أخبار عاجلة
الرئيسية / Blog / السبب الأساسي خلف اشتعال الشمس حتي الآن من حوالي 4.6 مليار سنه ..

السبب الأساسي خلف اشتعال الشمس حتي الآن من حوالي 4.6 مليار سنه ..

طيب 😀 مبدئيا السؤال ده جالي من ولد في 6 ابتدائي .. تمام ؟

بيقول : احنا خدنا في المدرسه ان مينفعش حاجه تشتعل من غير اكسجين ، طيب الشمس ازاي مشتعله من ملايين السنين في الفضاء من غير اكسجين ؟ ايوا عارف ان فيها نسبة اكسجين بسيطه جدا لا تتعدي الـ 1% و ده مش كفايه انه يخليها تشتعل و تطلع الطاقه الحرارية الهائلة دي من ملايين السنين و حتي الان ؟ 😀

فعلا يا جماعه من شروط احتراق اي شئ وجود اكسجين يعني لو في شقه بتولع و قدرت تمنع عنها الاكسجين هتطفي 😀 و فعلا نسبة الاكسجين في الشمس لا تتعدي الـ 1% و دي ببدأ اول شراره بس ،

يعني و يكأنك بتزق عربيه عشان تدور ، الزق بتاعك مش هيمشيها علي طول انت يادوب هتديها زقه بس و بعدين المحرك يدور و يحركها 😀 .. اهي نسبة الاكسجين البسيطه دي هي الزقه ، طيب فين المحرك بقي ؟؟

المحرك أو السبب الأساسي اللي مخلي الشمس مشتعله حتي الان من حوالي 4.6 مليار سنه ( و ده تقدير العلماء لـعُمر الشمس ) و لسه مستمره في اشتعالها هو

(( الاندماج النووي )) اللي بيحصل في الشمس  ..

اهم معلومه عن مكونات الشمس و اللي أغلب الناس عارفاها انها بتتكون من غازين أساسيين :

الهيدروجين و الهيليوم ، و دول اللي بيشغلوا حوالي 98% من حجمها

حلو اوي ، إيه بقي اللي بيحصل جوا الشمس ؟ O.o

هيجي ذرتين هيدروجين ملو هدومهم كده كل ذرة منهم كتلتها و لتكن 2 جرام مثلا .. اوكيشن ؟؟؟

واحده هتقول للتانيه بصي بقي الاتحاد قوة .. طب نعمل ايه ؟

احنا نتحد سوا و نبقي شخص واحد .. و نغير اسمنا ده زهقنا منه .. طيب نسمي نفسنا ايه

ايه رأيك في هيليوم ؟ اسم حلو و موضه الايام دي … خلاص توكلنا علي الله 😀

بس ثواني احنا كل واحد مننا كتلته 2 جرام و إحنا 2 .. كده لما نبقي شخص واحد هيبقي كتلته 4 جرام و هنتخن :/

هنتخن يعني ؟؟ مانتخن ، المهم نبقي كده

المهم لما اندمجوا و بقوا شخص واحد ، أو ذرة واحده اسمها هيليوم لقينا كتلتها مطلعتش 4 جرام !!

دي طلعت أقل !!! لا انزلوا الصيدليه اوزونوها تاني .. مفيش فايده وزنها فعلا أقل حوالي 3 جرام

يادي النيله ؟؟ فرق الكتله ده راح فين :3

هو انا مقولتلكش ؟؟ 😀 مهو أصل اينشتاين قالك فرق الكتله ده بيتحول لطاقه في النظرية النسبية 😀

– قول وربنا ؟؟ هي النسبيه دي ورايا ورايا !!

اها والله ، الراجل كتب علي السبوره عنده معادله بتقول (E=mc^2)

 E = مقدر الطاقة …. m = الكتلة …… C^2 = مربع سرعة الضوء

و قال ان فرق الكتله اللي بينشأ نتيجة الإندماج ده بيتحول لطاقه هائلة و ده اسمه قانون تكافؤ الكتلة و الطاقة 🙂

– طاقة هائلة ايه ياعم بطل أفوره ده يادوب جرام مش هيفرق حتي لو اتحول لطاقه :/

لااا مهو دي التركااايه بقي  😀 متستقلش بالجرام ، و ده لييييه بقي ؟؟

عشان الجرام ده هيتضرب في مربع سرعه الضوء .. اقولك الطاقه اللي هتطلع قد ايه ؟ بس متحزش في نفسك

90 مليون مليون جول ، أو 21.5 ألف طن من ماده TNT المتفجره َ!!!

تخيل بقي ان كل ذرتين هيدروجين يتجمعوا و يطلعوا الطاقه الهائله دي و الاندماج شغال بقي مش بيقف 🙂

و الهيدروجين كميته كبيره اوي في الشمس فلسه قدامه ملايين السنين عقبال ما يخلص و باقي الغازان اللي ف الشمس تخلص و عمر الشمس ينتهي ، فاطمن لسه قدامنا وقت كبير .

و ده السبب اللي مخليك متدفي و انت اعد دلوقتي ^^

* طبعا أرقام الكتل اللي كتبتها فوق دي مش صح خالص

كتله ذرتين الهيدروجين متجمعه = 6.693 * (10)^-27 كليوجرام

و كتلة ذرة هيليوم واحده = 6.645 * (10)^-27 كيلوغرام

و بالتالي فرق الكتله مش جرام طبعا ، الفرق هيساوي = 0.048 *(10)^-27 كيلوجرام

بس محبتش اكتب الارقام دي في نص الكلام عشان مترفعش حاجبك تاني و تتنح 😀

لكن الجرام الواحد بيطلع فعلا كمية الطاقة اللي ذكرتها . 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: