أخبار عاجلة
الرئيسية / Blog / شرح مبسط لتوضيح الفرق بين النسبية العامة والنسبية الخاصة ؟؟؟

شرح مبسط لتوضيح الفرق بين النسبية العامة والنسبية الخاصة ؟؟؟

إيه الفرق بين النسبية الخاصة والنسبية العامة ؟

حسيت إن في خلط في المفاهيم عند بعض الناس بين النظريتين دول رغم إن الفرق بينهم 10 سنين وناس كتير سألت السؤال ده فحبيت أوضح الفرق في كلمتين

– النسبية الخاصة لا تتضمن قوة الجاذبية لكن النسبية العامة تتضمنها .

– النسبية الخاصة بتتكلم عن جسم معين بيتحرك في خط مستقيم (يعني إتجاه ثابت) بسرعة ثابتة (سرعة الضوء) .. لكن النسبية العامة بتتكلم عن حركة الأجسام في إتجاهات مختلفة وسرعات متغيرة .. ومعنى إن السرعات متغيرة إن العامة بتتكلم عن (العجلة) على عكس الخاصة اللي بتتكلم بس على السرعة الثابتة يعني العجلة تساوي صفر.

– النسبية الخاصة بإختصار شديد جداً جداً جداً مبنية على فرض و 5 قوانين :

الفرض : إن الضوء هو أكبر سرعة في الكون ومفيش أي جسم يقدر يتحرك بنفس سرعته، وإن سرعة الضوء هو الشئ الوحيد اللي ثابت ثبات مطلق .. غير كده مفيش حاجة تقدر تقول إنها ثابتة لكن تقدر تقول إنها ثابتة ( بالنسبة لي ) يعني إنت متقدرش تحكم على الشئ اللي قدامك ده إذا كان ثابت أو متحرك لأن ده شئ نسبي ما عدا سرعة الضوء، يعني لو إنت قاعد في أتوبيس هتحس إن كل شيء ثابت حواليك بما فيهم إنت بينما اللي واقف على المحطة هيشوفك بتتحرك .. لكن إنت واللي واقف في المحطة أياً كانت سرعتكوا هتشوفوا سرعة الضوء ثابتة ولها نفس القيمة .

1.القانون الأول : إنكماش الطول

لو في جسم بيتحرك في إتجاه طوله .. صاروخ مثله طالع يعني بيتحرك في إتجاه طوله، أو سوبر مان بيطير في إتجاه طوله والقصة بتعته مش بتتغير ..

لو فرضنا إن سوبر مان ده وهو بيطير بسرعة كبيرة جدااً بص تحتيه لقى طيارة بتطير عكس إتجاهه بسرعة كبيرة .. طبعا زي ما إحنا عارفين هيشوف الطيارة بتتحرك بسرعة تساوي ( مجموع سرعتها وسرعة سوبر مان ) وده اللي بنلاحظه في المترو .. لكن الشئ اللي أغلب الناس مش واخدين بالها منه إن سوبر مان كمان هياخد باله إن طول الطيارة بينكمش !!! أها والله هينكمش

وآينشتاين وضع قانون عشان نحسب بيه الطول الجديد بتاع الطيارة اللي سوبر مان هيشوفه

القانون بيقول إن الطول الجديد = الطول الأصلي في جذر (1-مربع السرعة النسبية بين سوبر مان والطيارة مقسوم على مربع سرعة الضوء )

يعني نظرياً لو سوبر مان قدر يطير بسرعة الضوء هيشوف طول الطيارة بيساوي صفر

وطبعاً في حياتنا إحنا مش بنحس بإنكماش الأطوال دي لأن كل السرعات اللي بنتحرك بيها متجيش حاجة جنب سرعة الضوء .. يعني السرعات النسبية بيننا لما تتقسم على سرعة الضوء يطلع رقم صغير جداااً ملهوش لازمة

2. القانون التاني : زيادة الكتلة

نفس المثال اللي فات .. اللي هيلاحظه سوبر مان كمان بجانب إن الطيارة طولها هينكمش إن كتلتها هتزيد .. معرفتش هيلاحظها إزاي بس الطيارة المهم الطيارة كتلتلها هتزيد واللي في الطيارة هيلاحظ كتلة سوبر مان هتزيد بردو .. يعني بقت أوزعة ومقلبظة .. طيب فين القانون اللي نحسب بيه كتلتها الجديدة بعد الزيادة ؟

القانون بيقول إن الكتلة الجديدة = الكتلة الأصلية مقسومة على ( مربع السرعة النسبية بين سوبر مان والطيارة مقسوم على مربع سرعة الضوء )

أيواا كتلتها زاادت مش زي ما الفيزيا الكلاسيكية كانت بتقول إن الكتلة ثابتة

3. القانون التالت كان تعديل لقانون السرعة النسبية .. كنا قولنا فوق إنك لو راكب المترو وعدى مترو جنبك في عكس الإتجاه هتشوفه بيتحرك بسرعة نسبية تساوي مجموع سرعتك وسرعته

طيب إفرض المترو بتاعك بيتحرك بسرعة الضوء والمترو اللي جاي عكس بردو بيتحرك بسرعة الضوء معنى كده إنك هتشوفه بيتحرك بسرعة ضعف سرعة الضوء والكلام ده طبعاً غلط ومتنافي مع إفتراض آينتشاين . فتم تعديل القانون ليصبح السرعة النسبية بين جسمين بيساوي مجموع السرعتين مقسوم على ( 1+ حاصل ضرب السرعتين مقسوم على مربع سرعة الضوء )

4. القانون الرابع وهو القانون اللي إتبنى عليه فكرة القنبلة الذرية وهو اللي عمل علاقة لأول مرة بين الكتلة والطاقة ( E= mc^2 ) .

 يعني الفقد الصغير في الكتلة بيطلع كمية طاقة كبيرة جداً لأنها بتضرب في مربع سرعة الضوء.

5. القانون الخامس وهو تمدد الزمن مع زيادة السرعة

أما النسبية العامة فدي فسرت سبب قوة الجاذبية بين الأجسام الكبيرة …لأن نيوتن وضع القوانين اللي بيوصف بيها قوة الجاذبية رياضياً ولكن مكنش عنده تفسير إيه اللي سبب الجاذبية دي ؟!!

وكأن الشرطة لاقت جثة وعرفت القاتل بس معرفتش ليه قتله طب مش ندمان إنك قتلته !!

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: