أخبار عاجلة
الرئيسية / Blog /  ليه بيطفو رواد الفضاء في المركبة؟!

 ليه بيطفو رواد الفضاء في المركبة؟!

ليه بنشوف رواد الفضاء عديمي الوزن في محطة الفضاء الدولية؟

– لأن مفيش جاذبية في الفضاء!

رغم أن الإجابة دي غلط تمامًا إلا إنها شائعة جدًا بين الناس وكانت ديما بتتقالي وأنا صغير.

.

أولًا مفيش مكان في الكون مفيهوش جاذبية، طالما وُجدت كتلة وُجدت جاذبية طبقا لقانون نيوتن .. فمش بس الكواكب، أنا وأنت والنملة اللي تحتينا لينا جاذبية لأن لينا كتلة، ممكن تزيد أو تقل حسب كتلتنا والمسافة بينا لكن عمرها ما هتساوي صفر.

.

ثانيًا رواد الفضاء في محطة الفضاء بيتأثروا بحوالي 90% من الجاذبية الأرضية فوجودك على الأرض أو في المحطة مش هيفرق كتير.

.

طيب أمال ليه بيطفو رواد الفضاء في المركبة؟!

صدق أو لا تصدق هم مش بيطفو .. هم بيسقطوا!

هم والمركبة اللي موجودين جواها في حالة سقوط حر ناحية الأرض. 

لو كنت ركبت مصعد قبل كده والأحبال اتقطعت وسقط بيك سقوط حر-لا قدر الله- هتحس إنك عديم الوزن وتبقى زي اللي ف الصورة دول للحظات، ولو راكب قطر الموت في الملاهي ونزل بيك بسرعة من مكان عالي هتحس للحظات إنك بترتفع عن الكرسي، هم بقى هيحسوا بانعدام الوزن بس بشكل مستمر مش للحظات.

.

طب إحنا ليه بنشوفهم كده طيب؟

لأننا بنبص عليهم من جوا المحطة اللي هي كمان بتسقط معاهم، لكن لو بصينا عليهم من بعيد هتضح الصورة، زي لما تبص على شخص قفز بالمظلة من ارتفاع عالي بتحس إنه متعلق في الجو أو بيطفو؛ لأن الكاميرا القريبة أو اللي بيصوره من قريب بيسقط معاه أصلا، في حين لو الكاميرا بعدت أوي عنه هتشوفه بيسقط فعلا بسرعة كبيرة .. ده نفس الإحساس.

.

طيب بما أنهم بيسقطوا ناحية الأرض ليه مش بيرتطموا بيها؟

بسبب السرعة! 

تخيل إنك واقف على حافة سطح برج ارتفاعه 370 كيلومتر (قد ارتفاع المحطة عن الأرض)، لو قدمت خطوة زيادة هتسقط قدام باب البرج صح؟

طيب لو رجعت لورا حبتين وجريت جامد وقفزت من حافة البرج؟ .. سرعتك دي هتديك دفعة تخليك تتقدم للأمام شويه في الجو وفي نفس الوقت الجاذبية هتشدك لتحت فـ هتسقط بس في مكان أبعد شويه، صح؟ وبالتالي كل ما تجري أسرع كل ما هتسقط في مكان أبعد.

يعني سرعتك اللي جعلتك عديم الوزن وكانت السبب اللي مكـنك من قطع المسافة دي في الجو دون السقوط والارتطام بالأرض.

.

طيب تخيل لو رجعت لورا وقدرت تجري بسرعة 28000 كيلومتر في الساعة (قد السرعة الجانبية للمحطة) وقفزت؟

ساعتها هتقطع مسافة كبيرة جدًا جدًا في الجو، المسافة دي أو المسار اللي هتصنعه قفزتك دي هيكون عبارة عن دائرة حول الأرض، بفعل الجاذبية الأرضية اللي هتشدك وتخليك تلف حواليها زي ما عملت مع القمر بالظبط.

يعني هتكون بتتحرك في مدارك الخاص حول الأرض وفي نفس الوقت أنت في حالة سقوط حر حول الأرض لأن الجاذبية بتشدك لأسفل لكن طول ما أنت بتتحرك بالسرعة دي مش هترتطم بالأرض أبدا إلا لو وقفت.

في الكرتون زمان لما توم كان بيجري ورا جيري بسرعة رهيبة ويعدي من فوق حافة جبل .. أول ما يقف وياخد باله إن مفيش أرض تحتيه يقع! أهو دي نفس الفكرة

المحطة الفضائية بتتحرك حركة جانبية أو مساوية للأرض بسرعة 28 ألف كيلو في الساعة وبالتالي عمرها ما هترتطم بالارض إلا لو وقفت.

.

وطبعا الإحساس بانعدام الوزن ده كان له آثار جانبية على رواد الفضاء فابتكروا تقنية (الجاذبية الإصطناعية) كي يخلقوا جاذبية تشدهم للأرض في المحطة الفضائية، والتقنية دي ظهرت في فيلم Interstellar وكنت وضحتها في البوست ده: http://bit.ly/2jkZEot

 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: