أخبار عاجلة
الرئيسية / Blog / الخطوات دي لو إتعملت هيتصلح حال التعليم …كلام مهم جدااً وياريت يتنفذ👌🏻

الخطوات دي لو إتعملت هيتصلح حال التعليم …كلام مهم جدااً وياريت يتنفذ👌🏻

بلدنا مش هيتصلح حالها غير لما تعليمنا يتصلح حاله .. 

و تعليمنا مش هيتصلح حاله غير لما الـ 10 حاجات دول يتعملوا مبدئياً : 

1- نلغي نظام تنسيق الثانوية العامة فوراً، والتعيلم يبقى غرضه التُعلم مش سباق و توتر أعصاب وضغط نفسي، و القبول في الكليات بناءاً على اختبار قدرات فقط، و ده هيكون حافز للطلبة عشان تنمي قدراتها في المجال اللي #حبااااااه وعايزه تدرسه أيًا كان خلال المرحلة الثانوية وما قبلها، غير إنه هينسف المفهوم المتخلف المسمى بكليات القمة اللي إتزرع في عقول كتير من الآباء و الأمهات و بعض الطلاب للأسف! مفيش حاجة إسمها نص درجة في قصة العربي تضيع مستقبلي

2- يكون مرتب المُعلم هو أعلى مرتب في الدولة، و مش هذكر في النقطة دي أكتر من موقف مطالبة ((القضاة)) في ألمانيا بماساوة مرتباتهم بالمعلمين! ليأتي الرد المُفحم من ميركل ((كيف أساويكم بمن علموكم ؟!!)) 

3- يُعاد تأهيل المُعلم من الناحية العلمية والتربوية و الأهم من الناحية التكنولوجية ونتأكد من إطلاعه على طرق التدريس الحديثة بإستخدام التكنولوجيا لكسر الحاجز النفسي بين الطالب والكتاب المدرسة العقيم! 

4- وضع قوانين صارمة لطبيعة المعاملة بين الطالب و المُعلم و تشكيل لجنة رقابة على المدارس بصفة دورية وتركيب كاميرات مراقبة في كل مدرسة و كلية لمراقبة سير العملية التعليمية ورصد أي تعدي أو تقصير من أي فرد من المنظومة من أول المدير/العميد حتى عامل النظافة. 

5- تشكيل لجنة من نخبة من علماء مصر داخل مصر و خارجها لوضع مناهج علمية مواكبة للعصر اللي عايشين فيه (مش مناهج جار عليها الزمن ) 

و خاصة مناهج و أساليب تعلم (( اللغات و الكمبيوتر )) لأن دول سلاحي العصر اللي إحنا فيه ، و إضافة مناهج تعليمية خاصة بمهارات التعلم و الـ (Soft skills) و كيفية إدارة الوقت ومهارة الإلقاء وغيرها من المهارات اللي بتكون مُدمرة عند الطالب المصري اللي همه يخش يصب المعلومات اللي في دماغه في ورقة و ينساها أول ما يخرج! ،

و إضافة مادة التربية الدينية في المجموع (مفيش حاجة اسمها مادة نجاح و سقوط فقط) 

6- وضع صندوق في كل مدرسة و كلية يُفتح مرة كل شهر بعلم من لجنة الرقابة، لتلقي أي شكوى من الطلاب إذا حصل أو إعتداء لفظي أو جسدي عليهم ( مدرس مثلاً هيسقطهم عشان مبيخدوش معاه درس .. الخ ) .. أو شكوى من امتحان ما أو لو عندهم إقتراحات لتطوير المنظومة التعليمية، و الشكاوى أو المقترحات يُنظر فيها بحد أقصى شهر من تاريخ فتح الصندوق 

7- مشاركة الطلاب في المسابقات العلمية اللي يشوفوا فيها تطبيق العلوم اللي بيدرسوها قدام عنيهم، مش بس كده لا يعملوا مشروع يطبقوا فيه الأسس العلمية اللي اتعلموها .. عملاً بالمقولة العظيمة لكونفوشيوس 

((( قل لي وسوف أنسى، أرني وقد أتذكر، أشركني و سوف أفهم )))، و مشاكرتهم في المؤتمرات العلمية و نخليهم يتناقشوا و يطلعوا الأفكار والمواهب اللي عندهم ويبدأ المسؤلين يبحثوا إزاي ينموا المواهب دي وإزاي يستغلوا الأفكار اللي هتطُرح، ومشاركتهم في المسابقات الرياضية اللي المدارس هتنظمها بشكل دوري.  

8- مفيش نتايج امتحانات هتتعلق في العلن! الغرض من التعليم مش فضح نقاط ضعف الطلاب قدام زملاءهم و إنقاص ثقتهم بنفسهم !.. لذلك وزارة الإتصالات هتصمم موقع رسمي تبع وزارة التربية والتعليم وكل طالب هيتوزع عليه رقم سري .. في نهاية كل سنة، كل طالب هيدخل الموقع برقمه السري و يعرف درجاته ويعرف إيه المواد اللي نقص أو سقط فيها ونلزم مُعلم المادة اللي سقط فيها (غير مُعلمه الأساسي اللي درسله الترم) إنه يشرح كورس المادة للطالب في الأجازة.

بالإضافة إن هيكون في إستبيان أو Feedback لكل طالب هيملاه في نهاية كل سنة في سرية تامة عن رأيه في كل مُعلم درسله وفي المنهج اللي درسه ( مع عدم ظهور نتيجة الطالب قبل ملئ الإستبيان ) 

9- إعادة هيكلة الكتب المدرسية بالإستعانة بمن لديهم القدرة على تبسيط العلوم .. لتخفيف جفاء المادة العلمية و تقريبها من اللغة اللي بيفهمها الطالب و يكون في تنظيم أكتر و ألوان وكل حاجة.. بجانب الكتاب المدرسي هيتعمل فيديوهات شرح مصورة وتنزل على اليوتيوب بإستمرار .. وده هيقفل باب شراء الكتب الخارجية بتاتاً. 

10- إلغاء النظام اللي بينص على إن الطالب الأعلى في التقدير يتعين معيد في الكلية .. أقسم بالله العظيم في فرق شاااااسع بين الدحيح اللي بيعرف يذاكر وعنده قدرة على تحصيل العلم و بين اللي عنده قدرة على توصيل العلم بأسلوب مبسط . (بلدنا محتاجة مُعلمين أكتر ما محتاجة علماء) !! قبل تعيين أي معيد في أي كلية يخضع لإختبار قدرات، لإختبار قدرته على توصيل المعلومة بأسلوب سلس بسيط واختبار قدرته على الإلقاء أم لا، لو سقط يبقى بالسلامة عشان ميدمرش أجيال جاية 

ويقام في السنة الأخيرة زي مسابقة بين الطلاب لإكتشاف الطلاب اللي عندهم القدرة على تبسيط العلوم لأقصى حد وبعد التصويت للفائزين يكون الجائزة هي التعيين في الجامعة (بحد أدنى التقدير العام يكون جيد). 

البلد دي مش هتطلع خطوة لقدام إلا لما نظام التعليم بتاعها يخلق جيل يتنفض من ع السرير كل يوم و يجري ع المدرسة أو الكلية عشان يطلب العلم مش يطلب الدرجات ! غير كده لو شيتلوا و جبتوا 1000 رئيس و حكومة و إستفتيتوا على عشروميت دستور مش هتتعدل ، كفايه بقى نقعد نشيل وش القهوة و سايبين البن اللي راقد في القاع !!  

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: