معقول !!!! صدق أو لا تصدق؟؟؟؟

0
22
views

و انا بتمشي مع صاحبي مرة ، كان بيقولي تفتكر مع تطور التكنولوجيا الرهيب ده هل في يوم من الأيام نقدر نخترع جهاز نسمع بيه أصوات من الماضي ؟ 

فأنا إبتسمت و قولتله : 

و تسمع ليه ؟ إنت كل اللي إنت شايفه قدامك ده أصلاً ماضي هقولك مثال حلو:

تعالى نتخيل إن خالك غني و سافر بلد بعيدة أوي عننا ، البلد دي عشان تسافرلها الطيارة هتاخد 4 سنين رايح و 4 سنين جاي

– كام O.o … 

يا عم تخيـــــــل .. المهم خالك قبل ما يسافر قالك اطمن أنا هجبلك من هناك أحدث لابتوب نزل السوق .. فحضرتك فرحت و خالك فعلاً اتوكل على الله و سافر و فعلاً لما وصل إشترالك أحدث لابتوب نزل و أعد هناك كام شهر و رجعلك باللاب بعد 4 سنين ( زمن العودة بالطيارة) ساعتها بقى ، هل اللاب بالنسبة لك هيبقى أجدد لاب نزل السوق ؟؟ الإجابة لا هيكون قديم و نزل بعده إمكانيات أحسن :

– مش فاهم عايز تقول إيه ؟؟؟ 

عايز أقولك إنك عشان تشوف أي حاجة قدامك لازم الحاجة دي تكون نوع من إتنين : 

إما تكون بتشع ضوء ( زي الشمس مثلاً ) ف الضوء ده يقطع مسافة معينة لحد ما يوصل لعينك فتشوف 

و إما يكون في ضوء وقع على الحاجة دي و إنعكس و بعدين قطع مسافة معينة لحد ما وصل لعينك فتشوف ( زي القمر

 مثلاً ) 

شايف الشمس اللي فوقينا دي ؟؟ 

المسافه بينا و بينها حوالي 149.6 مليون كيلو متر .. 

عشان نشوف الشمس ده إيه اللي حصل ؟؟ .. اللي حصل إن الشمس أصدرت ضوء و بعدين قطع المسافة دي في 8 دقايق ( لأن سرعة الضوء 300 ألف كيلو متر في الثانية ) و بعدين وصل لعنينا فشوفناها .. ده معناه إن صورة الشمس دي متأخرة 8 دقايق عننا 😀 يعني صورة الشمس اللي إحنا شايفنها دلوقتي دي صورة من الماضي ، صورة من 8 دقايق ، لكن صورتها في اللحظة اللي إحنا بصينا فيها عليها دي هتوصلنا كمان 8 دقايق 

شايف النجوم اللي بتشوفها بالليل دي ؟؟ 

في الواقع هي مش بتبقى موجودة في المكان اللي إنت باصص عليه ، ممكن النجم اللي إنت بتبص عليه ده يكون بعيد عنك آلاف السنين الضوئية و أصدر ضوء و الضوء ده عشان يوصلك قطع المسافة دي في كام سنة مثلاً و بعدين وصلك فحضرتك شوفت صورة النجم دلوقتي .. طب أومال النجم ده شكله إيه دلوقتي ؟؟ الله أعلم جايز ميكونش موجود أصلاً و إنفجر من زمان 

يعني كل النجوم اللي إنت شايفها في السما دي صورة قديمة من الماضي لسه وصلالك دلوقتي ( زي اللابتوب القديم اللي وصلك مع خالك )  

و قيس على كده كل شئ إنت شايفه دلوقتي حواليك .. أي صوره إنت شايفها دلوقتي بتكون متأخرة ولو حتى أجزاء أجزاء من الثانية ( الوقت اللي خده الضوء عشان يقطع المسافه بينك و بين الصورة و يوصل لعينك ) 

يعني م الاخر صوره شكلي اللي وصلالك دلوقتي و إنت قدامي صورة من الماضي ، صوره متأخرة أجزاء أجزااااااااء من الثانية مش هتحسها لكن مش صورتي في اللحظه اللي بصيت فيها عليا . 

صدِق أو لا تُصدِق

تعليقات الفيس بوك

تعليقًا