أخبار عاجلة
الرئيسية / Blog / دكتور “Walter Lewin”مثال حي لتدريس علم الفيزياء كما يجب أن تكون !!

دكتور “Walter Lewin”مثال حي لتدريس علم الفيزياء كما يجب أن تكون !!

دكتور Walter Lewin .. بروفيسور فيزياء في جامعة MIT ..

أها هو اللي في الصورة ده

أعظم دكتور شوفته بيشرح فيزياء في حياتي و مش هشوف زيه .. الراجل ده أنا لو كتبت فيه كتاب مش هوفيله حقه

صاحب المقولة الرائعة :

‏( teachers who make physics boring are criminals )

المُعلمين اللي بيجعلوا من الفيزياء شئ ممل .. مجرمين !

من وجهة نظري، علم الفيزياء هو أمتع علم ممكن تدرسه في حياتك، لأنه في الأصل مسموش علم الفيزياء … إسمه علم الطبيعة.

العلم اللي بيعرفك إن كل شيء بيحصل حواليك ده بيحصل لسبب ما .. مفيش حاجة إسمها هي كده!

العلم اللي يفهمك الطبيعة اللي حواليك دي بتشتغل إزاي .. العلم اللي لو فهمته هتقدر تفهم حاجات كتير أووووي في حياتك.

للأسف العلم ده في بلدي بيتدرس غلط .. بيتدرس عشان الطلبة تدخل تحل وتلم درجات.

اذكر اني كنت سألت مدرس قبل كده عن جزئية في منهج الفيزياء اللي عليا و كان رده:

” سيبك من دي مبتجيش في الإمتحانات ” !!!

للأسف ده بقى حالنا .. عشان كده أغلبنا كره العلم ده رغم متعته التي لا توصف.

دكتور والتر .. اللي هيشوف محاضراته المتصورة هيشوف تدريس الفيزياء كما ينبغي أن يكون

الراجل ده ممكن يجيب عجلة يدخل بيها المحاضرة ممكن يجيب كاوتش عربية .. ممكن يجيب الأجهزة اللي موجودة في المناهج قدام الطلبة في المحاضرة .. ممكن يجيب كتلة ضخمة لو خبطت في وشه هتدمره و يعرض حياته للخطر في سبيل إنه يثبتلهم قانون قدام عنيهم،

 ممكن يتعلق في حبل مربوط في السقف أو يعمل مرجيحة، عشان يشرحلهم نظرية ما .. بإختصار محاضرته بتحس إنك قاعد في حاجة زي ورشة أو سيرك مش قاعد في مدرج !

الراجل ده حرفياً بيتشقلب و بيقلب بهلوان عشان يوريك الفيزياء حواليك مش في الكتب .. بيبدأ معاك من أول ما شافوا الظاهرة و إزاي قدروا يفسروها بالقوانين .. بيخليك تقتنع بالقانون و تبقى فاهم جه منين مش تحفظه .

ساعات كنت بتفرج على محاضرة ليه وعندي إمتحان تاني يوم و منفضله من كتر إستمتاعي بشرحه

الراجل ده هيوريك قد إيه العلم ده حوالينا من أول ما بنصحى من النوم لحد ما ننام بس مكناش واخدين بالنا أو واخدين بالنا بس مكناش بنسأل ليه .. أو لما كنا بنسأل مبنلاقيش إجابة فبنقول هي كده.

الراجل ده نموذج مثالي لدكتور الجامعة اللي بحلم إني أشوفه في جامعاتنا المصرية و العربية لأن ساعتها هيبقى حالنا أفضل بكتير أوووي مما هو عليه.

الراجل ده مثلي الأعلي في توصيل العلم .

حتى لما ألف كتاب سماه (for the love of physics )

أولئك الذين جعلوا من العلم شيئاً مملاً ، مجرمون .

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: