أخبار عاجلة
الرئيسية / Blog / الثبات النسبي …هل إنت ثابت في مكانك دلوقت ؟؟؟؟

الثبات النسبي …هل إنت ثابت في مكانك دلوقت ؟؟؟؟

– هل إنت ثابت في مكانك دلوقتي ؟

= أكيد ثابت أومال شايفني بتنطط قدامك !!

– لا ده إسمه ثبات نسبي .. إنت ثابت بالنسبة للأجسام اللي حواليك

يعني لو في رائد فضاء باصص عليك دلوقتي هيشوفك بتتحرك بسرعة 1674.66 كيلو متر في الساعة !! أها والله لأن دي سرعة دوران الأرض حول نفسها ..

ولو بِعد أكتر هيشوفك بتتحرك بسرعة 29850 متر كل ثانية !! لأن دي سرعة دوران الأرض حول الشمس .

= أومال أنا مبحسش بالحركة دي ليه ؟

– بص يا سيدي، لسببين :

1_ إحنا كبشر مبنحسش بالسرعة الثابتة .. يعني لو إنت راكب أتوبيس أو طيارة بتتحرك بسرعة ثابتة هتحس إنك ثابت ! رغم إن الأتوبيس ماشي بسرعة كبيرة، بتحس إمتى إنه بيتحرك ؟؟ لو جه مطب و فرمل فتروح لابس في اللي قدامك أو زود السرعة مرة واحدة فتلبس في اللي وراك أو لف يمين فتروح مايل شمال والعكس ، وده بسبب القصور الذاتي .

إذن إحنا بنحس بس بالعجلة ( يعني تغير السرعة أو الإتجاه )، لكن السرعة الثابتة مش بنحس بيها

و ده السبب إننا مش بنحس بدوران الأرض لأن الأرض بتلف حول نفسها وحول الشمس بسرعة ثابتة ، وإحنا مش بنحس بالسرعة الثابتة دي بسبب قوة الجاذبية الأرضية اللي شدانا كلنا، ودي اللي بتخلينا نُعتبر جزء من الشئ اللي إحنا فيه.

يعني لو ركبنا أتوبيس، بسبب الجاذبية اللي شدانا للأرض ومثبتانا هنُعتبر جزء من الأتوبيس زينا زي الكرسي بالظبط بنتحرك بنفس سرعته و بالتالي مش بنحس بيه

و كذلك بسبب الجاذبية الأرضية اللي شدانا لسطح الأرض فبالتالي إحنا جزء لا يتجزأ من الكوكب و بنلف معاه بنفس السرعة من غير ما نحس .

2_ إنت مش هتقدر تدرك حركة الأتوبيس حتى لو بيتحرك بسرعة ثابتة إلا من خلال مؤثر خارجي .. لازم تقارن موضعك بموضع جسم آخر بيتحرك بسرعة مختلفة عنك .

 بمعنى لو إنت دلوقتي راكب طيارة و ماشية بسرعة ثابتة ومش بتتهز ومفيش شبابيك حواليك تبص منها .. هتعرف تخمن الطيارة دي ثابتة ولا بتتحرك ؟؟ مستحيل !

لازم ساعتها تبص من الشباك و تقارن نفسك بالأماكن اللي حواليك عشان تدرك إنك بتتحرك

هتلاقي سحاب حواليك سرعتها مختلفة عنك ساعتها هتدرك إنك بتتحرك

كذلك لو في أتوبيس وماشي بسرعة ثابتة أهو بس لو بصيت من الشباك و لاقيت ناس ماشية في الشارع سرعتهم مختلفة عنك ، ساعتها هتدرك إنك بتتحرك

لكن إفرض إنت راكب عربية وماشي على الصحراوي بسرعة 30 كيلوفي الساعة مثلاً .. وجت عربية مشيت جنبك بنفس السرعة .. ساعتها إنت بتحس إن العربية اللي جنبك دي ثابتة صح ؟

ساعتها بتحس إنت كمان إنك ثابت وهي ثابتة بالنسبة لك .. و ده لأنك قارنت موضعك بموضع جسم آخر بس بيتحرك بنفس سرعتك فمحستش بحاجة بردو .

يعني الخلاصة :

– إحنا مش بنحس بسرعة دوران الأرض لأن سرعتها ثابتة وإحنا مش بنحس بالسرعة الثابتة بسبب قوة الجاذبية الأرضية

– و مش بنحس بسرعة دوران الأرض لأننا مش بنقارن نفسنا بجسم تاني خارج الكوكب، لأننا بندرك حركتنا لو قارننا موضعنا بموضع جسم آر سرعته مختلفة عننا.

النسبية مش بس في الفلك النسبية دي في حياتنا كلها، يعني رأيك فيا دلوقتي رأي نسبي .. ممكن واحد غيرك يشوفني حاجة تانية خالص ، ممكن إنت تقرا كتاب تشوفه جميل جداً وأنا أشوفه رخم ،

فلو إنت مدرك النسبية دي كويس هترتاح في حياتك جداً وهتلاقي عندك القدرة على تقبل الآراء المختلفة بصدر رحب ..))

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: