الرئيسية / Blog / تعرف إيه عن السنة الضوئية ؟؟؟ وإزاي نستخدمها في قياس المسافات ؟؟؟

تعرف إيه عن السنة الضوئية ؟؟؟ وإزاي نستخدمها في قياس المسافات ؟؟؟

ناس كتير لاقيتها بتسال يعني إيه ( سنة ضوئية ) أو ( light year ) ؟ 

و دي مسافة ولا زمن

 لأن المصطلح ده بيتكرر كتير أوي في أي شئ بيتكلم عن الفلك

بص يا سيدي :

عايزك تتخيل معايا إنك لابس و متشيك وواقف في الشارع مستني صاحبك اللي هيخرج معاك .. بس صاحبك إتاخر جداً عن المعاد اللي إتفقتوا عليه :/ 

عمال ترن عليه و ترن عليه و هو يكنسل !!

فلما زهق رد عليك :

-إنت فين كل ده أنا بقالي ساعة ملطوع في الشارع !! 

= يابني جاي والله الطريق واقف 

– قدامك قد إيه يعني 

= يعني حوالي 5396 متر و أوصل !! 

قدامك وقت أد إيه 

= يا عم خمس دقايق و أكون عندك – كعادة أي مصري  

السؤال : ليه حضرتك مهتمتش بالمسافة و إهتميت بس بالزمن ؟؟ 

ببساطة لأن اللي يهمني مش المسافة قد إيه لأنها ممكن تبقى كبيرة لكن اللي يهمني صاحبي هياخد المسافة دي في أد إيه 

كذلك يا سيدي علماء الفلك لقوا إن المسافات في الفضاء كبيره أوي ، بملايين الكيلومترات ! 

لا إحنا مينفعناش الكلام ده !! طب نعمل إيه يعني ؟؟ 

إحنا ندور على وِحدة نقيس بيها المسافات الشاسعة دي غير المتر و الكيلو متر و الميل و الكلام الفاضي ده ! 

فقالو بسيطة ، مش إحنا عارفين إن سرعة الضوء في الفضاء ثابتة ؟ و عارفين قيمتها ؟ 

يبقى إتحلت إحنا ننسب كل المسافات اللي في الفضاء لسرعة الضوء 

يعني إيه ؟؟

صاحبك لما قالك فوق أنا فاضلي خمس دقايق .. كان قصده خمس دقايق بالنسبة لسرعة الميكروباص اللي راكبه صح كده ؟ لكن لو إفترضنا إنه مكنش لقى ميكروباص و مشي على رجله كان قالك فاضلي ربعاية مثلاً بالنسبة لسرعته هو … 

لو هتتكلم عن رحلة لتركيا بالطيارة مش هتسأل أكيد عن المسافة بين مصر و تركيا لكن هتسأل عن مدة الرحلة و لتكن 6 ساعات مثلاً ، يبقى المقصود 6 ساعات بالنسبة لسرعة الطيارة … 

 إذن في حياتنا الطبيعية إحنا مش بنهتم بالمسافات إحنا بنهتم بالوقت و لما بنيجي نتكلم عن الوقت لازم ننسبه لسرعة شيء عشان يبقى له معني . 

فهمت يعني إيه ننسب كل المسافات لسرعة الضوء ؟ 

يعني بإختصار لو عايز أتكلم عن المسافة بين الأرض و المشترى .. هشوف الضوء هيقطع المسافة بين الأرض و المشترى في أد إيه ؟؟ 

و لنفترض إن الضوء هياخد خمس سنين عشان يجي من المشترى للأرض .

يبقى من النهاردة يا حضرااات المسافة بيننا و بين كوكب المشترى ( خمس سنين ضوئية )  

بالمناسبة ، إنت عارف الضوء بيمشي أد إيه في السنة الواحدة بتاعتنا ؟ 

متتخضش بس من الرقم ((( 9,460,730,472,580,800 متر ))) 

يبقي أنهي أحلى بالله عليك أقول خمس سنين ضوئية و لا أقول الأرقام الخزعبلية دي   

طيب إشمعنا الضوء اللي نسبنا المسافات بالنسبة له ؟ ببساطة لأننا بندور على حاجة ثابتة حاجة محدش في الكوكب يختلف عليها .. مينفعش أنسبها بالنسبة لسرعة طيارة ولا صاروخ ولا مركبة فضائية :/ لازم يكون حاجة ميختلفش عليها إتنين 

وبالتالي ملقيناش أنسب من الضوء 🙂 

يبقى الملخص هو إن السنة الضوئية وحدة لقياس المسافات الكبيرة اللي في الفضاء لأن صعب أوي نتكلم بالوحدات بتاعتنا لأننا هنلاقي أرقام مينفعش تتقال !! ؟ 

سيبك بقى من الرغي ده .. شايف النقطة المنورة اللي السهم بيشاور عليها في الصور دي ده كوكب الأرض و الصورة متاخدة من كوكب زُحل .. 

و أما تبص عليها كويس و تعرف إنك فيها بمشاكلك و خناقاتك و إكتئابك ، هتعرف إن حياتنا دي تافهة و صغيرة أوووي و مش مستاهله كآبة .. 

النقطة دي فيها عـِـبر كتير لو تأملت فيها شوية 

 

تعليقات الفيس بوك

تعليقًا

عن

شاهد أيضاً

فرحة العيد في عيون الأطفال : دعوة لأخذ الأطفال مثال لخلق الفرحة والسعادة من أبسط الأشياء !!!

جاء يوم العيد، يوم الخروج من الزمن إلى زمن وحده لا يستمر أكثر من يوم. …

%d مدونون معجبون بهذه: