الرئيسية / Blog / ماذا تعرف عن الشمس؟! 

ماذا تعرف عن الشمس؟! 

وأنت نايم قدام البسين في فيلتك أم جنينة واحدة وفـ ايدك كباية العصير اللي فيها شمسية ومستمتع بالمنظر وبأشعة الشمس اللي بتديك فيتامين D .. أحب أقولك بلاش كمية الإنشكاح دي لإن كل شعاع ضوء بيوصلك من الشمس هو في الحقيقة بيقلل من عمر البشر علي الكوكب أو ممكن تقول بيقلل من عمر المجموعـة الشمسية بالكامل … قولي ليه ؟!! 

قولتلي ليه .. بص يا سيدي 

من واحنا صغيرين في كتاب العلوم كانو ديما يقولوا كلمة الشمس لوحدها والنجوم لوحدها .. وده خلق عند كتير من الناس فكرة إن الشمس حاجة والنجوم حاجة تانية ! أو إن الشمس كوكب ، أو إن الشمس هتفضل تشع ضوء وحرارة كده بشكل متجدد إلى ما لا نهاية !! والحقيقة الكلام ده بلح 😀 

.

الشمس هي مجرد نجم من 100 ألف مليون نجوم في مجرتنا بس .. بس السؤال هي النجوم دي كلها بتيجي إزاي ؟ أو بتتولد إزاي ؟

باختصار بيكون في تجمعات غازية أو غبار كوني كده ملهوش أهل يسألوا عليه – ناتج عن انفجارات نجوم سابقة – بنسميه (سديم-Nebula) ، السديم ده بينضغط على نفسه بفعل الجاذبية ويفضل ينضغط وينكمش – زي كونان كده – وحرارته تزيد جداً جداًاا إلى أن يحصل بين ذرات الهيدروجين اندماج نووي وينتج الهيليوم وهناا بقي الإندماج بيطلع إشعاع وطاقة عالية جدا بتولد ضغط عالي جداً، الضغط ده بيتصدي للجاذبية اللي عمالة تضغط السديم ومحدش قادر عليها دي، فيبطل ينكمش ويبقي في حالة اتزان واستقرار.. مبروووك بقي عندك نجم، لولولولي 😂 

.

وكـ أي نجم في الكون ده له عمر افتراضي وينتهي أو يموت ! .. اها والله بيموت زينا 😀 .. فالشمس بتاعتنا مثلاً الوقود أو الغذاء بتاعها هو الغازات اللي جواها اللي بيحصل بينها اندماجات نووية وتشع ضوء وحرارة اللي بتوصلك دي .. تفضل الشمس تتغذى على الغازات بتاعتها .. الهيدروجين يندمج ويتحول لهيليوم لحد ما يخلص ويبدأ اندماج الهيليوم لحد ما يخلص ويبدأ اندماج أو احتراق الكربون لحد ما يخلص ويبدأ احتراق الأكسجين لحد ما يخلص وهكذا، ومع كل اندماج نووي يحصل فيها، تخس يا حبة عيني وتفقد جزء من كتلتها علي هيئة الطاقة اللي بتشعها والحته دي وضحناها بالتفصيل هنا : https://goo.gl/PuuLWa 

ويفضل كل نجم في الرجيم القاسي ده إلى أن يصل ل لحظات الإحتضار، لما تبدأ غازاته كلها تخلص، وتظهر ع الشاشة : البطارية أوشكت علي النفاد ، يعني إيه ؟!

يعني مبقاش في اندماج نووي يديله طاقة يعني مفيش ضغط هيتصدي للجاذبية اللي عمالة تزق من برا ! فهوب دابل كيك الجاذبية ترجع تضغطه وتخليه ينكمش أكتر علي نفسه فـ بيتحول لحاجة من التلاتة الحلوين اللي قدامك في الصورة دول .. علي حسب كتلته .

علي حسب كتلته ازاي يعني ؟! … قولتلي ازاي 😀 

عارف الخطين الحمر بتوع الزمالك ؟؟ في خطين حُمر زيهم أو اتنين limit بيحددوا الموضوع ده .

>> الخط الأحمر الأول أو الـ limit الأول .. وضعه عالم وخد جايزه نوبل سنة 1985 ع السطرين الجايين دول 😀  

اسمه (حدّ شاندراسيخار – Chandrasekhar limit) ، وربنا هو اسمه كده انا مااالي 😀 

الـ limit ده بيساوي ( 1.4 كتلة الشمس ) .. يعني اييه !!!  

1- يعني قالك لو كتلة النجم اللي توفي ده أصغر من (1.4كتلة الشمس ) لسه معدتش الخط هيتحول إلي (white dwarf – قزم أبيض) زي الشمس بتاعتنا كده.  

2- أول ما كتلته توصل لـ 1.4 كتلة الشمس هينكمش أكتررر ويتحول إلي ( neutron star – نجم نيوتروني ) .. يا حلاوة يا ولاااد !

3- لو كتلته زادت أكتر بقي ؟! .. قالك والله هو ممكن يفضل زي ما هو وممكن يتحول لـ (Black hole – ثقب أسود ) والعياذ بالله !! .. طيب وايه اللي هيحددلنا الموضوع ده يا كبير ؟!

.

>> هنا يجي دور الخط الاحمر التاني أو الـ limit التاني 

اسمه (حدّ أوبنهايمر فولكوف – Tolman–Oppenheimer–Volkoff limit) 

ما تقول يا عم الحج اسمه ايه ؟!! O.o

اسماء كفار ملناش دعوة 😂 ، المهم قالك باختصار، لو كتلة النجم كانت في الرينج بين (1.5 : 3) كتلة الشمس .. هتحصل الفاجعة والنجم هينكمش على نفسه بطريقة لا توصف و يتحول إلى ثقب أسود أو بلاعة تشفط أي حاجة تقرب منها .. لو قبل الرينج ده هيفضل نجم نيوتروني . 

بس يا سيدي المهم متقلقش الشمس بتاعتنا قدامها لسه 5 مليار سنة قدام عقبال ما تخلص الغازات اللي عندها وتبقي قزم أبيض .. فـ خد راحتك في الفيلا . 

أما الـ 3 دول هنعرف حكايتهم بالتفصيل في وقت تاني ان شاء الله 😀 

.

اسيبكم بقي مع 3 خواص رائعة في جوجل بالتعاون مع ناسا ، ناس كتير اوي متعرفهمش 😀 

1- تقدر وانت في مكانك تتفسح علي سطح القمر وتتفرج عليه بالتفصيل الممل وبكل تضاريسه وتتفرج علي أماكن كل مهمات ابولو اللي نزلت علي سطح القمر من هنا : https://goo.gl/kIwUr9 

2- تقدر تتفرج على السما وجمالها والنجوم اللي فيها ومجموعاتها والمجرات وأشكالها وأسمائها كإنك بتتفرج عليها من تيليسكوب هابل الفضائي من هنا : 

‏https://goo.gl/bZjEn5

3- تقدر تتفسح علي سطح كوكب المريخ وتتفرج علي كل تضاريسه من هنا 

‏https://goo.gl/y4lEig

#هاف_فان

#اقعدوا_بالعافية

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: