النموذج المثالي للمحتوي العلمي SET ..~

0
43
views

من وجهة نظري المتواضعة، النموذج المثالي للمحتوي العلمي اللي بقرأهه او أشوفه ، لازم يكون متحقق فيه 3 شروط متجمعة في كلمة ( SET ) 

أول حرف (S = Science & Simple ) .. لازم يكون علم حقيقي مش زائف وما أكثره في عالمنا العربي.. ويكون مبسط قدر الامكان .. والله العظيم العلم بسيط جدا وسهل مش عارف ليه فيه ناس مصممة انها تعقده وتكرهنا فيه !!! ليه هاا ليه ؟؟!! 

مش لازم الكلام يكون غير مفهوم وعمال تقول في expressions كتير ناس كتير قدامك مش فاهماها عشان تبقي أكاديمي او رجل علم فظيع واخد الكتوراه من كندا او المانيا !! اقسم بالله ما لازم !! اشرحلنا بالشعبي، باللغة اللي بتكلم بيها طول اليوم .. متحطليش بيني وبين العلم حاجز صعب يتكسر ! ليه ؟!! 

تاني حرف ( E = Entertainment ) .. لازم يكون مسلي، يكون في بعض المرح اللي بيقلل من جفاف المادة العلمية، اكتر محاضرات بحب احضرها في الكلية هي اللي بستمتع فيها وبضحك، هي اللي بحب الدكتور بتاعها، من غير ليه ، دي طبيعتنا كبشر بندور علي الحاجة اللي بتفرحنا وبنستمتع بيها .. 

مش عيب ولا حرام اماا تهزر مع الطلبة بتوعك وتوطد علاقتك بيهم .. وتبقي علاقة أب بابنه صدقني هيحبك وهيذاكر المادة وهيحبها بسببك والله حتي لو مادة في تركيب المفاعل النووي هيحبها بردو وهتبقي زي العسل علي قلبه.

.

تالت حرف ( T = Time ) .. احنا جيل بيزهق بسرعة .. ايوا خلينا معترفين بكده .. احنا جيل لو شاف كلمة ( continue reading ) في بوست في الغالب مش هيكمله حتي لو كان فيه دهب ولوز وياقوت ومغارة علي بابا كلها .. احنا جيل لو شاف فيديو علمي ع اليوتيوب مدته ساعة عمره ما هيفكر يفتحه ولو فتحه مش هيكمله إلا من رحم ربي .. فلازم اللي بيقدم محتوي علمي يكون فاهم ده كويس ويختصر علي قد ما يقدر .. اكتر فيديوهات علمية بتتشاف ع اليوتيوب مدتها لا تتجاوز الـ 10 دقايق وده اللي لاحظته .. الناس بتكره الحشو .. ولو الموضوع فعلا محتاج وقت كبير يبقي تلجأ للنقطة اللي فوق عشان الناس متزهقش .

فأما ألاقي دكتور في الكلية داخل مكشر ومش طايق نفسه ومستحرم إنُّه يبتسم مش يضحك .. و عمال يرغي ويرغي عن إنجازاته ويزيد ويعيد بأسلوب رتيب ممل لمدة ساعة ونص .. لا ومستغرب ان المدرج في محاضرته بيبقي فاضي !! فيقوم ياخد غياب عشان الطلبة الغلبانة تيجي تحضر غصب عشان الدرجات .. فيجوا يحضروا المحاضرة ويكملوا نوووم فيها لحد ما يخلص.

صدقني طول ما بتلجأ لسلاح الدرجات عشان تجبر الطالب إنه يجي يطلب العلم منك فإنت مُعلم فاشل .. فاشل .. فاشل. 

شــــكرًا .

‏#SET

تعليقات الفيس بوك

تعليقًا