أخبار عاجلة
الرئيسية / Blog / ليه ؟؟؟بداية المعرفة بتبدأ ب (ليه) حاجات بسيطة بتحصل كل يوم اعرف سببها من هنا 👇🏻

ليه ؟؟؟بداية المعرفة بتبدأ ب (ليه) حاجات بسيطة بتحصل كل يوم اعرف سببها من هنا 👇🏻

أنا حضرت كمية تجارب علمية إتعملت قدامي الفترة اللي فاتت عجبتني جدااً بصراحة، و بما إن زكاة العلم نشره .. فأنا حابب ابدأ في سلسلة كده هسميها #ليه ؟ .. لأن أي واحد عنده شغف بالعلم لازم هتلاقي الكلمة دي على لسانه ديماً لازم تلاقيه بيسأل على طول و عايز يفهم اللي بيحصل حواليه ده بيحصل ليه ؟ 

فإحنا هنحاول نبعد عن الكتب و المراجع و المصطلحات المعقدة دي و نبص على العلم حوالينا و نسأله ليه ؟ 

فنبدأ النهاردة بسؤال خفيف ظريف ..

ممكن تقوم دلوقتي تدخل المطبخ ؟؟

ولع عين البوتجاز .. و بعدين حاول تقرب إيدك من النار من الجنب .. يعني حاول تحوط على الشعلة بإيديك من الجنب .. هتلاقي نفسك قادر تقرب إيدك أوي من النار من غير ما تحس بحرارتها .. واللي بيدخن هتلاقيه و هو بيولع السجارة قادر يحوط على الولاعة بإيده أوي من الجوانب و مش بيحس بحرارة النار أوي . 

في حين إنك لو حطيت إيدك على النار من فوق هتحس بالحرارة من بعيد … يعني لو قربت إيدك من النار من فوق مش هتقدر تقرب أوب زي ما كنت قادر تقرب إيدك من الجنب .. طب ليه ؟؟

ببساطة لأن الهوا اللي بيحيط بالنار من الجوانب بيسخن صح ؟؟ طب لما بيسخن بيروح فين ؟؟ 

بيطلع فوق ، طب ليه ؟؟ 

لأن في قاعدة في الفيزياء الحرارية أوالديناميكة الحرارية مشهورة أوي بتقول : 

( الهواء الساخن كثافته قليلة فبيطلع لفوق و الهواء البارد كثافته كبيرة فبينزل لتحت ) 

و بالتالي كل لما الهوا اللي على جانبي النار يسخن يطلع لفوق و بالتالي المنطقه اللي بتحيط بالنار من الجوانب حرارتها مش بتكون عالية فبنقدر نقرب إيدينا أوووي و نحوط على النار أو ع الكبريت عشان ميطفيش 

وبما إن الحرارة كلها و الهواء الساخن بيطلع لفوق، عشان كده مش بنقدر نقرب إيدينا من النار من فوق 

القاعدة دي بقي ليها تطبيقات كتير حوالينا بس إحنا مش بناخد بالنا منها .. زي مثلاً 

ليه التكييف بيتحط في الشقق فوق ؟؟ لأن الهوا البارد كثافته كبيرة فبينزل يسقع الأوضة لكن لو التكييف على الأرض هيسقع الجيران اللي تحتينا 

و كذلك الدفاية ليه بيُـفضل تكون ع الارض ؟؟ عشان الهوا السخن يطلعلنا فوق فيدفينا .. إنما لو الدفاية فوق هتدفي الجيران اللي فوقينا ( عشان كده الناس اللي بتشغل التكييف في الشتا ع السخن بيلاقوه مبيعملش حاجه فيفتكروه بايظ .. 

و كمان بيستخدموا القاعدة دي في المنطاد اللي بيطيروا بيه .. بيملوا المنطاد ده بالهواء السخن و بالتالي الهوا هيبقى عايز يروح فين ؟؟ يطلع فوووق فيروح رافع المنطاد لفوق بالناس اللي عليه و بعد ما تخلص رحلتك يبطل يسخن الهوا اللي جوا لحد ما الهوا في المنطاد يبدأ يبرد و بالتالي المنطاد يبدأ ينزل للأرض :)) 

عشان كده متستغربش لما تلاقي الناس بترش مياه قدام المحلات في الأيام الحر الناس دول مش مجانين .. لأن الأرض في الأجواء الحارة بتسخن طيب الحرارة اللي عندها هتوديها فين هتطلع علينا فلما نرش عليها مياه ساقعة بالنسبة لها هتقلل الصهد اللي طالع ده و ترطب الجو حبتين 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: