أخبار عاجلة
الرئيسية / Blog / ليه بنحس القمر كأنه ماشي معانا …سؤال بيجي في بالنا كتييير وإجابته في المقال ده 👇🏻

ليه بنحس القمر كأنه ماشي معانا …سؤال بيجي في بالنا كتييير وإجابته في المقال ده 👇🏻

أنا ليه بحس إن القمر بيتحرك معايا ؟! أبقى في مكان وأشوفه في السما وأركب العربية وأتحرك مسافة كبيرة جداااً وبردو لسه شايفه في نفس المكان

رغم بساطة السؤال ده إلا إنه أكيد إنت حسيت نفس الإحساس ده في يوم من الأيام وأكيد سألت نفس السؤال أو إتسألك من طفل .. طيب إحنا ليه بنحس بكده ؟!!

الإجابة ببساطة لأن القمر كبير وبعيد جدًا عننا .. فـ الـ visual system أو نظام الرؤية بتاعك معندوش الأدلة الكافية من البيئة المحيطة اللي تثبتله إنه عدى من الشئ ده أو بعد عنه !… هفهمك بمثال بسيط

لو إنت راكب عربية دلوقتي وماشي ع الدائري وباصص من الشباك هتقدر تميز بكل سهولة البيوت اللي إنت عديت من قدامها لأنهم قريبين جداً منك .. أول ما تقرب من بيت عينيك هتبص على جانب البيت من زاوية معينة وبعد ما تتحرك شوية زاوية رؤيتك للبيت هتتغير وعنيك هتبص على منتصف البيت .. وبعد ما تتحرك أكتر زاوية رؤيتك للبيت هتتغير وعينك هتبص على الجانب التاني للبيت وبعدين تتحرك أكتر فتبدأ تشوف البيت من زاوية أبعد وكده .. أهو نتيجة إختلاف زاوية الرؤية دي ، الـ visual system هيبقى عنده أدلة من البيئة المحيطة تقنع عقلك إنك عديت أو مريت بالبيت ده وإن البيت خلاص بِعد عنك .

طيب لو إنت ماشي بالعربية وقربت من الجيزة وبدأت تشوف الأهرامات من بعيد أوي .. لو إتحركت مسافة كبيرة جداً هتلاقي نفسك بردو شايف الأهرامات من بعيد !! إيه ده هي الأهرامات بتتحرك ولا إيه !! لا إنت اللي يعتبر متحركتش بالنسبة لها عشان الأهرامات فضلاً عن إنها ضخمة لكن هي بعيدة جداً عنك .. فكل المسافة اللي إنت إتحركتها دي مقارنة بالمسافة بينك وبين الأهرامات لا تُذكر بالتالي زاوية رؤيتك للأهرامات تقريباً متغيرتش .. فهتحس إن الأهرامات متحركتش ! :))

طيب تعالى بقى نبص على القمر اللي المسافة بيننا وبينه 384,400 كيلومتر !!

نتيجة المسافة الضخمة دي بيننا وبينه . فأي مسافة هنتحركها على سطح الأرض مقارنة بيها هتبقى مهملة وصفر ع الشمال وبالتالي زاوية رؤيتنا للقمر مش هتختلف .. فكأننا متحركناش ، فهنحس إن القمر في نفس المكان وكأنه بيتحرك معانا .

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: