الرئيسية / Blog / تعرف إيه عن “التفرد” والبلاك هول؟؟

تعرف إيه عن “التفرد” والبلاك هول؟؟

كلمة إتقالت في فيلمين من أجمل الأفلام اللي شوفتها حتى الآن و أغلب الناس لم تلقِ لها بالاً ! 

( التفرد – Singularity ) . يعني إيه ؟؟ 

إحنا قولنا قبل كده طبقاً للنسبية العامة، فالكون بتاعنا ده مش فراغ يعني مش لا شيء ، لا الكون عبارة عن شبكة مكونة الزمكان .. يعني أبعاد المكان التلاتة إندمجوا مع البُعد الرابع اللي هو الزمن و كونوا بُعد جديد سميناه ( الزمكان – Space time ) و قولنا إن أي كتلة كبيرة في الكون بتعمل إنحناء في الزمكان ده و كل ما الكتلة تزيد الجاذبية هتزيد فالإنحناء يزيد … تمام كده ؟؟ 

طيب و إيه أكبر جاذبية في الكون ؟؟ إيه الشيء اللي بيعمل إنحناء جامد أوي في الزمكان ؟؟ 

إيه الدوامة أو البلاعة اللي بتشفط أي حاجة تقرب منها حتي لو الضوء ؟ 

البلاك هول صح ؟؟..

البلاك هول ده المفروض تعرف عنه معلومتين مهمين : 

المعلومة الأولي : أي دوامة في البحر عندها حدود أو زي ما تقول خط أحمر يعني ده الخط اللي لو عديته يبقى روحت في داهية ، هتتشفط و مش هتعرف تقاوم .. 

أهو البلاك هول ده عنده نفس الخط الأحمر ده اللي لو عديته مش هتعرف ترجع تاني .. العلماء بيسموه ( أُفق الحدث – Event Horizon ) 

المعلومة التانية : عديت الأفق و فضلت تتشفط جوا البلاك هول و حتى الآن إنت بتأثر عليك القوانين بتاعتنا عادي اللي هي قوانين النسبية العامة .. تفضل تنزل و تنزل لحد ما توصل لنقطة معينة 

النقطة دي بتنهار فيها شبكة الزمكان و بتنهار قوانين الفيزياء اللي بتحكمنا 

ممكن تتخيل الزمكان ده عبارة عن موجة ضخمة عمالة تعلى و تعلى لحد ما توصل لإرتفاع معين مش هتعلى أكتر من كده و بعدين الموجة كلها تنهاار تماامااً .. أهو الزمكان حصله نفس الفكرة و النقطة اللي عندها أقصى إرتفاع دي تبقى نقطة التفرد . 

دكتور ( جون ويلر – John Wheeler ) – و ده دكتور عظيم في الفيزياء النظرية في جامعة بريستون و كان من مساعدين أينشتاين في أبحاثه- قال بالنص : 

عند النقطة دي بيحصل تزاوج بين قوانين النسبية العامة و قوانين ميكانيكا الكم .. قصده إيه ؟؟ 

مش إحنا قولنا في الكون بتاعنا العادي ده في تعارض كبير بين النسبية العامة وبين ميكانيكا الكم أو نظرية الكم … و ده السبب اللي مخلي العلماء مش قادرين يوصلوا لنظرية

كل شئ ؟ 

أهو عند النقطة دي بقى التعارض ده بينهار ، يعني القوانين كلها بتندمج بشكل ما و بيحصل إنسجام فيما بينها. 

و ده السبب أصلاً اللي خلى العلماء يفكروا في نظرية الأوتار الفائقة أو نظرية M .. عشان يفسروا إزاي الإندماج أو الجواز ده بيحصل . 

أهي النقطة دي بيسموها Singularity :)) 

و طبعاً إحنا لو قدرنا نستكشف المنطقة دي هنقدر نوصل للنظرية .. بس طبعاً مين اللي هيدخل جوا البلاك هول و يستكشف و يرجع يقولنا ؟؟ فبالتالي الموضوع صعب جداً جداً .. حتي الآن . 

المهم الفيلمين اللي ف الصورة هم interstellar و the theory of everything لو هتتفرج على أفلام زي دي بعد كده متخليش أي كلمة غريبة تمر مرور الكرام كده عشان في الغالب بيبقى وراها قصة كبيرة .

تعليقات الفيس بوك

تعليقًا

عن

شاهد أيضاً

فرحة العيد في عيون الأطفال : دعوة لأخذ الأطفال مثال لخلق الفرحة والسعادة من أبسط الأشياء !!!

جاء يوم العيد، يوم الخروج من الزمن إلى زمن وحده لا يستمر أكثر من يوم. …

%d مدونون معجبون بهذه: