أخبار عاجلة
الرئيسية / Blog / بما إن الأرض بتلف حول نفسها …ليه لما ننط بننزل في نفس المكان ؟؟؟؟؟

بما إن الأرض بتلف حول نفسها …ليه لما ننط بننزل في نفس المكان ؟؟؟؟؟

بما إن الأرض بتدور حول نفسها بسرعة كبيرة جداً .. ليه لما بنط لفوق بننزل في نفس المكان ؟ مش المفروض لما أنط فوق ، الأرض تلف تحتي فانزل في مكان تاني ؟؟

أو ليه نسافر بطيارة ونمشي بيها ؟؟ … إحنا ممكن نرتفع بيها من الأرض بس ونستنى الأرض تلف لحد المكان اللي عايزين نسافرله لما يجي تحتينا فننزل ؟؟

أو ليه لما بركب أتوبيس ماشي لقدام وأنط فوق بنزل في نفس المكان مش المفروض لما أنط في الهوا وهو بيتحرك لقدام أرجع أنا لورا ؟ ..

طيب تعالى نفترض إفتراض ظريف جداً .. إن كل الأحجام اللي في الكون دي هتتضاعف كلها مرة واحدة .. حجمنا وحجم كل حاجة حوالينا وحجم الأرض نفسها وحجم كل الأجسام في الكون بقت الضعف .. هل لما تصحى من النوم هتحس بحاجة ؟؟؟

الإجابة مش هتحس بأي حاجة لأن كل حاجة حواليك حصلها نفس الشيء

كذلك …. مش كوكب الأرض بس اللي بيلف حول نفسه بسرعة 1600 كيلومتر في الساعة .. بل كل شيء على سطح الكوكب ده بيتحرك بنفس السرعة .. يعني وإنت قاعد بتقرا البوست ده بتتحرك بالسرعة الضخمة دي و الدولاب اللي جنبك و السرير وكل شئ حواليك بيتحرك بنفس السرعة عشان كده إنت مش حاسس بأي حاجة .

فأنت لو نطيت في الهوا .. إنت مازلت بتتحرك بسرعة 1600 .. ولما تنزل تاني هتفضل تتحرك بردو بنفس السرعة .. وبالتالي كل شيء ( بالنسبة لك ) هيكون ثابت .

كذلك .. لو إنت في أتوبيس بيتحرك بسرعة 80 كيلو في الساعة ، ونطيت في الهوا .. إنت مازلت مكتسب نفس سرعته يعني لسه بتتحرك بنفس الـ 80 كيلو في الساعة .. وبالتالي هتنزل في مكانك 🙂 .. لكن لو نطيت من الأتوبيس مره واحدة هتنزل تتكفي على وشك لأنك كنت مكتسب سرعته يعني كنت ماشي بسرعة 80 كليو متر ووقفت مرة واحدة فوقعت بسبب قصورك الذاتي.

وكذلك لما تسافر بالطيارة ورفعتها فوق سطح الأرض من غير ما تتحرك يعني عداد السرعة بتاع الطيارة مكتوب عليه صفر .. فهي فعليــاً بتتحرك مع كوكب الأرض بردو بسرعة 1600

يعني الطيارة مش هتبقى ثابتة ثبات مطلق عشان تستنى الأرض تلف من تحتيها فتنزل في المكان اللي يعجبك .. لا هي هتبقى ثابتة بالنسبة لك بس .. لكن هي فعلياً بتتحرك مع الأرض بنفس السرعة وبالتالي المكان اللي تحت الطيارة هيفضل هو هو لحد ما الطيارة تبدأ تتحرك لقدام بسرعة مثلاً 800 كليو في الساعة .. ساعتها هتنتقل من مكان للتاني . 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: