أخبار عاجلة
الرئيسية / Blog / لغة الرياضيات ..

لغة الرياضيات ..

عجبني أوي المشهد ده من الفيلم 

ستيفن هوكينج في الفيلم جاله فكرة أو تصور عن بداية الكون .. 

طبقا لنظرية الإنفجار العظيم فإن الكون ده كله كان جزء واحد شديد الكثافة والحرارة العلماء سموه ( التفرد – singularity ) 

وطبقا لنظرية الثقوب السوداء فإن في مركز الثقب في نقطة بينهار فيها الزمان والنقطة دي العلماء بردو سموها ( التفرد – singularity ) 

فـ ستيفن في الفيلم لما حط الجملتين دول قدامه ، في لمبة نورت في دماغه .. ! 

فجري ع الكلية ودخل ع الدكتور بتاعه وحصل الحوار الاتي : 

ستيفن : اذاً الكون نشأ من انفجار الثقوب السوداء ! 

الدكتور : كمّل .. 

ستيفن : ايه بـ ” كمل ” ؟؟! انا بحاول اوضح سبب نشأة الكون !  

الدكتور : لالالا ، كمل بتوضيح المعادلات الرياضية :)) 

وهنا لافتة جميلة جدا ومهمة جدا ، فعلا يا دكتور كلام ستيفن أو غيره في العلم محدش هيلقي له بالا إلا بالمعادلات، “الفرضيات” سهلة يا عزيزي لكن انك تثبتها وتحولها لـ”نظريات” دي اللي صعبة، وساعتها بس الناس هتبدأ تسمعلك، لأن الرياضيات هي اللغة اللي العلماء بيتكلموا بيها، مينفعش تبحر في العلوم دي ولا تتفاهم مع العالَم ده غير لما تكون بتجيد اللغة اللي بيتكلموا بيها. 

فضلا عن انها السبب الأساسي اللي خلاك قادر تقرأ البوست ده دلوقتي .. لكن كمان هي اللغة اللي نقدر نوصف بيها جمال الطبيعة و نشوف بيها عظمة وإبداع الله ودقته المتناهية في خلقه.  

العالم العظيم جاليليو كان بيقول : 

المبادئ الرياضية هي الأبجدية التي كتب بها الله هذا العالم، وبدونها سوف يكون صعبا علينا أن نفهم كلمة واحدة من كتاب الطبيعة. 

.

وأنا صغير كنت ديما ساخط علي الرياضيات وكان ديما سؤالي الدائم والمتكرر (لزمتها ايه ؟) استفدت انا ايه في حياتي لما أحل المعادلات دي واطلع قيم للـ unknowns اللي فيها ؟؟ 

بس لما كبرت عرفت إن دي أكتر مادة نمّت عقلي وأسسته علي التفكير العلمي السليم وعودتني إن أي مشكلة في حياتي ليها كذا حل بس في حل أقصر من التاني وهيريحني كتير! 

عرفت إن دي أكتر مادة خلت تفكيري مش سطحي أو ساذج ناحية أي حدث يحصل قدامي.

ولما كبرت أكتر ودخلت الكلية عرفت إن كل اختراع سهّل علينا حياتنا وكل مظاهر التكنولوجيا اللي حوالينا دي ماهي إلا بناء أساسه هو الرياضيات ومن غيرها لم يكن ليُبني فيه دورًا واحدًا .. وأدركت إن الحياة دي ما هي إلا أرقام ومعادلات. 

.

فلو حبيت ترمي كل خلفيتك المشوّهة عن العلم ده وتدرسه من جديد، فـ سلمان خان قدملك كنز جاهز وببلاش .

كل منهج الرياضيات من أول العمليات الحسابية إلي الجبر الخطي اللي بيتدرس في الجامعات. مرورًا بالتفاضل والتكامل وهو أحد أهم أعمدة هذا العلم هتلاقيه مشروح بطريقة ممتعة ومبسطة جدًا في فيديوهات قصيرة بلغة بسيطة جدًا جدًا .. ومن غير زحمة لينكات، هو لينك واحد فقط تدخل عليه وتاخد كل عنوان بالترتيب 

اللينك: https://www.khanacademy.org/math 

طبعا الموقع اصلا تحفة ومشروح فيه علوم كتير مختلفة ممكن تاخد فيه لفة مش هتندم .

وممكن تلقى نظرة علي الكتاب الرائع جدًا جدًا ده : https://goo.gl/Y7y8ON 

أما الناس اللي عندها فكرة عن الرياضيات من منهج ثانوية عامة فموقع شمسنا العربية ترجم 3 كورسات من جامعة MIT العالمية عن الرياضيات ، اظنهم مفيدين جدًا تقدر تبدأ فيهم 

المعادلات التفاضلية : https://goo.gl/mWpJoQ 

التفاضل والتكامل بمتغير واحد : https://goo.gl/xqJwqr 

التفاضل والتكامل بعدة متغيرات : https://goo.gl/35rB9k 

ولما تغرق في العلم ده هتصدق ريتشارد فاينمان لما قال : 

لا يمكننا شرح العالم، ونقل الشعور بجماله لمن لا يملك معرفة عميقة بالرياضيات.

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: