أخبار عاجلة
الرئيسية / Blog / النفسية محتاجة كرسي – وكتاب – وبحر 👌🏻

النفسية محتاجة كرسي – وكتاب – وبحر 👌🏻

سنة 1951 في تجربة شهيرة جداً إتعملت إسمها تجربة آش .. عملوا إيه في التجربة دي ؟؟

جابو ورقة رسموا عليها خط على الجنب .. و رسموا جنبه 3 خطوط ، خط أطول منه و خط قده و خط أقصر منه بشويه .. و جابوا 6 أشخاص طلبوا من كل واحد فيهم يختار الخط اللي بيساوي الخط الأصلي في الطول .. طبعاً الإجابة كانت واضحة جداً.

الفكرة بقى إيه ؟؟ إن الـ 6 أشخاص دول منهم 5 تبعهم أصلاً يعني ممثلين .. و شخص واحد بس وسطهم هو اللي بيتعمل عليه التجربة … طلبوا من الـ 5 دول إنهم يختاروا إجابات غلط وهم واثقين.. و قعدوا يشوفوا هيختار إيه ؟ هل هيختار الصح ؟؟ ولا هيتأثر باللي حواليه و يمشي مع التيار ويختار غلط ؟؟ 

و النتيجة إن 30% من الناس اللي إتعمل عليها التجربة إتأثروا فعلاً بإجابات اللي حواليهم و كذّبوا عنيهم وبصوا وقالوا أكيد الناس دي شايفين حاجة غيرنا أكيد مش كلهم غلط و أنا اللي صح !. .. وبالتالي أثروا على وعيه و شوّهوا رؤيته للواقع و تمييزه للحقيقة من الزيف!! كلام مخيف فعلاً

ودي تجربة تانية بردو بتأكد تأثير الـ Social conformity اللي اتكلمنا عليه قبل كده. 

ده خلى المؤرخ المعروف” أرنولد توينبي” يطلع بنظرية إسمها ( الإنسحاب و العودة ) 

عمل دراسة عن السير الذاتية لكل العظماء اللي في التاريخ اللي أثروا في العالم لقى فعلاً شئ مشترك بينهم إنهم لازم بيجي عليهم فتره ينسحبوا من المجتمع اللي حواليهم ده و يختلوا بنفسهم بعيداً عن أي دوشة ويقضوها قراءة بقي و يعيدوا حساباتهم وترتيب أولوياتهم عشان يلاقوا نفسهم، وبعدين يرجعوا تاني بس بفكرة جديدة أو خطة أو رسالة جديدة يغيروا بيها مسار حياتهم أو يكسروا بيها الروتين .. 

لو قرأت حتي في سير الأنبياء و سيرة النبي هتعرف إنه كان بيختلي بنفسه في غار حراء بعيداً عن الناس كلها. 

الخلوة بالنفس و الصوم عن الكلام ده ربنا قالهالنا في القرآن موجهاً الكلام لـ السيدة مريم : 

(فكلي واشربِي وقري عينا فإما تريِن من البشرِ أحداً فقولي إني نذرت للرَّحمَن صوما فلن أكلم اليوم إنسياً)

من أجمل الجُمل اللي كتبها العقاد في مذكراته .. : (كانت البلدة التي نشأت فيها بلدتي أسوان بأقصي الصعيد يكاد الناشئ في قبل سني أن يأوي بها إلي صومعة من صوامع الفكر يقلب فيها وجوه النظر في كل ما يسمع أو يبصر من الشئون العامة بغير تضليل أو تهويل) .. 

و ده فعلاً اللي بيحصل حوالينا في الأخبار ما بين كذب وتطبيل مفجع أو تهويل يحسسك إن القيامة قامت.. فصدقني إنت إدراكك ووعيك وأفكارك في خطر دائم فحاول تحافظ عليهم. 

من آن لآخر إحنا فعلا ًمحتاجين ننسحب شويه عن التكنولوجيا والسوشيال ميديا والناس وجدالاتهم وتحليلاتهم وخناقاتهم وترينداتهم ونبعد عن الناس اللي مش فالحين غير في إنتقادنا وبس .. وعن كل الدوشة دي .. ونجيب كام كتاب حلوين وكام فيلم وبلاي ليست جميلة وهاند فري ونروح مكان في بحر وخُضرة وحيوانات إن أمكن .. وننعزل بنفسنا ونصفي زهننا تماماً .. وده اللي ناوي أعمله قريب جداً باذن الله، حيث بحر إسكندرية وفقط 

قيل علي لسان العرب زمان (الإستئناس بالناس من علامات الإفلاس) 

 #النفسية_محتاجة_كرسي_وكتاب_وبحر 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: