Large Hadron Collider ..~

0
350
views

– إيه ده لمؤخذه ؟؟ 

= الشئ العجيب ده ؟؟ .. يبقي أضخم آلة بناها الإنسان علي الإطلاق ! 

– أيوه بردو إيه ده ؟ 

= ده يا سيدي اسمه ( LHC ) اختصاراً لـ Large Hadron Collider 

أو مصادم الهدرونات الكبير … الكبير أوي 😀 موجود في CERN 

قبل ما أقولك اللي بيحصل جوا الشيء ده .. أحب أقولك اللي قالته البروفسير ليزا راندال – ودي عالمة كبيرة في الفيزياء النظرية وخبيرة في فيزياء الجسيمات وعلم الكون – عن المصادم ده : 

.

( رغم تجنبي المبالغة، إلا أنّ مصادم الهدرونات الكبير (LHC) ينتمي إلى عالم لا يمكن وصفه إلا بأسماء التفضيل. فهو ليس بمجرد مصادم كبير: الـ(LHC) هو أكبر آلة بناها الإنسان. هو ليس مجرد منطقة مُبرّدَة: درجة الحرارة المطلوبة لتشغيل الممغنطات المحوسبة بداخله هي أكثر منطقة ممتدة باردة نعلم عنها في الكون – أكثر برودة حتى من الفضاء الخارجي. 

المجال المغناطيسي فيه ليس مجرد مجال شديد: المغناطيسات ثنائية القطب فائقة التوصيل تولّد مجال مغناطيسي أقوى 100 ألف مرة من مجال الأرض، وهي أقوى مغناطيسات يتمّ تطويرها في تاريخ الإنتاج الصناعي على الإطلاق.

والأمر لا ينتهي هنا. الفراغ بداخل الأنابيب التي تحتوي البروتونات، بقيمة جزء من تريليون من الجو، هو أكثر فراغ أقرب للكمال على أكبر منطقة يتم عملها على الإطلاق. طاقة الإصطدامات هي أكبر طاقة يتم توليدها على الأرض على الإطلاق، مما يسمح لنا بدراسة التفاعلات التي حدثت في الكون المبكر في بداية الزمان )

.

– اممم .. واضح ان الست دي بتقول كلام كبير أوي .. طيب ودول عملوه ليه بقي ؟!! 

= آه والله ، أحبك وانت بتدخل في المفيد ، هقولك 😀 

لو معاك ڤازة مثلا مقفولة من كل حتة وانت حاسس ان جواها حاجات كتير وعايز تعرف اللي جواها ده إيه .. إيه أبسط حاجة ممكن تعملها ؟؟ 

أول وأبسط حل هتفكر فيه إنك تخبطها في الأرض فتتكسر ف كل المحتويات اللي جواها تطلع وتقدر تشوفها .. تمام كده ؟ مش مهم أمك هتعمل فيك ايه بس المهم انك عرفت اللي فيها 😀 

اهو ده تقريبا فكرة عمل المصادم ده .. العلماء عايزين يعملوا تعجيل او تسريع للبروتونات وبعدين يطقشوها في بعض ، او يعملوا تصادم بين الجسيمات وبعض عشان يشوفوا الطاقة الهائلة والجسيمات اللي هتنتج نتيجة التصادم ده ويقدروا يدرسوها ويعرفوا خصائصها زي هيجز بوزون اللي اكتشفوه ده مثلا ( نبقي نتكلم عليه وقت تاني ) .. والمعلومات دي بتساعدهم في تكوين تصور اعمق وأوضح لبداية الكون ده ، ازاي (الانفجار العظيم – Big bang ) ده حصل ؟ .. اوكيشن 😀 

.

ايه بقي اللي بيعملوه بالظبط جوا الـ LHC ده ؟؟ 

جابو حضرتك ذرة هيدروجين لطيفة كده .. وبما ان الذرة دي عبارة عن نواة والكترونات بتدور حواليها .. قاموا عملوا ايه بقي ؟؟ 

1- قالوا بصوت احمد زكي .. دول شوية الكترونات ملناش دعوة بيهم 😀 ، احنا عايزين النواة لوحدها .. فقاموا ضخوا ذرات الهيدروجين دي جوا أنبوب كده سموها ( حجرة المصادم للمسارع اللحظي ) او ( Linear accelerator 2 ) وهوب يسحبوا منها كل الالكترونات ( في حالة ذرة الهيدروجين فيها الكترون واحد بس ) 

.

2- كده هيتبقي نواة هيدروجين ، والنواة معروف ان جواها بروتونات ونيترونات ( نواة الهيدروجين مفيهاش نيترون خالص ) .. وطبعا بما ان البروتونات موجبة الشحنة.. يبقي نواة الهيدروجين هتبقي عبارة عن بروتون موجب الشحنة .. جميل جدا ، ومادام في جسيم مشحون ، كده هقدر اتحكم في حزم البروتونات دي بواسطة اي حقل كهربائي .

وبكده هقدر اخليها تتحرك جوا الانبوب دي وبعد شويه هتبقي سرعتها ( تلت سرعة الضوء !! ) . 

يتهدوا بقي ؟؟ لاااا 

.

3- قاموا دخلهم لانبوبة دائرية كده محيطها 157 متر بيسموها ( المعزز ) هنخليهم يلفوا فيها عشان بردو ازود من سرعتهم اكتررر وكمااان هيستخدموا الحقل الكهربي تاني وبشكل متزبزب او متردد عشان يزوقهم فيزود سرعتهم ( كانك بتزوق المرجيحة بتاعة ابن خالتك .. كل ما يجي عندك تزوقه اكتر فسرعته تزيد واخدلي بالك ) وكمان هيستخدموا جهد مغناطيسي عشان يزودها اكتر 😀 

– هي الجسيمات دي ملهاش أهل يسألوا عليها ؟ 😂😂😂 

= ده لسه 😀 سيبني اكمل متقطعش حبل افكاري 

– اتفضل 

المهم المعزز ده هيخلي شعاع البروتونات ده يوصل 91.6% من سرعة الضوء يا مؤمن !!!! 

يهمدوا بقي ؟؟ أبسيلوتلي 

.

4- قامو دخلوا حزم البروتونات دي الملعب اكبر يجري فيه .. سموه (PS) محيط الملعب او المسارع ده 628 متر .. كل حزمة بروتونات هتدور لمدة 1.2 ثانية .. وفي الفترة دي هتوصل سرعة لكااااام بقي ؟؟ (( 99.9 % من سرعة الضوء ) !!!!!

ساعتها العلماء لاحظوا ان بيحصل زيادة في كتلة البروتونات دي ( زي ما اينشتانين قال في قانونه في النسبية الخاصة ) يعني كل ما تجري اسرع بتبقي اتقل . 

ساعتها طاقة كل بروتون بتوصل لـ 25 جيجا الكترون-فولت طبعا .. بص هي طاقة هائلة مش هنقعد نوصفها دلوقتي 😀 .. ساعتها البروتون بيبقي اتقل 25 مرة مما هي عليه وهي ساكنة 

يعني لو حضرتك كتلتك 60 كيلو وقدرت تتحرك بسرعتها هتلاقي كتلتك بقت 1500 كيلو.. بس 😀 .. المهم 

العلماء يتبطوا بقي ويهدوا ؟؟ علي جثتي 

.

5- نقلوا الحزم دي لملعب اكبرررر .. سموه ( SPS ) محيط الحلقة دي بقي 7 كيلومتر 

وده غرضه انه يزود طاقة البروتون من 25 لـ 450 جيجا الكترون-فولت !! 

يا جدعان اهدوا بقي انا تعبت !!! .. ابدااااا 

.

6- اطلقوا بقي حزم البروتونات بالطاقة الرهيبة والسرعة العجيبة دي لملعب اكبر بكتير اووووي وهو ده مصادم الهدرونات الكبير ( LHC ) الحلقة دي بقي بتبقي تحت الارض محيطها 27 كيلو متر هي بتربط بين فرنسا وسويرا عموما ، بين جبال الجورا والألب درجة الحرارة فعلا جوا الأنبوب ده بتبقي أقل من درجة حرارة الفضاء الخارجي .. والفراغ جواه بيكون أقرب للفراغ المثالي .. المهم جوا الأنبوب الضخم ده بيعملوا ايه ؟ 

 بيخلوا حبة بروتونات يلفوا في اتجاه وحبة يلفوا في عكس الاتجاه ده 

وهووووب دابل كيك يلبسوا في بعض 😀 .. ويحصل بقي كل الانبهارات والمفاجات اللي احنا عايزين نستكشفها .. ساعتها طاقة البروتون بتبقي 7 تيرا الكترون-فولت !!!!!! وسرعة البروتونات بتبقي قريبة جدا جدا من سرعة الضوء لدرجة انها بتلف الـ 27 كيلو متر دول 11 ألف مرة في الثانية الواحدة !!! انت متخيل يا مان 😂😂 

.

العلماء قالوا ان الطاقة الناتجة عن تصادم بروتونين من دول بتساوي 14 تيرا الكترون فولت 

ودي تقريبا بتمثل ظروف مماثلة للحظات اللي بعد الانفجار العظيم !!!!! 

واما ندرس التصادمات دي هنقدر نعرف أكتر عن طبيعة الجزيئات او المادة اللي بيتكون منها الكون ، وده هيخلينا نقدر نفسر ازاي اتكون الكون ده واتشكل ووصل للحال اللي عليه حاليا .. وايه اللي هيحصل في المستقبل ؟؟ 

.

مساء الفل 😀

تعليقات الفيس بوك

تعليقًا