أخبار عاجلة
الرئيسية / Blog / «Placebo Effect» أو تأثير الدواء الوهمي ..

«Placebo Effect» أو تأثير الدواء الوهمي ..

جربت البلاسيبو قبل كده؟ 😀 

في إحدى المعارك في شمال افريقيا في الحرب العالمية التانية، دكتور عسكري اسمه Henry K. Beecher كان في المستشفى بيستقبل الجنود الجرحى ومحتاس .. أهم شيء في اللحظة دي كان وجود المورفين -مسكن الألم- واللي للأسف كان خلص! .. وكان لازم الدكتور يقوم بجراحة عاجلة لأحد الجنود وإلا هيموت، إحدى الممرضات حقنت الجندي بحنقة مخدر وهمية فيها ماء مالح مش مخدر وحاولت تهديه وتقوله شويه والألم هيختفي، الأعجوبة إن الألم اختفى بالفعل والدكتور قام بالجراحة!.

.

في دراسة مثيرة جدا اتعملت سنة 1996على 56 متطوع، كانت اختبار لمرهم مسكن ألم جديد اسمه trivaricaine، كل متطوع دهنوا سبابة إحدى يديه بالمرهم والإيد التانية لا، ثم ضغطوا على سبابتي كل متطوع – المدهونة وغير المدهونة – بواسطة مشابك مؤلمة، بعد سؤالهم أخبر المتطوعون إنهم شعروا بألم أقل في الإصبع المدهون بالمسكن، وشكروا في الدوا ده، الغريب إن المرهم ده مكنش مسكن أصلا ولا كان فيه أي مادة فعالة تمنع الألم!.

.

اللي حصل فوق ده كان سببه الـ«Placebo Effect» أو تأثير الدواء الوهمي، وده معناه إن اعتقادك ويقينك بأن هيحصلك شيء كويس بسبب ما، يجعله يحصلك بالفعل!، دواء البلاسيبو معروف جدا عند الأطباء النفسسين، مثلا في حبوب لونها أصفر بيعطوها للمرضى كـ مضادات للاكتئاب وحبوب زرقاء كـ مهدئات وحبوب حمراء كمنشطات ومسكنات للألم، والشيء المثير إن المرضى بيتحسنوا فعلا على الحبوب دي رغم إنها مزيفة واللي فيها مجرد نشا وسكر وبعض الموادالأخرى ومفيهاش أي مادة فعالة!. 

.

لالا .. الموضوع مش تهيؤات أو خُيل إليهم، الأطباء كانوا فاكرين زمان إن التأثير ده نفسي فقط أو المرضى بيحاولوا يرضوا الأطباء فقط، لكن الأبحاث أكدت إن البلاسيبو بيتسبب في تغيرات فسيولوجية بالفعل، وجدوا إنه قادر على إحداث تغير ملموس في ضغط الدم ومعدل ضربات القلب وإفراز مواد كيميائية مسكنة للالم زي (الاندروفين) وده يفسرلنا اللي حصل في التجربتين فوق، وقادر كمان إنه يقلل من مستوى هرمونات التوتر زي (الأدرينالين)، ويحث الدماغ على إفراز الدوبامين في الدم، وده يفسرلنا ليه بينفع في القضاء على الاكتئاب أو التوتر.   

.

التوينز بتاع التأثير ده بقى اسمه الـ«Nocebo Effect» .. لما الأطباء أعطوا نصف المرضى دوا حقيقي والنصف التاني دوا وهمي شبهه وقالولهم إن من الآثار الجانبية للدواء الإحساس بالصداع وألم المعدة بعد نصف ساعة من تناولهم له، حصل كما توقعوا إن النصف التاني أكد إنه شعر بنفس الآثار الجانبية للدواء اللي هما مخدوهوش أصلا! 

أحد الشباب بعد ما حبيبته سابته بلبع علبة برشام كلها كانت قدامه ظنا منه إنه كده بينتحر ووقع ع الأرض ونقلوه المستشفى وضغطه انخفض جدا وكان بيتنفس بصعوبة وكان على الوشك الموت حرفيا وبعد الفحص الأطباء وجدوا إن اللي بلعه كان برشام بلاسيبو (حبوب سكر يعني) وإن اللي حصله ده بسبب تأثير التوينز فقط! 

.

الباحثين وجدوا كمان إن كبسولة بلاسيبو أكثر تأثيرا من الحبة، والحقنة أفضل من الكبسولة، و(الجراحة الوهمية) أفضل من الحقنة – أها عملوا عمليات وهمية لمرضى ووجدوا إنهم اتحسنوا بعديها! – وإن كلما زاد سعر البلاسيبو وتكلفة انتاجه كلما ازداد تأثيره على المرضى.

.

طبعا البلاسيبو له حدود، يعني مش بيخفي ورم أو يعالج التهاب أو يعيد أطراف مبتورة مش هنظيط، وطبعا الدكاترة مش بيشجعوا استخدامه في جميع الحالات أولا بسبب الجانب الأخلاقي وبسبب إن ممكن يفوّت على المريض إنه ياخد الدواء الحقيقي اللي أثبتوا فعاليته فعلا، غير إن الآثار الإيجابية للبلاسيبو كثيرا ما تختفي مع الوقت.

.

البلاسيبو ده هتلاقيه ديما في حياتنا، هتلاقيه في الشباب اللي سكروا بسبب خمرة مزيفة! في طالب قالوله الدرس ده صعب جدا فحضره ومفهمهوش والتاني قالوله سهل جدا ففهمه بسهولة.

.

من الممتع أننا رغم اكتشافنا لمجرات جديدة في هذا الكون ولكن مازلنا نندهش ونتعجب ونحاول أن نفهم ما بجعبة هذا العقل البشري المذهل.. والأكثر متعة وغرابة أن ندرك أنه في كثير من الأحيان يكون مصدر دائنا ودوائنا لم يبارح عقلنا.

 

تعليقات الفيس بوك

تعليقًا

عن

شاهد أيضاً

رحلة بسيطة ممتعة بتشرح إيه اللي بيحصل جوه جسمك لما بتتلسع أو تحس بألم !!👇🏻

لما كنت بتلسع زمان من الكبريت كنت بقعد أتأمل في صباعي كده وأبقى نفسي أعرف …

%d مدونون معجبون بهذه: