أخبار عاجلة
الرئيسية / Blog / ليه بنشوف القمر بأشكال مختلفة مرة بدر ومرة هلال ومرة بشكل غير مكتمل ؟؟؟

ليه بنشوف القمر بأشكال مختلفة مرة بدر ومرة هلال ومرة بشكل غير مكتمل ؟؟؟

أنا دايماً بقعد أسأل نفسي ليه ساعات بنشوف القمر كامل أو بدر و ساعات نشوفه متاكل منه حته و ساعات نشوفه هلال و ساعات مش بنشوفه خالص ؟!!! ليه هاا

– اممم سؤال حلو والله .. تعالي خديلي صوره قدام الشجرة اللي عليها أنوار هناك دي و إنتي هتعرفي الإجابة بنفسك

ها شايفة إيه ؟؟

= يابني إنت ضلمة في الصورة عشان النور وراك !! تعالي يمين شويتين

= يعني بدأت توضح حبة بس لسه جزء كبير منك ضلمة تعالي يمين أكتر

= كده نص جسمك باين و نص مضلم :/ ..

– طب كده ؟؟!!

= حلو أغلب جسمك منور بس في حتة كده لسه مضلمة

= أهاا تمام ، صورة حلوة بس أنا مفهمتش بردو إيه علاقتها بالقمر

– أنا دلوقتي شرحتلك أصلاً أطوار القمر كلها و جميع أشكاله

كل الموضوع بس إن أنا كنت القمر و حضرتك كنتي كوكب الأرض و الشجرة المنورة كانت الشمس .

أما كنت واقف قدام الشجره كنتي شايفاني ضلمة بالكامل لأن النور كله كان خابط في ضهري ، و كذلك لما القمر يبقى واقف بيننا و بين الشمس يعني يبقى واقف قدام الشمس ، إحنا بنشوف نص القمر المواجه لينا ضلمة بالكامل لأن ضوء الشمس بيبقى خابط في النص التاني منه أو ضهره يعني

و ساعتها مش بنشوفه بيكون عبارة عن دايرة مضلمة بالكامل و ده الطور الأول للقمر اللي إسمه ( المحاق )

لما بدأت أتحرك يمين و بدأ ضوء الشجرة يتسرب من ورايا و يظهر عليا بدأ يظهر جزء مني منور صح ؟؟

كذلك القمر لما بيبدأ يلف حول الأرض و يتحرك من قدام الشمس بيبدأ يبان جزء بسيط من الدائرة المضلمة دي

و ده الطور التاني للقمر اللي إسمه ( الهلال ) و ده بيكون أول الشهر

لما جيت يمين أكتررر بحيث ضوء الشجرة بقى مبين نصي منور و نصي مضلم .. كذلك القمر لما بيكمل لف حول الأرض و ضوء الشمس يخبط فيه أكتر بيظهرلنا تقريباً نصه منور و نصه مضلم

و ده الطور التالت للقمر اللي إسمه ( التربيع التالت )

لما جيت يمين أتررر بدأت أظهر كلي بس كان في جزء لسه مضلم مش ظاهر أوي و كذلك القمر بيكون ساعتها ظاهر منه جزء كبير بس لسه مش كله منور .

و ده الطور الرابع للقمر اللي إسمه ( الأحدب المتزايد )

لما وقفت في مواجهة الشجرة وإنتي بقيتي بيني و بين الشجرة و نور الشجرة كان خابط فيا و بقيت منور بالكامل

كذلك القمر بيكون قدام الشمس وإحنا بينه و بين الشمس و ساعتها بيكون منور بالكامل

و ده الطور الخامس للقمر اللي إسمه ( البدر )

كده القمر لف حول الأرض نص لفة ( 180 درجة ) و بعدين هيبدأ يكمل النص التاني للدورة

فالشريط هيتعاد تاني ، هيبدأ يضلم جزء منه تاني و يوصل للطور السادس اللي إسمه ( الأحدب المتناقص )

و بعدين يبدأ يضلم جزء كبير منه حوالي نصه و يوصل للطور السابع ( التربيع التاني )

و بعدين بيوصل إلى أن أغلبه بيكون مضلم إلا جزء بسيط منه منور و ده بيكون الطور التامن ( الهلال ) و ده بيكون آخر الشهر 🙂 و بعدين يرجع تاني مضلم و يوصل للطور التاسع ( المحاق ) مره تاني و هكذا 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: