أخبار عاجلة
الرئيسية / Blog / ليه الحكومة متطبعش فلوس كتييير ؟؟؟

ليه الحكومة متطبعش فلوس كتييير ؟؟؟

سؤال لاقيته إتكرر في بيدجات كتير الفترة الأخيرة بعد ما الدولار بقى بـ 9 جنيه و ناس بتسأل بجد و مش فاهمة 

ليه الحكومة متطبعش فلوس كتييير و كله يبقى غني بقى .. إيه المشكلة ؟؟ 

طيب خلينا الأول نوضح القانون الرسمي لأي إقتصاد في العالم و هو قانون العرض و الطلب .. يعني إيه ؟ 

إيه اللي بيخلي الدهب غالي و عصير القصب رخيص ؟؟ 

ببساطة بسبب ( النُدرة ) .. يعني كمية الدهب اللي في السوق قليلة و نادرة فالطلب عليه بيزيد و بالتالي سعره بيزيد .. إنما القصب مرطرط في كل حته فالطلب عليه بيقل فسعره بيقل .. فلو حضرتك طبعت فلوس بزيادة و رطرطت في السوق قيمتها هتقل 

قيمتها بتقل إزاي يعني ؟؟

مش ساعات والدتك تقولك هي الدنيا حصل فيها إيه ؟؟ أنا كنت زمااان بنزل السوق بـ 10 جنيه أجيب طبيخ و لحمة و رز وآخد الباقي و أرجع دلوقتي بنزل بـ 100 جنيه و تخلص في ساعتها البركه قلت :

لا يا حجه البركة مقلتش … أومال إيه الموضوع ؟؟ 

الموضوع إن عدد سكان مصر زاااد و بالتالي بقى في أفواه كتير جعاااانة فالطلب على السلع بقى أكتر و إنتاجنا للسلع زي ماهو و بالتالي السلع سعرها غلي و الأسعار لما غليت ، الـ 100 جنيه مبقتش تكفي ، 

و ده بالظبط اللي هيحصل لو الحكومة طبعت فلوس كتير .. الناس هتبقي عايزة تشتري أكتررر فـالطلب على السلع هيبقى أكبر و بالتالي الأسعار هتزيد أكتررررر و ساعتها هتيجي الست الوالدة تصوت في البيت تاااني و تقول هو فيه إيه ؟؟؟ انا بقيت اروح السوق بـ 1000 جنيه و بيخلصوا في ساعتها !! البركه قلت يا حجه اقسم بالله البركه ما قلت  

طب أومال المفروض الحكومة تعمل إيه ؟؟ 

المفروض عشان تطبع فلوس زيادة لازم تزود الإنتاج عشان السلع تزيد ، و لما السلع تزيد و تبقى متاحة و مرطرطة في السوق سعرها مش هيزيد و كفة الميزان ساعتها هتتعدل  

هقولك مثال تاني أحلى 

عارف لما تبقى في مكان مفيهوش مواصلات خالص و الناس في المحطه عماله تزيد .. ساعة ، ساعتين و الناس تزيد و مفيش مواصلات بردو !! 

فيجي سواق صايع يقف عند المحطة عشان يركب الناس ، ف أمة لا اله الا الله هتهجم عليه .. ساعتها هو هيستغل الموقف هيقولهم الأجرة غليت و بقت بـ 10 جنيه ( و الأجرة العادية 2 جنيه مثلاً ) .. ساعتها حد هيفتح بقه و يعترض ؟؟ أكيد لا كله هيبقى عايز يمشي و خلاص .. 

ده بسبب إن العرض ( المواصلات يعني ) قل و الطلب ( الناس اللي على المحطة ) زاد .. و بالتالي السعر بيزيد و ده بقى علماء الإقتصاد بيسموها ((( التضخم ))) 

يعني بإختصار و في جملة واحدة ( طباعة فلوس كتير بدون زيادة حقيقية في الإنتاج تؤدي للتضخم ) 

هقولك مثال أخير بسيط يوضحلك مشكلة التضخم دي .. 

لو إحنا دلوقتي 10 أشخاص كل شخص في جيبه 10 جنيه و روحنا محل سندوتشات 

لاقينا المحل فيه 10 ساندوتشات بس و سعر الساندوتش 10 جنيه .. تمام ؟ 

كده كل شخص مننا هيقدر يشتري ساندوتش واحد بس .. صح كده ؟؟ 

فالحكومة طبعتلنا 100 جنيه و إدت لكل واحد 10 جنيه زيادة

كده كل واحد بقى في جيبه 20 جنيه صح كده ؟؟ .. و بالتالي هيقدر يشتري ساندوتشين مش ساندوتش واحد 

و بكده إحنا الـ 10 كل واحد فينا عايز يشتري ساندوتيش يعني كلنا كده كشلة بقينا عايزين 20 ساندوتش 

طيب و صاحب المحل عنده 10 ساندوتشات بس .. ساعتها هيعمل إيه ؟؟ 

هيروح شايل اليافته أم 10 جنيه و يحط يافته بـ 20 جنيه و يقولهم يا حضرات الساندوتش بقي بـ 20 جنيه و بالتالي إحنا غصب عننا كل واحد بردوووو إشترى ساندوتش واحد 

السؤال : هل الـ 100 جنيه بتاعه الحكومة نفعتنا بـحاجة ؟؟ .. لا بالعكس هي قللت قيمة ال10 جنيه اللي كانت في جيبنا مش أكتر . 

و في سبب تاني و هو إن لكل عملة نقدية في إيدينا بيبقى ليها مقابل دهب أو فضة في البنك المركزي للدولة فمفيش دوله تقدر تطبع ورق نقدي مادام ملهوش مقابل من الدهب في خزينة البنك و إلا يبقي تزويير ،فبدل ما تقول للحكومة تطبعلك فلوس كتير لازم الأول تقولها تزودلك الإنتااااج بإنها تفتح مصانع أكتر و فرص عمل أكتر و تعيد إستغلال الموارد بتاعتنا المهدرة دي صح فالإنتاج يزيد و ساعتها يقدروا يطبعوا فلوس أكتر 🙂 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: