خلي عندك فضول ..تعرف معلومة صح !!!

0
418
views

ليه صعب أزق العربية؟ 

لما نزل الأخ Derek Muller بعربيته بين الناس، بدأ يسألهم السؤال البسيط ده، وكان أغلب أو كل الناس مجمعة على إجابة واحدة وشايفنها بديهية وأعتقد إنها جات في دماغك دلوقتي

(لأنها تقيلة) ! مش محتاجة فكاكة .. فسألهم تاني: 

– طيب يعني إيه تقيلة؟ 

= فقالوا : ببساطة يعني كتلتها كبيرة فمشدودة للأرض جامد بفعل الجاذبية.

– كلامكوا صح .. بس أنا مش بحاول أشيلها أو أرفعها عن الأرض عشان أقاوم قوة الشد دي! أنا بحاول أزقها فقط لقدام.

* إبتسامة وصوت صرصور الحقل *

في الحقيقة الإجابة دي مش دقيقة أوي، الموضوع مش معتمد أوي على الجاذبية اللي شدانا لتحت…ولكن السبب الأساسي لعدم قدرتنا على دفع العربية هي خاصية للمادة إسمها الإنجليزي الجميل (Inertia) بتتنطق إنرشا.

– إيه الإنرشا دي لمؤخذه؟

عادةً كل جسم في هذا الكون بيحب جدًا الإستقرار، وبيكره التغيير من حالته كره العمى، لذلك بيقاوم أي مؤثر خارجي بيحاول يغير من حالته بكل ما أوتي من قوة.

والملفت للنظر إن طبيعتنا النفسية كده بردو بنحب الإستقرار النفسي وبنكره وبنخاف من التغيير جدًا وبنقاومه!

المهم نسيبنا من علم النفس ونرجع للفيزياء، أهي مقاومة الجسم ده للتغيير من حالته أو من حركته، علماء الفيزياء سموها (Inertia) .. أيون اللي ترجمناها بعد كده ترجمة مش لطيفة أبدا ًوهي (القصور الذاتي)

فكل ما كان الجسم (كتلته كبيرة)، يعني بيحوي كمية كبيرة من المادة .. كل ما مقاومته للتغيير من حالته هتكبر.

فتلاحظ إنك وإنت بتلعب كورة لو إديت كتف قانوني لصاحبك اللي جسمه نحيف وصغير شويه هتلاقيه وقع وإتكوم قدامك .. في حين لو إديت نفس الكتف القانوني بنفس القوة لصاحبك الضخم الجِتة، إنت اللي هتتكوم قدامه وهو ولا هيتأثر، وده لأن صاحبك الضخم عنده كتلة كبيرة لذلك عنده إنرشا أو مقاومة كبيرة لقوة كتفك القانوني اللي حاولت تأثر عليه.

لذلك صعب نزق العربية لأننا محتاجين قوة كبيرة نتغلب بيها على مقاومتها الذاتية للحركة ونتغلب كمان على قوة احتكاكها بالأرض وبالهواء (الإحتكاك ده مقاومة بردو للحركة)، وأما الإحتكاك ده بقى بيعتمد ضمنياً على قوة الجاذبية.

ودي كانت معلومة ع الهامش كده، فخد بالك مش كل إجابة بديهية بالنسبة لك لازم تكون صح، المهم يكون عندنا الفضول اللي يخلينا نسأل ونبحث عن الإجابة الصح.

تعليقات الفيس بوك

تعليقًا