لو مفيش فيس خالص هتقضي وقتك في ايه ؟؟

0
1248
views

من فترة في بنت قريبتي جات بتقولي انا جالي اكتئاب من الفيس ده وعايزة اقفله فترة محترمة بس خايفة لو قفلته احس بفراغ جامد فارجع افتحه .. 

قولي يا أحمد لو مفيش فيس خالص هتقضي وقتك في ايه ؟؟

 

سكت كده لفترة فقالتلي يابني متحاولش انا لما فكرت ملقتش حاجة تتعمل فعلا ! 

فقولتلها بتعرفي تعدي لكام ؟ 😀 .. قالتلي بس قول .. قولت اوك 

1. هدخل اوضتي واطفي النور وهحط الهيد فون في ودني وهتفرج علي الفيلم ده للمرة ال 19 تقريبا >> https://goo.gl/nZ0lcK

2. هبدأ في كورس برمجة عشان نفسي أصمم موقع أو أصمم لعبة .

.

3. هعمل فيديوهات شرح للمنهج اللي بدرِّسه بس بطريقتي وزي ما أنا نفسي يتشرحلي . 

.

4. هجرب أتعلم الطبخ وأعمل الاكل ولو مرة من نفسي  

.

5. هتعلم اردوينو ولغات تانية عشان اصمم روبوت بنفسي 

.

6. هبدا اقرا الكتب الكتيييير اللي حملتها ولسه مبدأتش فيها 

.

7. هجيب بذور وازرع نبات عندي ف البلكونة واصحي كل يوم اسقيه

.

8. هجيب حوض سمك و اصحي كل يوم اأكلهم  

.

9. هحاول احسن الانجلش بتاعي بكل الطرق الممكنة سواء كورسات او ممارسة او استماع او قراءة .

.

10. هتعلم العزف علي اله موسيقيه 

.

11. هشترك في نادي والعب كونغ فو والعاب قوى وسباحة وركوب خيل .. وهلعب اللعبة اللي بعشقها اكترر . 

.

12. هبدا اتعلم ماكيت عشان اعمل ديزاين لبيتي المستقبلي ان شاء الله   

.

13. هبدا اتعلم لغه الصم عشان اروح لدار الصم واحاول اتكلم مع الاطفال اللي هناك وافرحهم

و هشترك في اي جمعيه خيريه رساله مثلا او ازور مستشفي 57 او دور ايتام اقضي يوم هناك. 

.

14. هبدا اتعلم فوتوشوب بدل ما بتحايل علي صاحبي عشان يعملي صوره واتقن الاوفيس كويس جدا.

.

15. هنزل مره و اركب اول اتوبيس يقابلني من غير ما اعرف هو رايح فين و انزل في الاخر و استكشف اماكن اول مره اشوفها  

.

16. هكلم صحابي اللي بقالي كتير مشوفتهوش والمهم ونقعد سوا و كمان هزور بردو الناس اللي مشوفتهمش بقالي فترة زي المدرسين بتوع ثانوي واعدادي وابتدائي . 

.

17. هحاول اتغذي علي المقالات بقي والوثائقي وتيد .. أأزأز فيهم وانا قاعد . 

.

18. هبدا اراجع علي القران اللي حفظته وابدا احفظ جديد .. وهبدأ اتفقه اكتر فـ العلوم الشرعية 

.

19. هجرب اتعلم رسم ، وخصوصا الرسم ثلاثي الابعاد اللي مبهور بيه ده  

.

20. هحاول اتعلم الخدع السنيمائيه دي بتتعمل ازاي ؟؟ وخدع الساحر بتتعمل اازاي ؟ عشان ازاول بيهم ناس 

.

21. هاخد كورس اسعافات اوليه عشان لو حادثه حصلت قدامي لا قدر الله اعرف اتصرف .

.

22. هطلع رحله لمكان جديد مروحتوش قبل كده خالص بس هروحه من غير موبايلات ولا نت هكون ف عزله تامه استمتع فيها بالطبيعه اللي خلقها ربنا وبسس  

.

23. ممكن اجرب احضر فرح لناس معرفهاش و اكل و اشرب الحاجه الساقعه و امشي ! 

.

24. وممكن اجرب ادخل عزى واغمض عيني و اسمعلي حبه قران و اسلم و امشي ! 

.

25. هحاول امارس اليوغا عشان قرأت عنها فوائد كتير اوي بس مبعملهاش !! 

.

26. هبدأ احضر دروس دينية في شيخ العمود مثلا .

.

27. هروح الاوبرا اللي مروحتهاش قبل كده واسمع حبه مزيكا نضيفة بدل التلوث السمعي اللي حوالينا ده 

.

28. هتعلم ازاي اعرف الاتجاهات عن طريق النجوم ، او اعرف الوقت عن طريق الظل بتاعي 

.

29. هحاول بكل قدرتي اشتري تليسكوب او احاول اعمله في البيت واسهر طول الليل اتفرج علي النجوم بقي من قريب اوي واتفرج علي القمر وتضاريسه وباقي الكواكب ^^ .

.

30. هقضي وقت اكبر في الحتت القديمة اللي زي الحسين والمعز والسيده زينب و اقعد في قهوه الفيشاوي مع اغنيه ام كلثوم في الخلفية واتمشي في الحواري الصغيره اللي بحس فيها بدفي كده و طعم مبحسهوش غير فـ الاماكن دي اللي مليانه عبق و اروح اصلي في مسجد السطان حسن مثلا او مسجد الحسين  

31. هشتري نوت خاص بيا هكتب فيها اي فكره تجيلي حتي لو تافهه سواء في الشغل في المواصلات في الحمام لو جاتلي في اي وقت هكتبها يمكن بعدين الفكره دي تبي بذره مشروع حياتي و اكتب فيها اي معلومه جديده عرفتها اي كلمه جديده سمعتها اي مصطلح جديد فهمته اي اسم لشخص ناجح او مهم بالنسبه لي اي موقع سمعت عنه حتي لو هكتب فيها خواطر لي . 

.

32. هشتري كاميرا و الف بيها القاهرة واصور كل المعالم اللي فيها و الاماكن الجميله و اعمل البومات صور للبلد من تصويري انااا  

.

33. هبدأ اكتب سلسلة كتب خاصة بيا ابسط فيها العلم اللي بدرسه يمكن حد يستفاد منها . 

.

34. هجرب حاجه جديده زي القفز بالباراشوت مثلا، او اروح سباق عجل .. 

.

35. هشتري سكتشات لرسمات كتير ابيض و اسود و اشغل موسيقي هادية او اشغل الست واقعد الونها علي مزاجي بقي واطلع الفنان اللي جوايا .

.

36. هشتري لوح خشب كبييير و هحطه في اوضتي و اعلق عليه كل الصور اللي اتصورتها .. ايوا انا عارف انها ع اللاب او ع موبايلي بس اما الواحد يشوف ذكريات حياته قدام عينه كل يوم و اللحظات اللي ضحكت فيها من قلبي ده احساس تاني خاااااااااالص 

.

37. موقع IMDB عمل ليست باكتر 250 فيلم الناس اجمعت عليهم كافضل افلام علي الاطلاق هحاول اتفرج عليها كلها …. الليست اهي >> http://goo.gl/K4S0Sk

.

38. هحاول اقرا الكتب اللي الجارديان حطيتها في الليست بتاعتها دي : http://goo.gl/At0u1j

.

39.هتعلم شيفره مورس مثلا و اعلمها لصاحبي او خطيبتي او مراتي المستقبلية ، الموضوع ده ممتع جداا يخليك تبعت مسج لحد وانت مش شايل هم حد تاني يقرا المسج دي غيره لان انتو الاتنين بس اللي هتكونو فاهمين المسج في افكار كتير للشفرات دي اكسر بيها روتين المسجات الرتيبه . 

.

40. هحاول مرة اصطاد ! نفسي اجربها مرة 

.

41. هتعلم طرق الهاك . او الاختراق .. مش عشان استخدمه في الشر لا سمح الله بس عشان اعرف اللي ناوي يستخدمه في الشر هيفكر ازاي واعرف احمي نفسي .

.

42. هشتري الجرايد و العب الكلمات المتقاطعه دي . ايوا لعبه قديمه بس هتخلي عندي معلومات كتيير جداااا و هتخليني ابحث وادور واعرف اكتر ع الاقل قبل ما انام هلاقي نفسي عرفت معلومه جديده وان اليوم ده مرحش هدر 

.

43. هحاول احضر محاضره في كليه غير كليتي زي علوم قسم فلك مثلا <3 .. محاضره سيره نبويه في الازهر محاضره تشريح في طب اتعرف علي جسمي اللي بقاله سنين عايش معايا بنية ( و في أنفسكم أفلا تبصرون )  

.

44. هادخل اقلب في البيدج التحفه دي >> https://goo.gl/eO0qG5 

و اشوف الاماكن الخياليه اللي مكنتش متخيل ان الاماكن دي موجوده علي كوكب الارض اصلا  

.

45. بما اني بعشق الخط العربي هحاول انزل ورش تعليم الخط و اتعلم كل الخطوط العربيه و الزخرفه الاسلاميه 

.

46. هنزل في يوم من الصبح بدري اطلع ع الاهرامات واقعد اتامل فيها شويه و بعدين اطلع علي حديقه الحيوان واجيب فشار واقعد اتفرج علي القرود و الحيوانات و بعدين اطلع علي النيل واقعد آكل وقدامي النيل كده واستمتع بالمنظر المريح ده وبعدين بالليل ادخل سينما لفيلم اجنبي وابسط نفسي واشرب عصير قصب و أروح 

.

47. هبدا استعد لرمضان من صيام وذكر وقران وكده واحاول اصلي في اكتر مساجد مشهوره في مصر، لان كثرة الاماكن هتشهد لي يوم القيامة :)) . 

.

48. وانا بقرا القران هكتب الايات اللي هحسها رسايل من ربنا ليا في ورقه صغيره و هكتب جنب الايه اسم السوره و رقم الصفحه .. و احط الورق الصغير ده في برطمان كده واول ما اصحي قبل ما ابص في الموبايل هاخد ورقه من البرطمان و اشوف ربنا بعتلي مسج ايه النهارده و بعدين افتح المصحف علي رقم الصفحه و اقرا الصفحه دي كـ وِرد يومي . و برطمان تاني اعمله للاحاديث النبويه كل يوم آخد حديث و احفظه و صلي ع النبي بقي لمده عشر دقايق الصبح .

.

49. هتعلم ازاي افلام الكارتون دي بتتعمل ؟؟ ع الاقل لو طفل فكر يسالني ازاي بتتعمل اعرف ارد عليه :)) 

.

50. هحاول اروح مسجد احفظ الاطفال قران او اروح حضانه اعلم الاطفال انجلش او عربي او حساب ايا كان العلم اخد عليه ثواب . 

وغيرهم كتير، الحياة مليانة حاجات كتير اوي ممتعة ممكن تتعمل وتخليك سعيد ومستمتع علي طول بس احنا اللي ضيقناها علي نفسنا في مجرد شاشة، عشان كده منلمش إلا أنفسنا لو جالنا اكتئاب :)) 

ومعرفش ليه قريبتي فضلت مبتسمة وساكتة مبتتكلمش.

تعليقات الفيس بوك

تعليقًا