أخبار عاجلة
الرئيسية / Blog / العلم مفيد حتى في دريم بارك !!!!!

العلم مفيد حتى في دريم بارك !!!!!

تعالى نفترض إن ربنا رزقك بعمر و مريم .. عمر عنده 12 سنة مثلاً ومريم صغيرة عندها 3 سنين مثلاً .. والإتنين عايزين يروحوا الملاهي

وحضرتك عشان تخلص من زنهم إضطريت تنصاع لرغبتهم و خدتهم يوم الجمعة و طلعتوا على دريم بارك مثلاً .. و طلبت معاهم بقى يركبوا المرجيحة اللي قدامك دي ..

هل لازم تحط في إعتبارك شئ معين قبل ما تركبهم المرجيحة دي ولا تركبهم بشكل عشوائي ؟؟؟

أها طبعاااً ..

العلم بيقولك لو – مثلاً – فاضل بس كرسي جوا و كرسي برا يبقى من الأفضل لمريم إنها تركب جوا عشان صغيرة و عُمر يركب في الكرسي اللي برا ..

– هتفرق يعني ؟!

أها طبعاً هتفرق … ليه بقى ؟؟

لأن عمر لما يركب في الكرسي اللي برا هيتحرك بسرعة أكبر من مريم اللي كرسيها جوا !

 ما كلهم في مرجيحة واحدة و بيلفوا مع بعض أهو مفيش كرسي سبق التاني هيتحرك بسرعة أكبر إزاي بس

هما فعلاً بيدوروا مع بعض في نفس الزمن لكن المسافة اللي بيقطعوها مختلفة ..

إنت خدت في سنة رابعة ابتدائي تقريباً السرعة بتساوي إيه ؟؟

– مسافة على زمن

طلع الزمن برا الموضوع لأنهم فعلاً بيلفوا مع بعض في نفس الزمن .. ؟؟

خلينا في المسافة (( لو المسافة زادت السرعة كده هتزيد ))

عمر ومريم دلوقتي المسافة اللي بيقطعوها دي عبارة عن جزء من دايرة ؟؟ . يعني لو رصدت المسافة اللي قطعوها في جزء من اللفة هتلاقيها عباارة عن قوس من الدايرة أو جزء من محيط الدايرة .. صح ؟؟

– أها صح

جميل أوي .. يعني لو عايزين نقيس المسافة اللي هيمشوها في المسار الدائري ده .. معناه إننا عايزين نقيس طول قوس في دايرة .. مظبوط

– مظبوط

والقانون بيقول إن طول القوس ” المسافة ” بيساوي

(( حاصل ضرب زاوية الدوران _في_ نصف قطر المدار اللي بيدوروا فيه ))

زاوية الدوران يعني هما لفوا بزاوية قد إيه ؟؟ .. يعني لو عُمر واقف على يمينك و مسكته من دراعه و لفيته لحد ما وصل على شمالك يبقى إنت كده لفيته قد إيه ؟؟

– أهاا كده لفيته 180 درجة

كده إنت فهمت زاوية الدوران .. و بما إنك وإنت بتلفه وخليته يمشي في دايرة ..

وأي دايرة بيبقي ليها نصف قطر صح ؟؟ اللي هو البُعد بين مركز الدايرة و الجسم اللي بيدور ..

و كذلك عمر ومريم دلوقتي بيتحركوا في مسار دائري و اللي أكيد لكل واحد منهم نصف قطر مختلف صح ؟؟

نصف القطر بتاع عُمر أكبر من نصف القطر بتاع مريم .. و بما إن الإتنين هيلقوا بنفس زاوية الدوران فدي مش هتأثر .. لكن نصف القطر هيأثر

**إذن الخلاصة :

نصف القطر اللي بيدور فيه عمر زاد ” بُعده عن مركز المرجيحة اللي هو العمود ” >> معنى كده إن حاصل ضرب نصف القطر في زاوية الدوران زاد >> يعني المسافة اللي قطعها عمر زادت >> يبقى سرعة عمر زااادت

وعلى العكس عند مريم .. بُعدها عن العمود صغير يعني نصف القطر صغير يعني المسافة اللي هتقطعها في نفس الزمن صغيرة معنى كده إن سرعتها هتبقى صغيرة

 يعني لو مدة المرجيحة دقيقة .. الدقيقة دي عمر هيمشي مسافة أكتر من اللي مريم هتمشيها بكتير عشان وإنت واقف برا بتتفرج عليهم تبقى فاهم اللي بيحصل ..

عشان كده الكبار بيحسوا بمتعة أكبر لما يركبوا في الكراسي اللي برا 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: