جبر الخواطر ..

0
234
views

البيدج دي كانت بتزل بوستات عن أحلام الناس اللي نفسها تحققها .. 

فـ نزلت بوست بيتكلم عن حلم الطفلة اللي فـ الصورة ، إنها نفسها تصنع سفينة فضاء من النفايات والخشب ونفسها تسافر بيها للفضاء تشوف أماكن محدش شافها قبل كده. 

.

حلم بسيط .. برئ .. ومش مستحيل .. فكم من حقيقة كانت في البداية حلم مستحيل . 

يمكن لو كانت طفلة من بلادنا وصفحة من بتوعنا اللي نزلتها كنت هتشوف حبة سف وتريقة من الحاجات اللي احنا اتعودنا عليها .. وكومنتات تعقد البنت في عيشتها. 

.

فتخيل لما تنزل بوست تقول فيه الكلمتين دول وتلاقي مين اللي رد في الكومنتات ؟؟؟ 

(وكالة ناسا الفضائية) بذات نفسها 😀 !!!! .. 

ودي تقريبا المرة الأولي اللي أشوفلهم كومنت ع السوشيال ميديا 

عشان ترد علي البنت بكل احترام وتقدير وحماس وتقولها :
انتي علي وشك توصلي للسن المناسب عشان تبقي معانا في أحد أول المهمات البشرية في رحلتنا إلي المريخ، واحنا فعلا محتاجين ناس مبتكرين زيك كده عشان تطور تكنولوجيات جديدة للناس مكنتش حتي تتخيل في يوم اننا هنوصلها .. 

استمري في تجاربك واختباراتك .. حافظي علي حلمك ومتبطليش تحلمي.. حافظي علي طموحك ده واستمري . 

.

وردوا علي الكومنت كمان : احنا محتاجين للحالمين والناس اللي اتظلموا من جميع الأعمار وحطوا لينك عشان الناس اللي عايزه تعرف معلومات اكتر عن ازاي تشتغل في ناسا ! 

.

مفيش أجمل من الكلمة اللي تجبر بيها خاطر حد .. اللي تشجعه وقت ما كل الناس بتحبطه والدنيا تضلم في وشه.

حتي لو كانت بسيطة بس أنت متعرفش تأثيرها عليه هيبقي ازاي ؟ 

 عايزك تتخيل معايا حال البنت وكمية الطاقة والحماس اللي هيبقي عندها وهي بتقرأ الكومنت ده ؟ 

.

مين عارف يمكن الكلمتين دول يكونوا السبب اللي هيخلي البنت دي تبقي من علماء المستقبل ورائدة فضاء في يوم من الأيــام .  

.

يمكن أنا وأنت هننسى الكومنت ده .. لكن أنا متأكد إن البنت دي عمرها ما هتنساه :)) . 

فـ أرجوك راقب لسانك لأن الكلمة بتفرق كتيـــــر.   

تعليقات الفيس بوك

تعليقًا