أخبار عاجلة
الرئيسية / Blog / العزلة 

العزلة 

العُزلة سُنة يا جماعة وأسلوب حياة، إفصلوا شويه عن دوشة اللي حواليكوا والقصص اللي مبتخلصش، خدوا فترة نقاهة بعيدًا عن السوشيال ميديا وعن المجتمع والنيجاتيف إنيرجي اللي مرشوشة في الجو دي وإختلوا بأنفسكم الـ 30 يوم اللي جايين، حددوا حاجتين أو تلاتة فقط وإلتزموا بيها، إشحنوا روحكوا اللي بتُستنزف كل يوم في نقاشات ومهاترات وأخبار أو بوستات تحرق الدم.

أشهر مؤرخي القرن العشرين «أرنولد توينبي» طلع بنظرية إسمها «الإنسحاب و العودة» لما عمل دراسة عن السير الذاتية لكل العظماء اللي ف التاريخ اللي أثروا في العالم من أنبياء ورجال سياسة ورجال حرب وفلاسفة وعلماء ومؤرخون ولقى فعلا ًشئ مشترك بينهم إنهم لازم بيجي عليهم فترة ينسحبوا من المجتمع اللي حواليهم ده و يختلوا بنفسهم فقط، يعيدوا حساباتهم وترتيب أولوياتهم وأفكارهم، ويشتغلوا على نفسهم، وبعدين يرجعوا تاني بس بفكرة جديدة أو خطة أو رسالة جديدة يغيروا بيها مسار حياتهم أو يكسروا بيها الروتين، العرب كانوا محقين حين قالوا أن الإستئناس بالناس من علامات الإفلاس.

لو قرأت في سيرة النبي ﷺ هتعرف إنه كان بيختلي بنفسه في غار حراء بعيدًا عن الناس كلها، الخلوة بالنفس والصوم عن الكلام وإختلاط الناس ده ربنا سبحانه وتعالى ألمح لها في القرآن موجهاً الكلام لـ السيدة مريم :

«فكلي وإشربي وقري عينا فإما تريِن من البشرِ أحداً فقولي إني نذرت للرَّحمَن صوماً فلن أكلم اليوم إنسياً»

شهر كامل لا تكتب فيه حاجة على الفيس ولا تقول رأيك في الاحداث اللي حواليك، إقعد برا البيت أطول فترة لتتجنب مناوشات الأهل اللطيفة، قرب من ربنا اللي أكيد مقصر في حقه زينا، إبدأ لم المذاكرة المتكومة عليك اللي خنقاك وموتراك دائماً، إمتنع عن عادة سيئة مش قادر تبطلها، إختارلك كتابين وإعتكف عليهم، شوف كورس إبدأ فيه، مارسلك رياضة جديدة، اللغة اللي نفسك تتقنها وعمال تسيف في بوستاتها بس،… إلخ.

في حكمة إنجليزية قديمة بتقول: ثلاثة طيور يقفون على شجرة، قرر واحد منهم أن يطير،

فكم عصفور بقي على الشجرة؟ .. نعم بقي ثلآثة عصافير على الشجرة، لأن واحداً منها قرر ولم يطر، إذن لم يحدث أي تغيير.

فكونك كتبت قائمة طويلة بالأهداف اللي قررت تنجزها في 2017 -اللي هي نفس بتاعة كل سنة- فـ كل الأفكار دي لا قيمة لها ومش المفروض تفرحك أو تحسسك بأي نوع من الرضا عن نفسك مادام شهر 3 قرب يخلص أهو ومعملتش حاجة منهم كالعادة على أمل إن بكرة من بعد الفجر هتبدأ وهتكون إنسان أفضل بإذن المولى! .. أوعدك إن سواء عملت حاجة أو قضيتها scroll down فـ الـ30 يوم اللي جاين هيعدوا من غير ما تحس، فليه متستغلهمش؟ بصلي وأنا بكلمك، ليه؟

إفتكر دايماً شوقي لما قالك:

«وما نيل المطالب بالتمني .. ولكن تؤخذ الدنيا غلاباً».

‏The only way to get to Day 500 is to start with Day 1.

اللهم بلغت، أشوفكوا بعد شهر بإذن الله “).

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: