أخبار عاجلة
الرئيسية / Blog / معلومات مفيدة

معلومات مفيدة

توجد بعض المعلومات الخاطئة الشائعة بين الناس محتاجين نوضحها “)

1 – جبل إيفرست مش أطول جبل في العالم، جبل (Mauna Kea )الموجود بجزر الهاواي بأمريكا هو الأطول في العالم لما تقيس طوله من القاع “تحت الأرض” إلى القمة، ولكن قمة إيفرست هي الأعلى عالميا ًلما تقيس من فوق سطح البحر.

2 – الأرض مش بتدور حول الشمس بالظبط،علمياً الشمس والأرض وكل الكواكب بتدور حول مركز كتلة النظام الشمسي كله أو الي سموه العلماء بـ “barycenter”، ومركز الكتلة بيكون قريب جدًا من الشمس، لذلك إحنا بنقول مجازاً أو تقريباً يعني الكواكب بتدور حول الشمس.

3 – الفحم لما بيتضغط جامد مش بيكون ألماس أبداً !!.

علماء الجيولوجيا قالوا إن معظم الماس اللي تم تأريخها أقدم بكثير من النباتات البرية الأولى في الأرض (اللي هي المصدر الأساسي لتكوين الفحم)، يعني بالبلدي الألماس موجود ع الكوكب ده قبل ما الفحم يشرفنا بـ 100 مليون سنة، ثم إن الفحم بيتكون من نباتات في قشرة قريبة من سطح الأرض في ظروف معينة، ونادرا ًلما يوصل لعمق أكثر من 3.2 كليو متر تحت سطح الأرض، بينما الألماس بيتكون في منطقة شديدة الضغط والحرارة (التي بتوصل لـ 1050 درجة) وأكثر عمقا ًتحت الأرض بكثير، الظروف دي من الضغط والحرارة بنلاقيها عند عمق 150 كيلو تحت الأرض.

4 – الخفافيش مش عميا، رغم عينيهم الضيقة وإستايل حياتهم الليلي ولكن مفيش ولا نوع من الـ 1100 نوع تقريبا ًمن الخفافيش أعمى!، ولكن بتعتمد أكتر على نظام السونار الخاص بها أو تحديد المواقع بالصدى أو بإرتداد الأشعة إليه تاني، زي ما إحنا بنعتمد ع الرؤية في حياتنا أكتر من السمع.

5 – الحرباية مش بتغير لونها حسب الشيء الليبتلسمه كتمويه، هي بتغير لونها كتعبير عن المزاج أو تكيف مع درجة الحرارة أو الضوء أو وسيلة للتواصل أو التزاوج.

6 – الثيران مش بيغضبها اللون الأحمر، لأن التيران زي باقي الأنعام عندهم (red/green colorblind )أو نوع من عمى الألوان، يعني بيشوفوا أي ظل للأحمر والأخضر ما بين الرمادي والأسود، ولكن هم زي أي حيوان آخر بيغضبوا وبيتنرفزوا لما حد يتحرك حواليهم وينكشهم ويعبث معاهم أيا ًكان لبسه هتبقى عايزة تنطحه.

7 – الفيلة مش بتنام ولا بتموت وهي واقفة، بتنزل ع الأرض وتنام عادي وبتعرف تقوم تاني، واليوتيوب قدامك.

8 – أينشتاين مكنش فاشل في المدرسة ولا سقط في الرياضة، كان طالب متفوق ومتميز جداً في الرياضيات بل إنه لما عرف الإشاعة دي وهو عايش ضحك وقال أنا قبل ما أتم 15 سنة كنت متقن لحساب التفاضل والتكامل بالكامل، وكمان أينشتاين ماخدش نوبل على نظرية النسبية، خدها لإكتشافه قانون التأثير الكهروضوئي.

9 – البشر ماعندهمش خمس حواس فقط، لو عرّفنا الحاسة إنها وسيلة فريدة من نوعها للدماغ للحصول على معلومات حول العالم والجسم، فطبقا ًلكثيرمن الدراسات، عندنا من 9 لـ 21 حاسة، منهم القدرة على التوازن والتسارع والشعور بالزمن وأماكن الأشياء والألم الداخلي.

10 – مش كل البكتريا بعبع أو مضرة، صدق أو لا تصدق، تقريبا ًإنت نص جسمك بكتيريا ومتقدرش تعيش بدونها، طبقا ًلمجلة نيتشر، الإنسان المرجعي اللي خدوه “reference “يعني اللي طوله 1.7 متر، ووزنه 70 كيلو، جسمه بيحتوي على حوالي (30 تريليون) خلية حية، و (39 تريليون) بكتيريا !.

11 – مش كل حالات السرطان بنلجأ للكيماوي، لو كان الورم بطيء وفي مكان واحد فربما الجراحة هي كل اللي هيحتاجه المريض .. لو كان الورم سريع وبيهاجم الأنسجة المحيطة فقد يقترح الدكتور العلاج بالأشعة أو جراحة ثم أشعة .. أما لو الخلايا السرطانية انتشرت في أماكن كتير في كل أنحاء الجسم زي سرطان الدم مثلاً، فالدكتور هيقترج العلاج الكيماوي.

وللعلم يعني، طريقة العلاج الكيماوي فعالة جداً بتعتمد على تمزيق الحمض النووي أو السوفت وير للخلايا، يعني بيدمر آلية الإنقسام الخلوي للخلايا اللي بتنقسم وتنمو بسرعة غير طبيعية فتشكل الورم السرطاني ده، لكن المشكلة إن العلاج ده مابيعرفش يفرق بين الخلايا السرطانية المجنونة اللينموها غير طبيعي إطلاقاً، وبين الخلايا اللي نموها “سريع شويه” عن باقي الخلايا زي “خلايا الشعر ” مثلاً .. وبالتالي أي خلايا طبيعية بتنقسم بسرعة ونموها سريع بتكون معرضة أكتر إن الكيماوي يهاجمها ويقضي عليها، وده الي بيؤدي لأعراض جانبية من أبرزها تساقط الشعر.

12 – حدوث المواسم الأربعة مش بسبب قربنا أو بعدنا عن الشمس ولكن بسبب ميل محور الأرض اللي بتدور حوله 23.5 درجة.

13 – سرعة الضوء مش ثابتة في المطلق، بتتغير عادي حسب الوسط اللي بيمر فيه، ونظرية النسبية بتقول إن مفيش جسم يقدر يتحرك أسرع من الضوء في أي وسط فالمعلومتين ملهمش علاقة ببعض.

14 – الجاذبية مش صفر في الفضاء، مادام هناك كتلة أو طاقة تكافئ الكتلة وُجدت الجاذبية، والناس مش بتنفجر في الفضاء، بيتخنقوا ويموتوا زي الغرقانين.

15 – مش القمر فقط المسئول عن المد والجزر ولكن الشمس أيضا لها دور.

16 – لو مت في الحلم مش هتموت في الحقيقة لا تقلق، ناس كتير ماتوا ف الحلم وصحيوا حكوا الحلم عادي.

17 – القنبلة الذرية قائمة على فكرة الانشطار الذري “زي بتاعة هيروشيما وناجازاكي “، أما الهيدروجينية الأقوى بمرااحل قائمة على فكرة الاندماج النووي، والإتنين بيتقال عليهم قنبلة نووية.

18 – في قاعدة عليمة بتقول (correlation doesn’t imply causation) يعني الإرتباط لا يعني السببية إطلاقاً، مش أي حاجتين بيحصلوا مع بعض أو ورا بعض يبقى حاجة منهم سببت في حدوث التانية، والنظرية العلمية مش بتترقى وتبقى حقيقة علمية، النظرية بتوصف أو بتفسر الحقيقة قسما بالله.

19 – ونراجع ع اللي قولناه مسبقاً، التنمية البشرية “بمفهومها الشائع” والطاقة والأبراج مش علم .. والإنسان بيستخدم 100% من قدرات عقله، أما الـ 10% دي عند أم Lucy .. وقلبك مش بيقف لما بتعطس .. والمضاد الحيوي مش بيقضي على فيروس الأنفلونزا (الفيروس بيكمل دورته ويتكل ع الله ) المضاد بيقضي ع البكتريا فقط، وإحنا بناخده أحياناً لمنع حدوث عدوى بكتيرية بس .. والقعاد بالقرب من التلفزيون مش بيضر بالعينين .. وشعر الجسم مش بينمو أكتر أو أسرع لما يتحلق .. والعادة السرية لا تسبب حب الشباب، هم بيحصلوا في نفس الفترة والارتباط لا يعني السببية زي ما قولنا .. والشمس لونها مش أصفر ولا كورة من نار، هي كورة من غازات بيحصل بينهم إندماجات نووية بتشع ضوء أبيض وحرارة، والضوء الأبيض بيتحلل في الغلاف الجوي فنشوف الشمس صفرا .. وكوكب عطارد مش الأسخن لأنه الأقرب للشمس ولكن الزُهرة هو الأسخن .. وذاكرة السمك الذهبي قوية وتمتد لشهور، أما ذاكرة الـ 3 ثواني دي عند أم Nemo.

20- وإسمها (سعدنا بيها) مش سعد نبية.

وإصحوا ليغفلونا، وكل عام وإنتوا بخير .. اقعدوا بالعافية “))

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: