أخبار عاجلة
الرئيسية / Blog / ليه بنحس إن القمر بيتحرك معانا ؟!

ليه بنحس إن القمر بيتحرك معانا ؟!

أنا ليه بحس إن القمر بيتحرك معايا ؟! ابقى في مكان واشوفه في السما واركب العربية واتحرك مسافة كبيرة جدااا وبردو لسه شايفاه في نفس المكان في السما !! 

نرجع تاني للسلسلة اللي بحبها جدا #ليه .. والمرة دي رغم بساطة السؤال ده إلا أنه أكيد أنت حسيت نفس الإحساس ده في يوم من الأيام وأكيد سألت نفس السؤال أو اتسألك من طفل .. طيب احنا ليه بنحس بكده ؟!! 

الإجابة ببساطة لأن القمر كبير وبعيد جدًا عننا .. فـ الـ visual system أو نظام الرؤية بتاعك معندوش الأدلة الكافية من البيئة المحيطة اللي تثبتله انه عدى من الشيء ده أو بعد عنه ! .. قبل ما تتنح هفهمك بمثال بسيط 

لو انت راكب عربية دلوقتي وماشي ع الدائري وباصص من الشباك هتقدر تميز بكل سهولة البيوت اللي انت عديت من قدامها لانهم قريبين جدا منك .. أول ما تقرب من بيت عينيك هتبص علي جانب البيت من زاوية معينة وبعد ما تتحرك شويه زاوية رؤيتك للبيت هتتغير وعنيك هتبص علي منتصف البيت .. وبعد ما تتحرك اكتر زاوية رؤيتك للبيت هتتغير وعينك هتبص علي الجانب التاني للبيت وبعدين تتحرك اكتر فتبدأ تشوف البيت من زاوية ابعد وكده .. أهو نتيجة اختلاف زاوية الرؤية دي ، الـ visual system هيبقي عنده ادلة من البيئة المحيطة تقنع عقلك انك عديت أو مريت بالبيت ده وإن البيت خلاص بِعد عنك .

طيب لو وانت ماشي بالعربية وقربت من الجيزة وبدأت تشوف الأهرامات من بعيد أوي .. لو اتحركت مسافة كبيرة جدا هتلاقي نفسك بردو شايف الأهرامات من بعيد !! ايه ده هي الأهرامات بتتحرك ولا ايه !! لا يا فندم أنت اللي يعتبر متحركتش بالنسبة لها 😀 عشان الأهرامات فضلا عن أنها ضخمة لكن هي بعيدة جدا عنك .. فكل المسافة اللي انت اتحركتها دي مقارنة بالمسافة بينك وبين الأهرامات لا تُذكر بالتالي زاوية رؤيتك للأهرامات تقريبا متغيرتش .. فـ هتحس أن الأهرامات متحركتش ! :)) 

طيب تعالي بقي نبص علي القمر اللي المسافة بيننا وبينه 384,400 كيلومتر !! 

نتيجة المسافة الضخمة دي بيننا وبينه . فأي مسافة هنتحركها على سطح الأرض مقارنة بيها هتبقى مهملة وصفر ع الشمال وبالتالي زاوية رؤيتنا للقمر مش هتختلف .. فكأننا متحركناش ، فـ هنحس أن القمر في نفس المكان وكأنه بيتحرك معانا :D 

بس يا سيدي .. 

اقعدوا بالعافية 🙂

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: