أخبار عاجلة
الرئيسية / Blog / فرض الحجاب في الإسلام ؟؟

فرض الحجاب في الإسلام ؟؟

قالتلي أحمد في سؤال مضايقني بصراحة ومش بقتنع بإجابته أبدًا، هو ليه ربنا فرض علينا الحجاب؟ يعني مش المفروض الناس تعاملني بناءًا على تفكيري مش لبسي؟ يعني أنا بني آدم حر مش حاجة عيب المفروض نغطيها مراعاة لمشاعر الشباب .. ما أنتوا مش حيوانات بردو والمفروض تتحكموا في شهوتكوا وتغضوا بصركوا واللي يتجاوز حدوده يتحاسب زي البلاد المحترمة.. أياً كان اللي إحنا لابسينه ! ولا إيه؟

 

قولتلها بصي أولاً أنا لست أهلاً للسؤال في أمور الدين، والمفروض إننا نطيع ربنا وإحنا مؤمنين إن ده الأصلح حتى لو لم ندرك حكمته ، ولكن أنا حابب أكلمك في 4 نقاط هي مجرد وجهة نظري التي لا قيمة لها فممكن تكون خطأ تحتمل الصواب أو إجتهاد شخصي للعبد الفقير لفهم حكمة القدير في فرض الحجاب.

 

عارفة يوم ما ربنا أنعم عليَّ ودخلت كلية الهندسة كنت مبسوط جدًا وفخور جدًا بإنتمائي لكيان المهندسين..ولأول مرة إتمنيت إن الكليات يبقى ليها زي رسمي (يونيفورم) عشان أي حد يشوفني في الشارع يعرف كليتي! أول مرة روحت الكلية بالمسطرة الـ T كنت مبشكح أوي ونفسي الناس كلها تشوفني وكنت بتلكك عشان أطلع كارنيه الكلية في أي موقف حتي لو ميستدعيش أوي.

 

ده ديمًا بيكون شعور الشخص اللي ربنا بينعم عليه بنعمة كبيرة أوي ويكون فخور بيها فبيبقي نفسه يقول للناس كلها عنها.

 

كذلك المسلم اللي شايف الإسلام أعظم نعمة من ربنا وكفى بها، هتلاقيه فخور جدًا بدينه وبإنتمائه لأمة محمد – صلي الله عليه وسلم – ومن جواه نفسه يبقى مختلف، مميز .. نفسه يعرف الناس كلها إنه مسلم بمجرد النظر.. نفسه يعلن للعالم كله إنه من أمة محمد ولي الفخر .. إني من خير أمة أخرجت للناس..

 

كذلك حجابك – أو زيك الإسلامي المحتشم – هو إعلان رسمي صامت إنك مسلمة وموحدة بالله ومن أمة النبي .. مش مكسوفة ولا محرجة ولا خايفة تبيني ده حتى لو كنتِ في بلد أجنبية وكل من حولك غير مسلمين فـانتي مش خايفة يقولوا عليكِ إرهابية داعشية .. مش خايفة يضطهدوكي .. مش خايفة من أي شيء لأن الله – جل جلاله – معكِ.. بل كلك فخر وعزة بإنتمائك لأمة المختار صلي الله عليه وسلم.. أي نعم الحجاب موجود في كل الديانات السماوية ولكن ما نراه في عالمنا الآن شرقاً وغرباً أن المسلمات فقط من يلتزمن به فأصبح صفة يميزها ولا يختلف عليها إثنان.

 

عشان كده أمر الرجال بإطلاق اللحية وخف الشارب ومخالفة المشركين وفي رواية أخرى لعدم التشبه باليهود.وفي رواية خالفوا المجوس . يعني النبي حريص كل الحرص على أننا نكون مميزين ومختلفين ظاهرياً وباطنياً بأخلاقنا الحسنة وتعاملنا اللين.

 

=================

 

أما النقطة التانية واللي شايفها أهم نقطة وممكن نكتفي بيها، لازم نبقى عارفين أن الدنيا دار إبتلاء أي أن الغرض منها هو الإختبار .. أي إختبار؟ .. إختبار أيهما سترجح كفته: ( الجانب الروحي – الجانب الحيواني ) ؟؟

 

 إتباع أوامر الله .. أم إتباع شهوات النفس؟

 

دائمً هتلاقي العبادات وأوامر ربنا هدفهم السمو بروحك و تهذيب شهواتك وتمرينك على التحكم بها! فالصوم مثلاً تمرين على التحكم في شهوة الأكل والشرب والجنس ودول أقوى 3 شهوات بتغذي جانبك الحيواني! الزكاة للتحكم في شهوة حب إمتلاك المال وجمعه.. الصلاة للتحكم في شهوة الإرتكان إلى الراحة والخمول غير إنها مقابلة مع الخالق سبحانه وتعالي.

 

طيب وإنت أكتر شهوة عندك إيه ؟؟؟؟

 

أينعم، شهوة التزين .. أكتر حاجة هتشتهيها هي الشوبينج، اللبس والميك أب والشعر والإكسسورات ، لأن الأنثى بطبيعتها بتحب إظهار جمالها ولفت الإنتباه، بتحب إحساس إنها مرغوبة والعيون عليها، ونظرات الإعجاب بتحاوطها .. نعم هكذا جُبلت نفوسهم، فتلك عند النساء شهوة أشد من شهوة الجنس.

 

عارفة عشان كده ربنا لما حب يشوَّق المرأة للجنة مشوقهاش بحور عين من الرجال مثلاً .. بل شوقها بالزينة: (عاليهم ثياب سندس خضر وإستبرق وحلوا أساور من فضة)

 

أما الراجل شوَّقه بحوريات فائقة الجمال؛ لأن دي أشد شهوة عنده، والدليل أن النبي قال ما تركت فتنة أضر على الرجال من النساء ( ومقلش العكس )

 

فكان الإختبـــــــار من عين الشهوة الأقوى والأشد ..

 

فكان إختبار الرجل هو غض البصر لأن البصر هو أول سهام الشيطان فإذا نظر اشتهت نفسه .

 

وكان إختبار الأنثى نفس الشيء وهو غض البصر

 

والإختبار الأهم والأقوى:

 

(ألا يبدين زينتهن) !! .. نعم هي جميلة بالحجاب ولكن هي أجمل بكتير بدونه؛ وهنا يكمن الإختبار.

 

فـأي الكفتين سترجح ؟

 

=====================

 

النقطة التالتة أن الممنوع دائمًا مرغوب.

 

عارفة لما تدخلي مكتب حد وتفتحي الأدراج تلاقيها كلها بتفتح ما عدا واحد مقفول فتهملي اللي اتفتحوا أو تبصي عليهم بصة سريعة وتبقي هتتجنني وتفتحي الدرج المقفول ده والفضول هيقتلك؟

 

طبعًا ده تشبيه مجازي فقط عشان أوصلك الفضول اللي بيتولد عن الشئ المحجوب عنك، ده أقرب لإحساسنا كشباب لما بنشوف بنت ما شاء الله عليها بحجابها الشرعي السليم الذي لا يصف ولا يشف وليس زينة في ذاته، أقسم بالله بيبقى ليها رونق خاص وجاذبية خاصة كده الشاب اللي زيي يحسها.. فالحجاب ترغيب عكسي ( من وجهة نظري ) متوافق مع سيكولوجية البشر.

 

====================

 

أما الأخيرة فـخلينا متفقين إنك فلما تغطي مظاهر جمالك وأنوثتك وزيـنتك ومفاتنك فـأنتِ بتجعلي اللي قدامك يشغل حاسة السمع أكتر من حاسة البصر ..فـلو أعجب بيكِ هتكوني عارفة إنه أعجب بفكرك وشخصيتك وعقلك قبل ما يعجب بجسمك وهيئتك.. وهيبقى عندك كروت أخرى تبهريه بيها لسه مشفهاش.

 

يعني أوضحهالك بمعني آخر، فرق كبير بين اللي يقرألك بوست فيبعتلك أدد وبين اللي يشوف صورتك فيبتعلك أدد.. وصلت ؟

 

====================

 

• الحجاب مش عشان إنتِ جوهرة ولازم نخبيكي.

 

• الحجاب مش عشان إنتي حاجة عيب وشيء مثير للشهوة ولازم نغطيكي مراعاة لمشاعر الشباب ..

 

الشباب يغض بصره واللي يتجاوز حدوده ياخد بالجزمة ويتحاسب في أي بلد محترمة أياً كان اللي إنتي لبساه.

 

• الحجاب مش عشان الأخ بيختار الشكولاتة المقفولة مش المفتوحة وملموم عليها الدبان :3 ولا عشان بيجرب روائح كتير بس لما بيشتري بيقوله هات واحدة مقفولة فهو يجيبله مفتوحة على إنها مقفولة

 

• الحجاب مش مقياس للإحترام والعفة أبداااً.

 

لأن في بنات كتير محترمة جداااً ومش محجبة والعكس صحيح ..

 

• إنما الحجاب مقياس لتمسكك بأوامر ربنا وإجتنابك نواهيه .. مقياس لمجاهدتك نفسك ومقاومتك لشهوتك .. مقياس لإعتزازك بدينك وبمظهرك الإسلامي وفخرك بإنتمائك لأمة النبي .. مقياس لزهدك في الدنيا ولذَّاتها ورغبتك في الجنة (اللي مش ببلاش)..

 

• الحجاب مش بالعافية والضرب، ولا عشان هي كِبرت فلازم تلبسه، ولا عشان يحميها من التحرش لأن المتحرش شخص مريض نفسي فاقد للثقة بنفسه مجرد كلب يلهث وراء أي أنثى أيًا كانت اللي لابساه إيه.

 

الحجاب أجمل وأسمى من تلك التراهات، فكفاكم تشويهًا لمعاني إسلامنا بأفكاركم المغلوطة المنفرة وتقاليدكم المشوهة ظنـًا منكم أنكم تحسنون صنعًا .

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: