حيلة بسيطة بإستخدام كتابين بس !!!!لكن وراها سبب علمي كبير 👇🏻

0
196
views

لو حابب تجنن إخواتك الصغيرين بالعلم 

عايزك تجيب كتابين تمام ؟ مش لازم يكونو كتب ضخمة .. أي كتابين 

إبدأ دخلهم في بعض ، بحيث كل صفحة من كتاب يبقى فوقيها صفحة من الكتاب التاني 

يعني هتفتح الكتابين و تحط غلاف كتاب فوق غلاف التاني و تبدأ تنزل صفحة من واحد و فوقيها صفحة من التاني و هكذا .. لحد ما الكتابين يبقوا متداخلين تماماً صفحة بصفحة 

عايزك بقى تجيب إواتك و جيرانك و عيلتك كلها و تحاولوا تطلعوا الكتابين دول من بعض 

أخرم مثلاً طرف الكتاب ده وأربطه بحبل و الطرف التاني بحبل و إعملوا فريقين شد الحبل .. بردو الكتب مش هتتفك من بعض

لا ده مش بس كده .. دول جابوا عربيتين هاا عربيتين و ربطوا حبل في عربية والحبل التاني بعربية و العربيتين بدأوا يتحركوا عكس بعض بأقصى عزم ليهم و بردو الكتب متفكتش !! 

كلمة السر تكمن في قوة الإحتكاك اللي بين الصفحات و بعض .. لما بتيجي تشد الكتاب لبرا صفحة الكتاب بتأثر على الصفحة اللي فوقيها و اللي تحتيها بقوة إحتكاك كبيرة جداااً، وكذلك صفحة الكتاب التاني هتأثر هي كمان بقوة إحتكاك كبيرة جداً على اللي فوقيها و تحتيها و الإحتكاك ده بيخلق قوة تماسك رهيبة بيبقي صعب جدااااً إنك تتغلب عليها .. 

الإحتكاك ده موجود في كل حاجة في حياتنا .. و إنت ماشي في الشارع لو مفيش إحتكاك مش هتعرف تقف أديك دليل ؟؟ المتزحلقين على الجليد بيقدروا يوقفوا نفسهم بنفسهم ؟؟ و لا بيبقي معاهم عصاية توقفهم ؟؟ ….. و ده بسبب إن الإحتكاك على الجليد صغير جداااً .. 

إنت عارف إنت بتتعب من المشي أو الجري ليه ؟؟ لأنك بتستنفد طاقة عشان تتغلب بيها على الإحتكاك اللي بتأثر بيه الأرض عليك .. عارف لو الأرض سطح أملس تمامًا مفيهاش أي إحتكاك ؟ إنت عمرك ما هتتعب من المشي، عارف لو أي حاجة بتمسكها مفيهاش إحتكاك مش هتعرف تمسكها هتتزخلق من إيدك ! 

و الإحتكاك بردو هو اللي بيخلي العربية تستهلك بنزين أكتر و كل ما يزيد ، تستهلك أكتر و أكتر 

و ده اللي كوكب اليابان الشقيق قدر يتغلب عليه، قالوا إحنا عايزين نعمل قطر سريع جداااً، طب عشان نعمل القطر بالسرعة دي يبقى لازم نتغلب على قوة الإحتكاك بينه و بين القطبان و لو عرفنا نلغيها خالص نلغيها، و ده اللي حصل فعلاً ، قدروا يصنعوا قطار مش بيلمس القطبان أصلاً بل بيتحرك من خلال مجالات كهرومغناطيسية بتعملها القطبان مع القطر ، و بالتالي قدروا يوصلوا لقطر سرعته 550 كيلو متر في الساعة !! يعني يوديك إسكندرية و يجيبك ف ساعة 

و ده بردو السبب اللي بيخلي الناس الكبيرة تشتكي من ركبتها و وجع المفاصل بسبب الإحتكاك ده ، ربنا سبحانه و تعالى برحمته خلقلنا عند المفاصل سوائل وأنسجة كثيفة لينة بتتسمي بـ (الغضاريف) بين العضم عشان يفادي الإحتكاك ده ، و لما بيحصل تآكل للغضاريف دي بيبدأ العضم يحتك ببعضه و ده السبب في الوجع الجامد اللي بيحسوا بيه ، ربنا يشفي كل مريض . 

الإحتكاك ده له تأثير كبير جدااً في حياتنا و له تطبيقات كتير جداااً .

تعليقات الفيس بوك

تعليقًا