الرئيسية / Blog / هل فعلاً نقدر نسافر عبر الزمن ؟؟؟؟؟؟؟

هل فعلاً نقدر نسافر عبر الزمن ؟؟؟؟؟؟؟

هل السفر عبر الزمن ممكن ؟؟؟؟ …آه ممكن

السؤال اللي قولته ده ينقسم لسؤالين .. هل السفر للماضي ممكن ؟ و هل السفر للمستقبل ممكن ؟ 

– تعالوا نبدأ بالسؤال الأول : (( هل السفر بالزمن للماضي ، ممكن ؟؟؟ )) 

حتى الآن الإجابة : لا مش ممكن ، إلا إن في علماء إفترضوا إن أها ممكن عن طريق حاجة إسمها ( worm hole أو الثقب الدودي ) .. إيه حكايته ده ؟؟ 

عارف إنت قصور الباشاوات و السلاطين زمان ؟؟كان بيبقى في ممرات سرية كده توصلك لأماكن مختلفة في القصر .. تكون مثلاً في أوضة الملك أو سلطان القصر و لو حصل هجوم على القصر الحراس يدخلوه الممر السري ده و اللي بيوصله لأوضه في القبو بتاع القصر تحت خالص عشان يحموه

أهو الثقب الدودي ده نفس الفكرة ، عبارة عن ممر سري ينقلك بين مكانين مختلفين . و مش بس كده ، ينقلك كمان بين زمانين مختلفين يعني هو عبارة عن طريق مختصر في شبكة الزمكان ، طبعاً الكلام ده نظري بس على الورق لكن محدش رصد أي ثقب دودي على أرض الواقع بس على رأي ستيفن هوكينج ، تعالى نفترض إن العلم هيتطور أوي و في سنة 3000 مثلاً هنقدر نسافر بالزمن للماضي ، يعني ساعتها ممكن نرجع بالزمن لـ 2016 اللي إحنا فيها دي صح ؟؟ 

طيب فين بقي السياح اللي جايين من المستقبل يزورونا ؟؟؟!! مفيش 

بلاش ، نفترض إني هسافر للماضي و اقتل جدي .. فأبويا مش هيتولد فأنا مش هتولد يعني مش هكون موجود ! بس أنا أصلاً جاي من المستقبل يعني موجود ؟؟ دي إسمها إستحالة منطقية .

إذن ده إثبات منطقي على إن السفر للماضي مش ممكن

– نيجي للسؤال التاني و الأهم : (( هل السفر بالزمن للمستقبل ، ممكن ؟؟ )) 

طبقاً للنظرية النسبية الخاصة لأينشتاين .. أها ممكن  

طبعاً النظرية ليها حيثيات و قوانين تانية أكتر من اللي هقولها زي إنكماش الطول و زيادة الكتلة بزيادة السرعة و تفاصيل تانيه كده 

دلوقتي أينشتاين قال إن الزمن بُعد رابع صح ؟ . طيب و بما إن كل حاجة في الكون نسبية يعني متغيرة

يعني أطوالنا و أوزاننا بتختلف في مننا الطويل والقصير و التخين و الرفيع إذن إحنا نسبين في الـ 3 أبعاد بتوع المكان .. طيب ليه منكونش نسبين بردو في البُعد الرابع بتاع الزمن ؟؟ ليه ها لييييه ؟!! يعني زي ما كل واحد ليه طول و عرض و كرش أو كتلة خاصة بيه يبقي ليه زمن خاص بيه بردو ، و لا هو مش قد المقام ؟ 

و قال الحاجة الوحيدة اللي ثابتة في الكون دي هي سرعة الضوء و كمان هي أكبر سرعة في الكون ، و مستحيل أي جسم في الكون يتحرك بسرعة أكبر من سرعة الضوء .. 

بس إحنا ممكن نحرك جسم بسرعه قريبة أوي من سرعة الضوء 😉 زي ما أعلن معهد التكنولوجيا في كاليفورنيا إنه قدر يوصل بالإكترون لسرعة 99.9% من سرعة الضوء !! عن طريق ” مسرعات ذرية”

أحمد عنده 20 سنة راح مع حسين صحبه الأنتيم اللي قده في السن لمحل ساعات .. إشتروا ساعتين شيك ليهم هما الإتنين و الساعتين هيبقوا مظبوطين مع بعض بالظبط .. المهم إن حسين جاتله فرصة إنه يسافر في الفضاء لمده شهر بمركبة فضائية سرعتها 99.99 % من سرعه الضوء فحسين فرح أوي ووضب شنطته وودع صاحبه و شمر القميص عشان الساعة تبان و إتوكل ع الله ..

بعد ما حسين سافر شهر و رجع لقى صحبه أحمد بقى عنده 40 سنة و إتجوز و خلف يوسف و عمر ما شاء الله 

اللي حصل إن لما حسين سافر بسرعة تقارب سرعة الضوء حصل للزمن ( Dilation أو تباطؤ أو تمدد ) 

يعني عقارب الساعة اللي كانت في إيد حسين إتحركت أبطئ بكتــــير من عقارب الساعة اللي كانت في إيد أحمد فعقبال ما عدى على حسين في المركبة الفضائية شهر كان عدى على أحمد 20 سنة 

زي لما تعمل سباق بين أرنب و سلحفاة إنهم يلفوا الملعب .. عقبال ما السلحفاة تلف لفة يكون الأرنب لف 50 لفة مثلاً أهو السلحفاة دي هي عقرب ساعة حسين و الأرنب هو عقرب ساعة أحمد . وصلت ؟؟ 

و بكده حسين قدر يسافر للمستقبل بالنسبة لأحمد :)) و ده بقى مش كلام نظري ده في قوانين أثبتت ده و تجارب على أرض الواقع إتعملت وأثبتت ده 

و قبل ما دماغك تحدف على فيلم interstellar .. أنا هنا بتكلم في النسبية الخاصة ؟؟؟ 

اللي حصل في الفيلم له علاقه بالنسبية العامة في الفيلم هم متحركوش بسرعة تقارب سرعة الضوء ولا حاجة ، كانت سرعتهم عادية لكن اللي عمل فرق التوقيت بين الأب و بنته ، هو إن الأب وقع في بلاك هوول ن البلاك هول أكتر شئ بيعمل تباطؤ في الزمن بردو بسبب إنحناء الزمكان و بعدين البلاك هول نقل بطل الفيلم لكون تاني بأبعاد أكتر من بتوعنا

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: