الرئيسية / Blog / عشر خطوات للسعادة ..

عشر خطوات للسعادة ..

المقال ده فيه كل حاجه بتفرحني ، للي قاعد زهقان و مخنوق و قرفان من عيشته 

إليك الـ 10 حاجات دول و هتنشكح باذن الله صدقني بس انت كمل المقال 😀 

1- معاك 10 جنيه ؟؟؟ تمام 

شنطه فيها أكل + موبايلك + بلاي ليست محترمه + هاند فري + رواية ( حكايات فرغلي المستكاوي )  

تطلع علي محطه مصر بعد الفجر تقطع تذكره درجه تالته لعروس البحر المتوسط بـ 10 جنيه 😀 

و بعد 3 ساعات بالكتير ان شاء الله هتبقي أعد قدام البحر بكباية الشاي B| أنا في يوم واااحد لما كنت في اسكندريه روحت : قصر المنتزه ( أجمل مكان شوفته في اسكندريه ) ، ميامي ، شارع خالد بن الوليد ، المنشية ، محطة الرمل ، قصر مجوهرات زينزينيا ( كله عبق ) ،مكتبة اسكندريه ، كوبري استانلي ، القلعة ، سان ستيفانو .. مش هتدفع في الليله دي غير مصاريف المواصلات و دخول المنتزه 10 جنيه و دخول المكتبه 2 جنيه و هترجع القاهره بـ 10 زيهم 😀 .. يعني السفريه دي متزدش علي 40 جنيه لو جايب اكلك معاك 😀 

لو هتعد تظبط مع صحابك او استنيت اهلك يشجعوك يبقي أبشر … مش هتروح في حته ^_^ 

2- لو مش هينفع تسافر لاي سبب.. يبقي تركب المترو الخط التاني و تنزل العتبة تركب مكروباص للقلعه، تتمشي فيها شويه و تشوف مصر من فوق >> و اطلع علي حديقه الازهر اعد قدام البحيره التحفه اللي فيها حبتين >> و بعدين اطلع منها اتمشي في الحسين و حلاوة الحسين و اعد ع الفيشاوي بقي و اتفرج ع انشكاح الناس اللي اعده بتلعب طاوله مع ام كلثوم و الشوارع القديمه ساعتها بس هتفهم اغنيه ( فيها حاجه حلوة ) >> الحسين لازقه في شارع المعز ،اطلع ع المعز و اتفرج علي اجمل شوارع مصر بجد و ادخل مسجد الحاكم اتفرج علي روعته ^^ >> و علي بالليل اطلع ع النيل هات حمص و اقعد كله وانت باصص عليه – محدش عارف ممكن يوحشك قدام 😂 >> و في الاخر اطلع ع السينما ادخل فيلم اجنبي حلو ( اوعي تدخل عربي ! اوعي 😀 ) 

3- تابع مسلسل طويل … من اكتر الحاجات اللي بتعزلني عن الواقع المقرف اللي حواليا هو اني اعيش جوا احداث مسلسل اتعرف علي شخصيات جديده .. اضحك اتأثر اندهش احزن .. اعيش جوااه و ساعتها بنسي كل القرف اللي ممكن تضايقني لو اعدت افكر فيها و انا بفضل يكون تركي مترجم عشان استفيد من اللغة كمان 😀 

4- و انت خارج مره اشتري ملبس كتير و وزعه ع الناس اللي تحسها قرفانه و انت ماشي و الاطفال طبعا . انا لما جربت الموضوع ده كنت فرحان اوي بجد 😀 عشان كان اي حد بيبتسم حتي لو كان في قمه قرفه و اعملها مره ع الاقل . هات طفل متشرد كده اعد ف الشارع و دخله مطعم كبير زي كنتاكي او ماك و هاتله اجدع وجبه يطلبها و عايزك بس تتفرج علي الفرحه اللي بتنط من عنيه 😀 

5- عايزك تفتح اليوتيوب و تجيب افلام الكارتون اللي كنت بتشوفها زمان تسمع التترات بتاعتها ( رشا رزق مش هقول اكتر من كده 😀 ) زي ده مثلا >> https://goo.gl/qderWE و اتفرج علي حلقات منها صدقني في مشاهد هتحس و كأنك لسه شايفها امبارح 

و هات اغاني رمضان اللي كنت بتعشقها زي البلاي ليست التحفه دي مثلا >> https://goo.gl/gWc6ak 

و تتر بكار بقي و المغامرون الخمسة و عالم سمسم و كل ذكرياتك اللي متتنسيش هتحس بحاجات جميله اوي 😀 

6- هو طلب غريب شويتين ! بس زور المقابر و لو مره كل فتره .. 

لما كنت بقرأ في علم النفس كانو بيقولوا ان في معلومات في ذاكرتنا احنا بنبقي عارفينها بس من كتر ماهي محطوطه في فايلات قديمه مركونه و متفتحتش بقالها سنين بنتناساها . حاول تروح و تقف شويه قدام الحفره اللي كلنا هننام فيها و افتح الفايل ده و نشطه في عقلك و ساعتها عايزك تفكر بقي في صاحبك اللي شاف المسج و عمل Seen و مردش و فكر في السنة اللي عديتها او الماده اللي شيلتها و فكر النتيجه اللي خايف منها و في اللي قالك كلمه ضايقتك و فكر في كل الاسباب اللي مضيقاك و قلقاك ، صدقني هتحس انها صغيره اووي و ملهاش أي تلاتين لازمه .. و انا بقرأ في رواية مش فاكر اسمها كانت في جمله جميله قرأتها ( هانت الدنيا في عينيه فـ هان كل ما كان يقلقه و يؤرق نومه ) و انا بتفرج علي فيلم a christmas carol في آخره البطل الكئيب اللي كانت حياته بائسه كان بيحلم انه مات خلاص و عمال يرفص في السرير و بتاع و يقولهم سيبوني لا انا عايز اعييش و لما وقع من على السرير و اكتشف انه لسه عايش و لسه قدامه فرصه اتغير 180 درجه و بقي يعمل كل الحاجات المجنونه الي مكنش يحلم انه يعملها لدرجه انه من كتر الفرحه نزل يلعب مع الأطفال في الشارع و يتزحلق معاهم ع التلج 😀 و مبقاش يركز في أي حاجه تضايقه مهما كانت .. الحياه قصيره اووي والله مش مستاهله كآبة ^^ 

7- قابل ناس قديمه .. مدرس ليك في ابتدائي بقالك كتير اوي مشوفتهوش او صاحب ليك مسمعتش صوته من فتره طويله اوي .. زور الاماكن اللي كنت بتروحها كتير و انت صغير هتلاقي ذكريات كتير ليك في كل شبر فيها 😀 الاماكن اللي كنت بتتنطط و تلعب فيها اعد في الاماكن دي و استرجعها هتحس بحاجات كتير جميله 😀 

8- اتعلم لغة الاشاره ( لغة الصم ) و جرب تروح مره دار للصم و تحاول تتكلم معاهم و تهزر معاهم و تقضي اليوم معاهم . او روح مره دار ايتام حاول ترسم علي وشهم ابتسامه لان دول معندهمش حد يسالهم كل يوم عملتوا ايه النهارده وهتفطروا فين في رمضان و هتخرجوا فين في العيد ؟ و اتصاحب علي طفل من هناك اتبناه 😀 ( اتبناه روحيا ) صدقني اخر حاجه بيحتاجوها هي الفلوس .. المهم اتبناه بالاهتمااام و اتصل اسال عليه كل فتره ^^ 

9- اقفل التلفزيون ، ولع في التلفزيون ، متتفرجش علي النشره متسمعش أي أخبار تخنقك و تجبلك اكتئاب متابعش صفحات ولا اشخاص تقرفك في عيشتك ، ممكن تدخل تشوف الشخص اللي بيتكلم عنه البوست ده هتفطس من الضحك >> https://goo.gl/YF2EDK  

10- كل اللي فوق ده مش هيفرحك لو انت بعيد عن ربنا الكلام ده ليا قبل اي حد والله لاني اكتر واحد مقصر مع ربنا و اول ما بقرب منه والله بحس بفرحه من حيث لا احتسب و سعاده من غير سبب .. زي بظبط ما كنت بصحي و احس اني مخنوق من غير أي سبب !! 😀 جرب تروح تصلي في السلطان حسن او مسجد الحسين ، جرب تسمع تواشيح للنقشبندي مثلا زي دي >> https://goo.gl/UPbf0K و حبه قران كده بصوت ناصر القطامي او العفاسي او عبد الله كامل او عبد الباسط او مصطفي اسماعيل او مشاري البغلي .. جرب تحضر درس ديني او تسمعه زي درس الشخص المحترم اللي بحبه Moh.Elghaleez محمد الغليظ ..

و أخيرا : اللهم ارزق كل واحد بسعاده زي سعادة ويل سميث في المشهد ده 😀 😀 

تعليقات الفيس بوك

تعليقًا

عن

شاهد أيضاً

فرحة العيد في عيون الأطفال : دعوة لأخذ الأطفال مثال لخلق الفرحة والسعادة من أبسط الأشياء !!!

جاء يوم العيد، يوم الخروج من الزمن إلى زمن وحده لا يستمر أكثر من يوم. …

%d مدونون معجبون بهذه: