رسالة أب لإبنه المستقبلي وتخطيطه لتعليمه ومستقبله 👌🏻

0
31
views

إلى إبني المستقبلي ( إن شاء الله ) : 

– مش هدخلك مدرسة لغات ، عشان مش دي اللي هتخليك برفيكت في الإنجلش ، ولا هدخلك مدرسة أزهرية عشان مش دي اللي هتخليك شيخ و فاهم دينك كويس، خلاصة الـ 12 سنة دول هديهوملك في سنتين تلاتة بالكتير.. مش هسيبك ضحية لمدرس متخلف يشتمك أو يضربك ويجبلك عاهة أو يقتلك بالغلط .. مش هسيبهم يحولوك لمسخ بتجري ورا درجات وخلاص .. مش هسيبهم يدمرولك نفسيتك وثقتك بنفسك عشان تعليم قبل الأخير على مستوي العالم.

– الآلافات اللي هوفرها بدل ما أدفعلك مصاريف مدارس خاصة و دروس خصوصية وكلام فاضي هخليك تاخد كورسات في أنضف أماكن في البلد، هخليك بروفيسور في المجال اللي إنت بتحبه باذن الله وصدقني المدرسة مش هتعلمك لغات، هخليك بردو تاخد كورسات عشان تتعلمها صح.

هخليك تاخد كورسات في أي حاجة حابب تتعلمها رسم، موسيقي، برمجة .. عشان العلم عمره ما كان محصور جوا أسوار مدرسة أو كلية وهشتركلك في نادي نضيف تلعب أي رياضة إنت حاببها.

– مش هجيبلك شيخ يحفظك قرآن .. هجبلك فيديوهات تفسير الإمام الشعراوي كله أو أجبلك شيخ يفهمهولك ويعرفك أصول الدين، وبعد ما تسمع تفسير كل سورة وتفهمها كويس هسيبك تحفظها وهسألك في تفسيرها قبل ما أسمعهالك.. عشان العبرة عمرها ما كانت بالحفظ يابني إنما بالعمل، عندك داعش مليانة بحفظة القرآن ولكنهم أكثر من يسيؤن للإسلام بفهمهم الغلط. 

– أسبوع هخرجك لدريم والأسبوع اللي بعديه للمكتبة .. أسبوع هتاخد لعبة هدية والأسبوع التاني هتاخد قصة هدية ولما تكبر هيبقى كتاب .. لأن أول حاجة هحببك فيها هي القراءة .. وأنا عارف إزاي هحببك فيها .. 

ويوم ما تحبها وتطلب مني تروح المكتبة بدل دريم بارك ساعتها هموت وأنا مطمن عليك ^^

– مش هقولك قوم صلي بدل ما تخش النار، هحاول أعرفك الإله اللي المفروض تروح تقابله وإنت أما تعرفه هتحبه وهتقوم من نفسك تصلي ولو مقومتش هسيبك بس هقوم أصلي قدامك وأكسفك. 

– مش هخليك تتابع أخبار البلد ولا تتفرج على التلفزيون المصري ولا الأفلام المصري ولا تسمع الأغاني الشعبي أبدًا لمصلحتك إنت والله هخليك تتفرج على ناشونال جيوغرافيك مثلاً أو الجزيرة الوثائقية وشوف كرتون براحتك و الأفلام عندك الأجنبي و عيش .

– علاقتي بيك مش هتبقي علاقة أب بإبنه لا هبقى صاحبك اللي تيجي تحكيله صحابك اللي إتعرفت عليهم في النادي .. هبقى أول شخص يجي في بالك تكلمه لو حصلك مشكلة مش آخر شخص . 🙂 

هبقي مبسوط أوي لما أشوفك قدامي شاب واثق من نفسه فاهم دينه صح جسمه رياضي مثقف و عنده معلومات عن حاجات كتير .. طموح و بيعشق القراءة وعنده شغف إنه يعرف أو يتعلم حاجة جديدة كل يوم، أكتر ما هكون مبسوط إنك مقضي حياتك كلها مذاكرة و بتطلع الأول كل سنة و تاخد شهادات تقدير في الإذاعة وتجيب 100% في الثانوية وتطلع الأول كل سنة في الكلية و تتخرج إنسان جواه حشو مناهج عقيمة أغلبها ملهوش أي تلاتين لزمة و تقعد بالحشو ده على القهوة اللي تحت بيتنا ! 

وأولاً وأخيرًا هحاول أسفرك فـب أسرع وقت لـبلد تحترم آدميتك وعقليتك وتقدر مجهودك و أفكارك وتعاملك كـبني آدم له حرية وكرامة وتعلمك صح وتطلعك انسان مبدع عارف هو عايز إيه وبيسعي عشان يحقق اللي بيحلم بيه.  

بس كده

تعليقات الفيس بوك

تعليقًا