذرتين أكسجين متحدتين مع بعض وبنكتبه ديما في الكيمياء ( O2 ) 

أهو غاز الأوزون ده بقي علي عكس ماحنا متعودين في الطبيعة هو عبارة عن ( O3 ) أو تلت ذرات أكسجين متحدين سوا .. ازاي ؟ 

الفكرة أن الأشعة فوق البنفسجية لما كانت بتنزل على جزئ الأكسجين العادي بتفصل ذرتين الأكسجين دول عن بعض ويبقوا نشطين جدا جدا وسارحين في ملكوت الله .. يقابلوا في طريقهم جزئ اكسجين فيرتبطوا بيه ويتكون جزئ الأوزون .. يا أهلا وسهلا . 

الشمس بقي زي ماهي بتدفينا وبتنورلنا حياتنا كده هي بتصدر كمان انواع كتير من الاشعة زي اشعة اكس وجاما واشعة فوق بنفسجية و .. استووب هير ! 

اهو الأشعة فوق البنفسجية – UV waves دي وجدوا انها ممكن تسبب حروق للجلد وكمان بتضر الحمض النووي DNA في الجسم وبتسبب ضرر في العين ، والاخطر انها بتسبب سرطان الجلد .

تيجي بقي الأشعة دي تنزل علي كوكب الارض تخبط في جزئ غاز الأوزون اللي ف الغلاف الجوي هوب دابل كيك تفصل الـ 3 ذرات اكسجين دول لـذرتين اكسجين – ويتكون جزئ اكسجين عادي اللي عارفينه – وذرة اكسجين نشطة جدا وحيدة >> ذرة الاكسجين الوحيدة دي أول ما تلاقي جزئ اكسجين عادي تمسك فيه فترتبط بيه >> ويتكون جزئ الأوزون تاني .. يا أهلا ومرحبا 😀 

وتفضل الدورة دي مستمرة ، وبكده الأوزون هيفضل يمتص الاشعة الضارة دي وعمره ما هيخلص لانه كل ما جزيئاته تنفصل او تتفكك هترجع تتكون تاني .. ودي عبقرية الفكرة وابداع الخالق سبحانه وتعالي :)) 

.

طيب امال ثقب الأوزون اللي فوق القطب الجنوبي ده اتكون ازاي ؟؟ قولتلي ازاي 

بسببنا حضرتك ^^ .. المصانع والعربيات والبيوت والبلاوي بتاعتنا بتطلع غازات مضرة جدا منها غاز( الكلوروفلوروكوبون CFC ) أو المعروف بـاسم (الفريون) اللي بنستخدمه عادة في التلاجات والتكييفات وغيرهم .. الغاز ده يا سيدي بيحتوي علي الكلور في تركيبه، اما يطلع فوق لحد ما يوصل لطبقة الأوزون >> تخبط فيه الأشعة فوق البنفسجية بطاقتها العالية اللي جاية من الشمس >> فيقوم يطلق ذرة كلور في الجو >> ذرة الكلور لما تتمشى لوحدها كده تلاقي جزئ الأوزون في وشها تقوم سارقة منه ذرة الاكسجين التالتة اللي عنده ، وبكده غاز الأوزون هيرجع غاز اكسجين عادي، طيب وهتودي الذرة اللي سرقتها دي فين؟ تروح تدور علي ذرة اكسجين نشطة وحيدة زي اللي قولنا عليها فوق تديهالها وبكده تكون جزئ اكسجين عادي تاني ويا بخت من وفق راسين ف الحلال .. يعني م الاخر الاخت كلور ماشية في طبقة الاوزون تفكك فيها و تدمر جزيئاته وتحوله لاكسجين عادي .. وده اللي أدي لتكون ثقب الأوزون 

.

في الحقيقة هو مش ثقب فعليا بل هو منطقة فوق القطب الجنوبي نسبة الأوزون فيها قليلة او سُمك الطبقة قليلة .. ومساحة المنطقة دي حوالي 27 مليون كيلومتر مربع !! والخبر قال ان المساحة دي قلت 4 مليون في سبتمبر اللي فات بسبب ان البشر بدأت تقلل استخدام الغازات دي وأهمها الفريون وحصل تجديد في الغلاف الجوي .. عموما ده شيء مبشر جداً ويدعوا للطمأنينة :)) 

بس يا سيدي .. فلو لاقيت حد بيقول الكون ده اتوجد صدفة او من لاشيء ماتردش عليه لو سمحت ! 

..

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: